လ္ဂုၚ်၊ ဖေဖဝ်ဝါရဳ (၇)
ညးမကဵုဇြဟတ်ထံက်ဂလာန် လ္တူအောန်လိုၚ်သဵုယှေဝ်မဳဒဳယျာ ကုဂကောံဒစဵုဒစး အလဵုအသဳညဳသၟဟ်ဂကူ (NUG) ၊ ကမ္မတဳသ္ပစၞးကၠတ်ထဝ် (CRPH) ကေုာံ ဂကောံမဆက်စပ်တံဂှ် ကံၚ်ဇြဳပၞာန် ပွမကေတ်အရေဝ် နကဵုသၞောဝ်ပကီုပရာပ်တံဂှ် ဆက်ကၠောန်ၜိုတ်ဒၟံၚ်ရ။
နူကဵုသြၚ်လောန်တိုၚ်(မ်) ၜိုတ်က္ဍစိုပ် စၟဳတ်စမ်ရံၚ် အကာဲအရာ နူကဵုအကံက်ထလဳဂရာမ်တြးဝါဒကံၚ်ဇြဳပၞာန်တံ မကေတ်လဝ်ဒုဟ် ဆအယာံမာတ်ကဵုဇြဟတ်ထံက်ဂလာန် ကုဂကောံဒစဵုဒစးတံဂှ် နူဂိတုဖေဖဝ်ဝါရဳ သၞာံ ၂၀၂၂ တုဲကၠုၚ်တေံ စဵုကဵုသၞာံဏံ ဂိတုဖေဖဝ်ဝါရဳ (၃) ဂှ် ရပ်ဒက်ပံက်လဝ်အမှု ကုတၠအကံက်ဝှေတ်ဗော် ၂၈၀ ပြၚ်တံကီုလေဝ် ဗလးတိဏံဂှ် သာဂၠိုၚ်နူဏံမာန်ရ။
ၝောံပိုဒ် ကံၚ်ဇြဳပၞာန် မကေတ်လဝ်ဒုဟ်တံဂှ် ၝောံပိုဒ် ၅၂ (က) သၞောဝ်ဥပဒေ ဗ္တိုက်သ္အးပကီုပရာပ်၊ ၝောံပိုဒ်ရာဇာသာတ်ဇၞော် ၁၂၄−က ကေုာံ ၝောံပိုဒ် ၅၀၅−က၊ ၝောံပိုဒ်ဆက်စၠောံအဳလက်ထရဝ်နေတ် ၃၃ (က) တံ ပါလုပ်ရ။
ၝောံပိုဒ်တံဏံဝွံ ဒှ်ၝောံပိုဒ် ဖျေံစၟတ်ဒဏ်ထံၚ် နူ(၃) သၞာံ စဵုကဵုဒုဟ်ဒဏ်သၠုၚ်အိုတ် ဒဏ်ထံၚ်မွဲအာယုက်မာန်တံရ။
ကံၚ်ဇြဳပၞာန်ဂှ် ကပေါတ်ဆုဲပြံၚ်မာန်ကီု၊ ဆုဲပြံၚ်ဟွံမာန်ကီု ကပေါတ်မဆက်စပ်ကဵုဒုဟ်ဒဏ်တံဂှ် နကဵုသၞောဝ်ဥပဒေဗ္တိုက်သ္အး ပွပကီုပရာပ်တံဂှ် ဒးဒုၚ်သီမာန်တုဲ ယဝ်ရဒုဟ်ဒဏ်ပြာကတ် ဒးဒုၚ်စဳရေၚ်မ္ဂး ဒးဒုၚ်သီကေတ် နဒဒှ်ဘဏ္ဍာကၟိန်ဍုၚ်မာန်ရောၚ်ဂှ် လလောၚ်တြးလဝ် ပ္ဍဲလိက်ပရိုၚ်တြးဝါဒတံရ။
ပွမကေတ်ဒုဟ် သာ်ဏံဂှ်ဝွံ ဒစဵုဒစးဒၟံၚ်ကဵု တၚ်စၞောန်ပျး ပ္ဍဲကဵုသၞောဝ်သ္ဇိုၚ် မကဵုလဝ်အခေါၚ်ချူတြး၊ အခေါၚ်ဟီုဂးထ္မံက်ပ္တိတ် ဓဝ်ပတှ်ေတံ ဗွဲမဗၠးၜး၊ တၚ်ဒုၚ်ဂိုၚ်ကေတ်ကောန်ဍုၚ်တံရောၚ်ဂှ် ညးရေၚ်တၠုၚ်ဂဗုတ် ကၠတ်ထဝ်သၞောဝ်ဓဝ်မွဲတၠ ထံက်ထ္ၜးလဝ်ရ။
