ပဠဝ်၊ ဖေဖဝ်ဝါရဳ (၇)
ကံၚ်ဇြဳပၞာန် ကဵုကၠုၚ်ဇြဟတ်ဂရိုဟ် အနိၚ်အပိုၚ် ကုညးပါဲဒဴဘဲပၞာန် မကၠုၚ်စိုပ်ပါဲဒလေတ်ဒၟံၚ် လ္တူဍုၚ်ပဠဝ်၊ ရးဒေသဇၞော်တၞၚ်သဳ သွက်ဂွံကလေၚ်စဴဌာန်ဒၟံၚ်အိုတ်ဂှ် ညးမရီုဗၚ်ရေၚ်တၠုၚ်ကဵုဒၟံၚ်ပရေၚ်ပါဲဒဴဘဲပၞာန်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒပ်ကံၚ်ဇြပၞာန်ဝွံ တုဲကၠုၚ်ဂိတုဖေဖဝ်ဝါရဳ (၅) တေံ ကြဴနူကၠုၚ်စိုပ်စၟဳစၟတ် ဘာလကျာ် မဒုၚ်လဝ်တဲ ညးပါဲဒဴဘဲပၞာန်တံတုဲဂှ် လ္ပဒုၚ်လဝ်တဲညးပါဲဒဴဘဲပၞာန်တံ ကေုာံ သွက်ဂွံကဵုစဴထောံ ဗွဲမပြဟ်ဂှ် ဟီုဂးကဵုကၠုၚ်ဇြဟတ်ဂရိုဟ်ရ။
ဒပ်ကံၚ်ဇြဳပၞာန် ဟိုတ်နူကဵုကၠုၚ်ဇြဟတ်ဂရိုဟ်ဂှ်ရ ညးဍုၚ်ကွာန်ပါဲဒဴဘဲပၞာန်လ္ၚဵုတံ ဒးကလေၚ်စဴကၠုၚ်ဌာန်ဒၟံၚ်တံကီုလေဝ် ဗွဲမဂၠိုၚ်ဂှ် ဟိုတ်နူကဵုဒပ်ကံၚ်ဇြဳပၞာန်တံ ပန်ပှော်ဒၟံၚ်လွဟ်ဇၞော် လၟေၚ်ဒဒှ်တ္ၚဲတံဂှ်ရ သွက်အန္တရာယ်လမျီုတုဲ ဂွံစဴဌာန်ဒၟံၚ်ဂှ် ဂွိၚ်ဂွါဲဒၟံၚ်အိုတ်ရ။
ညးဍုၚ်ကွာန်ပါဲဒဴဘဲပၞာန် မကၠုၚ်စိုပ်ပါဲဒလေတ်ဒၟံၚ် လ္တူဍုၚ်ပဠဝ် ဗွဲမဂၠိုၚ်တံဝွံ ဒှ်ရဲလ္ပာ်ကွာန်ယှာတ်ပုံတံတုဲ မံၚ်စံၚ်ဒၟံၚ် ပ္ဍဲကဵုဘာလကျာ်တံ ကေုာံ သ္ၚိမသကလောကောဒေံတံဂှ်ကီု၊ ထ္ပက်ထာဲယာယဳ ပ္ဍဲကဵုဂၠံၚ်ခဠာတ် အကြာကွာန်ယှာတ်ပုံကဵု ပဠဝ်တံတုဲ မံၚ်စံၚ်ဒၟံၚ်တံ နွံဂှ် သ္ဂးရ။
ပ္ဍဲကဵုရးဒေသဇၞော်တၞၚ်သဳဂှ် အပ္ဍဲဂိတုဂျာန္နဝါရဳ မွဲဂိတု တုဲကၠုၚ်တေံဂှ် ဟိုတ်နူပေါဲဗ္တိုက်ၜါလ္ပာ်တံတုဲ ညးဍုၚ်ကွာန်ပါဲဒဴဘဲပၞာန် ထောံလသာသ္ၚိဌာန် မ္ဒးဂြိပ်ဒဴဒၟံၚ်တံ နွံလဝ် စဵုကဵု (၇၀၀၀) ပြၚ်ဂှ် ဂကောံသုတေသန Southern Monitor လလောၚ်ပ္တိတ်လဝ်ရ။
ညးဍုၚ်ကွာန်ပါဲဒဴဘဲပၞာန် မ္ဒးဂြိပ်ဒဴပါဲဒလေတ်ဒၟံၚ်ဘဲပၞာန်တံဝွံ ဟိုတ်နူပရေၚ်ကၟာတ်လဒဵု သၞောတ်ဗ္ၜတ် ဒပ်ကံၚ်ဇြဳပၞာန်တံတုဲ မ္ၚးနူဇွောံမစၞစ ကေုာံ ဂဥုဲဇဗတံဂှ် နွံပၟိက်ဒၟံၚ်ကဵု အရီုဗၚ် ပရေၚ်ဗ္စာရဏာမၞိဟ်တံရ။
ပရိုၚ်−သြၚ်လောန်တိုၚ်(မ်)