မတ်မလီု၊ ဂျာန္နဝါရဳ (၁၈)
ၚုဟ်ကၠေၚ်စက်အပ္ဍဲဍုၚ် မက္ဍၚ်ဒၟံၚ်ဂှ်ဝွံ ဟိုတ်နူၚုဟ်ကၠေၚ်ဍေန်ဂၠးတိကဵု ၚုဟ်ဒဝ်ဠာအပ္ဍဲဍုၚ် ကလေၚ်သၠုၚ်တိုန်ကၠုၚ်ဂှ်ရ ၚုဟ်ထပ်တိုန်ကၠုၚ်ပၠန်ဂှ် တၠကမၠောန်ပရေၚ်သွံရာန် ကၠေၚ်စက်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ၚုဟ်ကၠေၚ်ဍေန်ဝွံ ပ္ဍဲဂိတုဂျာန္နဝါရဳ သတ္တာဟပထမတုဲကၠုၚ်တေံဂှ် ကၠေၚ်တိမွဲစေဝ် နူကဵုပွဳပွူ (၇၄) ဒဝ်ဠာဂှ် အခိၚ်လၟုဟ် ၚုဟ်ကလေၚ်သၠုၚ်တိုန်ကၠုၚ် စဵုကဵု (၈၀) ဒဝ်ဠာ မဒှ်ရ။
ၚုဟ်ဒဝ်ဠာဂှ်လေဝ် ပ္ဍဲကဵုဗွဝ်ဖျာမ္ၚးဏံဂှ် မွဲဒဝ်ဠာ နူကဵု (၂၈၅၀) ဒ္ကေဝ်ဂှ် ၚုဟ်ထပ်ကလေၚ်သၠုၚ်တိုန်ကၠုၚ် စဵုကဵု ပွဳပွူ (၂၈၈၀) ဒ္ကေဝ်ရ။
ၚုဟ်ကၠေၚ်ဍေန်ဂၠးတိကဵု ၚုဟ်ဒဝ်ဠာတံ ကလေၚ်သၠုၚ်တိုန်ကၠုၚ်ဂှ်ရ ၚုဟ်ကၠေၚ်စက်ဝွံ ကၠေၚ်ဓာတ် (၉၅) မွဲလဳတာ နူကဵုပွဳပွူ (၂၁၀၀) ဒ္ကေဝ်ဂှ် သၠုၚ်တိုန်ကၠုၚ် စဵုကဵုပွဳပွူ (၂၃၀၀) ဒ္ကေဝ်တုဲ ဒဳဇြေဝ်မွဲလဳတာဂှ် နူကဵု (၂၃၅၀) ဒ္ကေဝ် ၚုဟ်ကလေၚ်သၠုၚ်တိုန်ကၠုၚ် စဵုကဵုပွဳပွူ (၂၅၆၀) ဒ္ကေဝ်ရ။
တၠကမၠောန်ပရေၚ်သွံရာန်ကၠေၚ်စက်မွဲတၠဂှ် ၚုဟ်ကၠေၚ်စက်ဝွံ ဟိုတ်နူၚုဟ်ကၠေၚ်ဍေန်ဂၠးတိ၊ ၚုဟ်လှုဲသေန်ကာပေါဝ် ကေုာံ ၚုဟ်ဒဝ်ဠာ (၃) ဂကူတံဓဗတုဲ သၠုၚ်တိုန်ကၠုၚ်ဂှ်ရ စဵုကဵုဂိတုအိုတ်ဂှ် ၚုဟ်ကၠေၚ်စက် စှ်ေဟွံမာန်ဏီပုဟ်ဂှ် သ္ၚဳဂၠိပ်လဝ်ရ။
“ၚုဟ်ကၠေၚ်ဍေန်ဂၠးတိလေဝ် တိုန်ဒၟံၚ်၊ အရိုဟ်တွဵု နူ (၇၄) (၇၅) ဂှ် လၟုဟ် ဒှ်ဒၟံၚ် ၜိုတ် (၈၀) ရ၊ တိုန်ကၠုၚ် ၜိုတ် (၆) ဒဝ်ဠာ (၇) ဒဝ်ဠာရ၊ ၚုဟ်လှုဲသေန်ကာပေါဝ်ဂှ်လေဝ် တိုန်ကွေံကွေံ၊ တုဲတှ်ေအကြာဏံ ၚုဟ်လှုဲဂှ်လေဝ် တိုန်ဒၟံၚ်ဏောၚ်၊ သီုပိ တိုန်ဇဳဒၟံၚ်ဟဂှ်ရ၊ ၚုဟ်ကၠေၚ်ဍေန်ဂၠးတိကီု