“စၞောန်ပျး လ္ဂောံကဵုသၞောဝ်တံတုဲ ကၟာတ်လဒဵုသၞောတ်ဗ္ၜတ်ထောံ သာ်ဏံဂှ်ဝွံ ဟိုတ်နူစၞောန်ပျးလဝ်သၞောဝ် နူကလၚ်ဂှ်ရ စောဲဂဗုတ်ကဵုသၞောဝ်ဏံဏောၚ်။ ကေတ်ဒုဟ်ဏောၚ်။ ညအ်ဂှ် ဟွံကိတ်ညဳကဵုသၞောဝ်ပုဟ် ၜိုန်ရဟီုဟွံမာန်ကီုလေဝ် ဒစဵုဒစးဒၟံၚ်ကဵု တၚ်စၞောန်ပျး မပါလုပ် ပ္ဍဲၝောံပိုဒ် (၃၅၄) (၃၄၇) သၞောဝ်သ္ဇိုၚ်တံ ကေုာံ တၚ်စၞောန်ပျး စပ်ကဵုအခေါၚ်အရာ၊ အခေါၚ်ဗၠးၜး ကောန်ဍုၚ်တံဏောၚ် ဒးဟီုသာ်ဏံရ” သာ်ဝွံ သ္ဂးရ။
အလဵုကံၚ်ဇြဳပၞာန်ဂှ် ဟိုတ်နူလလောၚ်တြးလဝ် ဒ္ဂေတ်ဗက်သၞောဝ်သ္ဇိုၚ် မထ္မံက်ရုပ်ရဴဒဳမဝ်ကရေဇြဳတံဏောၚ်ဂှ်ရ နဒဒှ်ကောန်ဍုၚ်မွဲမွဲ ယဝ်ရဟွံဂွံအခေါၚ်ထ္မံက်ပ္တိတ် တၚ်ဒုၚ်ဂိုၚ်ကေတ်ဇကု ဗွဲမဗၠးၜး မဟွံကဵုဇီုကပိုက်ဒး လ္တူညးတၞဟ်တံဂှ်မ္ဂး ထ္မံက်ဒၟံၚ်ရုပ်ရဴ ဒဳမဝ်ကရေဇြဳဏောၚ်ဟီုဂှ်ဝွံ ဒှ်ဆအလီသက်က်ရောၚ်ဂှ် ညးရေၚ်တၠုၚ်ဂဗုတ် ကၠတ်ထဝ်သၞောဝ်ဓဝ်ဂှ် ပါ်ပါဲလဝ်ရ။
ကံၚ်ဇြဳပၞာန်ဂှ် နကဵုညးဍုၚ်ကွာန်တံ လ္တူပွမတြးဝါဒဆဝ်မ္ၚုဟ် NUG, CRPH ကေုာံ ဂကောံမဆက်စပ်တံဂှ် ဟွံတီကဵုဒှ်၊ ဖေက်တုဲကဵုဒှ် ဗက်ကၠောန်တုဲ နကဵုရမျာၚ်ကဵုဒှ် နကဵုပွကဵုဒှ် မွဲနဲမွဲဗီုကဵုဒှ် ကၠောန်သ္ပပွ မသ္ကဵုက္တဵုဒှ်ပလာပ်ပထုဲ ကုညးဍုၚ်ကွာန်ဂမၠိုၚ်တံကီု၊ ထပ်တြးကၠေံ အရာမတြးဝါဒဆဝ်မ္ၚုဟ်တံ မွဲကဆံၚ် ကေုာံ ကၠောန်သ္ပကဵုဇြဟတ်ရီုဗၚ်တံဂှ်မ္ဂး ဒးဒုၚ်ကေတ်ဒုဟ်ရောၚ်ဂှ် ပ္ဍဲသၞာံမံက်တုဲကၠုၚ်တေံ လလောၚ်ပ္တိတ်လဝ်ရ။
ညးမၞုံအခေါၚ်ဟီုဂး အလဵုအသဳညဳသၟဟ်ဂကူ အာန်ယူဂျဳ ဥူနေဖုၚ်လာတ်ဂှ် အလဵုဂကောံပၞာန်ဂှ် ဓဝ်ဖေက်တံ ဓလီုလဝ်တုဲ ဒှ်သဘဴဘဗဠ ကုညးဍုၚ်ကွာန်တံတုဲ ဒှ်ပွဖံက်ပ္ကဝ်အခေါၚ်အရာမၞိဟ်ရောၚ်ဂှ် ခၠေဝ်ပလန်လဝ်ရ။
