သဓီု၊ ဖေဖဝ်ဝါရဳ (၇)
လ္တူဂၠံၚ်ကွဳစက် လ္ဂုၚ်−မတ်မလီု ဗ္ဒါဲကွာန်ကမာဇြိုၚ်၊ ပွိုၚ်ဍုၚ်သဓီု၊ တွဵုရးဍုၚ်မန်ဂှ် ဂိတုဖေဖဝ်ဝါရဳ (၄) အခိၚ်ဗ္တံဂှ် ဟိုတ်နူရေၚ်ကွဳစက်ကံၚ်ဇြဳပၞာန် ဒးဒုၚ်ဗ္တိုက်ဂှ်ရ ကောန်ဒပ်ကံၚ်ဇြဳပၞာန် (၅) တၠ ချိုတ်တုဲ (၅) တၠ ကလိဂွံလဝ်ဝပ်ဂှ် ဂွံတီကေတ် နူကဵုကမ္မတဳကောပ်ကာဲကေၚ်ကာမိတ်ခရိုၚ်သဓီု ကေအာန်ယူ ရ။
ပ္ဍဲတ္ၚဲဂှ် အခိၚ်ဗ္တံ ၜိုတ် (၉) နာဍဳ ရေၚ်ကွဳစက်ကံၚ်ဇြဳပၞာန် ကွဳစက် (၄) ဖ္ဍိုက်မပါဗက် နူသဓီု မဒဳကၠုၚ် လ္ပာ်ၜဳကလေၚ်ဂှ် ဂကောံပံၚ်တောဲ ပဳဒဳအာဖ် ကေုာံ ဒပ်ပၞာန်ဗၠးၜးကောန်ဂကူကရေၚ် KNLA တံ ဗ္တိုဟ်မာၚ်တုဲဂှ် ဗ္တိုက်ပန်ပှော်လဝ်ရ။
ဟိုတ်နူပရေၚ်ဗ္တိုက်ဂှ်တုဲ က္တဵုဒှ်လဝ် ပရေၚ်ပန်ပှော် မွဲလ္ပာ်ကုမွဲလ္ပာ် လလအ်ပွိုၚ် (၂၀) မိနေတ်တုဲ ကွဳစက်ပၞာန် မွဲဖ္ဍိုက် လီုလာ်ဒးအာလဝ်ဂှ် ဥက္ကဌကမ္မတဳ ကောပ်ကာဲကေၚ်ကာမိတ်ခရိုၚ်သဓီု ကေအာန်ယူ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကြဴနူပရေၚ်ပန်ပှော်တုဲ ဒပ်ကံၚ်ဇြဳပၞာန်တံ ကော်ပၞာန်ရီုတုဲ ကၠုၚ်စိုပ်ယိုက်ဏာလဝ် ကောန်ဒပ်ကံၚ်ဇြဳပၞာန် မဇီုကပိုက်ချိုတ်အာလဝ်ဂှ်ကဵု ကွဳစက်မွဲဖ္ဍိုက် လွာဲဂှ်ဂှ် သ္ဂးရ။
တုဲကၠုၚ်ဂိတုဂျာန္နဝါရဳ (၁) တေံဂှ်လေဝ် ရေၚ်ကွဳစက်ကံၚ်ဇြဳပၞာန် ကွဳစက် (၃) ဖ္ဍိုက်ပါ နူသဓီု ကၠုၚ်လ္ပာ်ၜဳကလေၚ်တံ ဒးဒုၚ်ဗ္တိုက်တုဲ ဇီုကပိုက်ချိုတ်အာတံ နွံလဝ်ဏီရ။
လ္တူဂၠံၚ်ကွဳစက်လ္ဂုၚ်−မတ်မလီု အကြာကွာန်ဒံၚ်ရာပ် ပွိုၚ်ဍုၚ်ၜဳကလေၚ်ကဵု ကွာန်ကမာဇြိုၚ် ပွိုၚ်ဍုၚ်သဓီု တွဵုရးဍုၚ်မန်ဂှ် ဒပ်ကံၚ်ဇြဳပၞာန်တံ ဒးဒုၚ်ဗ္တိုက်ဒၟံၚ် မွဲဏှမွဲဏှတုဲ ပ္ဍဲကဵုပရေၚ်ဗ္တိုက်ဏံဂှ် လ္ပာ်ကံၚ်ဇြဳပၞာန် ဒးဂိလဝ်ရ။
ပရိုၚ်−သြၚ်လောန်တိုၚ်(မ်)