ၚုဟ်လှုဲကီု တိုန်သီု (၂) တုဲ ကၠေၚ်ဂှ်တှ်ေ ပဵုတိုန်ရ၊ ၚုဟ်နှေန်ဂှ်တှ်ေ အခိၚ်လၟုဟ်အဲထေၚ်ဂှ် ဒဵုကဵုဂိတုဏံအိုတ်ဂှ်တှ်ေ ၚုဟ်ကၠေၚ်တံ စှ်ေကၠုၚ်ဟွံမာန်ဏီပုဟ်၊ ၚုဟ်တ္ၚဲဏံ ဟွံသေၚ်မ္ဂး ဂွံစှ်ေလ္ပာ်သၟဝ်ဂှ် ဟွံညာတ်ပုဟ်၊ ညိၚ်တှ်ေညိၚ်ဏောၚ်” သာ်ဝွံ သ္ဂးရ။
ၚုဟ်ကၠေၚ်စက်အပ္ဍဲဍုၚ်ဝွံ အခိၚ်ၚုဟ်စှ်ေလဝ် ကၠာတေံဂှ် နကဵုတၠကမၠောန်တံ သွက်ဂွံကြိုၚ်စွံလဝ်ဂှ် ကံၚ်ဇြဳပၞာန်တံ ၜိုတ်နွံပၟိက် ဟွံသွံတြးကဵုတုဲ ဟိုတ်နူပါ်ပရအ်သွံကဵုလဝ် ကဵုအရၚ်သၟးဂှ်ရ ဆက်နွံဒၟံၚ် အတိုၚ်ၚုဟ်သၠုၚ်ၚ်ရဂှ် သ္ဂးရ။
ကံၚ်ဇြဳပၞာန်ဂှ် ညံၚ်ကၠေၚ်စက်အပ္ဍဲဍုၚ် ဂွံစှ်ေဂးတုဲ ၜိုန်ရပၠောပ်နၚ် ကၠေၚ်စက် နူဍုၚ်ရုယှာတံကီုလေဝ် ဟိုတ်နူဟွံစိုပ်ကၠုၚ် အပ္ဍဲဗွဝ်ဖျာဂှ်ရ ၚုဟ်ကၠေၚ်စက် ပြံၚ်လှာဲကၠုၚ်လဝ် တီတီဒှ်ဒှ် ဟွံမွဲပုဟ်ဂှ် ဂွံတီကေတ်ရ။
တိုက်သြန်ဗဟဵု သၟဝ်တဲကံၚ်ဇြဳပၞာန်ဂှ်လေဝ် ပ္ဍဲဂိတုအဝ်ဂါတ် (၃၁) သၞာံတုဲကၠုၚ်တေံဂှ် ဒၟါနူၚုဟ်ကၠေၚ်စက်က္ဍၚ်တိုန်လဝ်ဂှ်ရ ညံၚ်ကပေါတ်ဗၞိက်သ္ဇိုၚ် ၚုဟ်မက္ဍၚ်ဒၟံၚ်တံ ဂွံသက်သာအာဂှ် နူကဵုဗွဝ်ဖျာသြန်လှုဲဍုၚ်သ္အာၚ်တံမွဲကဆံၚ် ထံက်ပၚ်ကဵုအာ ဒဝ်ဠာအမေရိကာန် (၂၀၀) ပြကောဋိကိုဋ်ရောၚ် ၜိုန်ရလလောၚ်တြးလဝ်ကီုလေဝ် ၚုဟ်ကၠေၚ်စက် စှ်ေအာလဝ် တီတီဒှ်ဒှ်ဂှ် ဟွံမွဲရ။
ပ္ဍဲဍုၚ်ဗၟာဂှ် ၚုဟ်ကၠေၚ်စက်ဝွံ ပ္ဍဲလက်ထက်အလဵုအသဳ NLD တုဲကၠုၚ်တေံဂှ် ကၠေၚ်ဓာတ် မွဲလဳတာ နူၚုဟ်မၞုံ ပွဳပွူ (၆၀၀) ဒ္ကေဝ်ဓဝ်ဂှ် ကြဴနူဒပ်ပၞာန်သီအဝဵုတုဲ ၚုဟ်ကၠေၚ်စက် သၠုၚ်တိုန်ကၠုၚ်လဝ် (၄) ဆပြၚ်တုဲ ၚုဟ်နှေန်ဟွံညိၚ်ဝတ်တံလေဝ် က္တဵုဒှ်ဒၟံၚ် ကြပ်အရိုဟ်ဒဒှ်တ္ၚဲရ။
ပရိုၚ်−သြၚ်လောန်တိုၚ်(မ်)