“အလဵုဍေံတံဂှ် ဓဝ်ဖေက်ဓလီုလဝ်တုဲ မွဲလ္ပာ်တေံဂှ်လေဝ် ညံၚ်ဓဝ်ဖေက်ဂွံဓလီု ညးဍုၚ်ကွာန်တံဂှ် ဘပဠတုဲတှ်ေ ဒှ်သဘဴကၠောန်ၜိုတ်ဒၟံၚ်ရ။ လၟုဟ်ဂှ် အခေါၚ်ဟီုဂး ထ္မံက်ပ္တိတ်ချူတြး ဗွဲမသၠးပွးဂှ်တှ်ေ လ္တူသဵုယှေဝ်မဳဒဳယျာဂှ် ၜိုန်ရမအရေဝ်သ္ကာတ်တ်မြဟ်ဟ်ဟွံသေၚ်မွဲသာ် ချူလညာတ် သာမညမွဲ၊ တၚ်မဒုၚ်ဂိုၚ်ကေတ်မွဲမွဲရဂှ် ဗက်ရပ်၊ ကေတ်ဒုဟ်၊ ဖျေံထံၚ်ဟီုတှ်ေ ကၠောန်မံၚ်မတံဏံဂှ် ဒှ်ပွဖံက်ပ္ကဝ်အခေါၚ်အရာမၞိဟ် ပရေံပရေံရ။ ဒွံဒးဒၟံၚ်ကဵု အခေါၚ်ဟီုဂးချူဆာဲ ဗွဲမဗၠးၜးရောၚ်” ဂှ် သ္ဂးရ။
ပ္ဍဲကဵုပေါဲသောၚ်ကလးလိက်ပရိုၚ် ကံၚ်ဇြဳပၞာန် မကၠောန်ဗဒှ် ပ္ဍဲဂိတုသေပ်တေမ်ဗာ ၂၀ သၞာံတုဲကၠုၚ်တေံဂှ်လေဝ် ဆၜိုတ်အယာံမာတ် ထံက်ဂလာန်ကဵုဇြဟတ် ကုအာန်ယူဂျဳ၊ သဳအာပဳအုက်ချ် ကေုာံ ပဳဒဳအာဖ်တံဓဝ်ဂှ် ဖျေံစၟတ်ကေတ်အာဒုဟ်ဒဏ်ဇၞော်ဇၞော်တံရောၚ်ဂှ် ညးမၞုံအခေါၚ်ဟီုဂး ကံၚ်ဇြဳပၞာန် သ္ကိုပ်ပၞာန်ဇြဝ်မေန်ထောန် ဟီုဂးလဝ်ရ။
သ္ကိုပ်ဗိုလ်ဇြဝ်မေန်ထောန်ဂှ် Post မဆက်စပ်ကဵု အာန်ယူဂျဳ၊ သဳအာပဳအုက်ချ်၊ ပဳဒဳအာဖ်တံ နူကဵုမုက်လိက် ဇာဇၞိက်ပရေၚ်မၞိဟ်ဝှေတ်ဗော်တံဂှ် ညးမထံက်ဂလာန်ကဵုဇြဟတ်တံ ကဵုလိုခ်၊ ပါ်တြး ကုဗီုဓာတ်၊ ဗဳဒဳယော ကေုာံ လိက် တံဂှ်ဗက် ဒးဆေၚ်မုက်ကဵု ၝောံပိုဒ်ရာဇာတ်သာတ်ဇၞော် ၁၂၄−ခ (ခ) တံမာန်ရောၚ်ဂှ် ဘပဠလဝ်ရ။
ညးချဳဒရာၚ်အခေါၚ်အရာမၞိဟ် နာန်မိုအ်အ်ဂှ်လေဝ် ကံၚ်ဇြဳပၞာန် ကၟာတ်ထောံ ဗီုကဵုသၠာဲဂတးလညာတ် တၚ်ဒုၚ်ဂိုၚ်ကေတ်ပရေၚ်ဍုၚ်ကွာန် ညးဍုၚ်ကွာန်တံဂှ်ဝွံ ဒှ်ပွဝးပ္ကဝ်အခေါၚ်အရာမၞိဟ် ကေုာံ အခေါၚ်အရာကောန်ဍုၚ်မွဲမွဲရောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ကၟာတ်ထောံပရိုၚ် ကုညးဍုၚ်ကွာန်ဂမၠိုၚ်တံ ပေၚ်ၚ်ရဏောၚ်။ ကၟာတ်ထောံ ပရေၚ်သၠာဲဂတး လညာတ်ညးဍုၚ်ကွာန်တံ၊ တၚ်ဒတူလိုၚ်တံ၊ စပ်ကဵုတၚ်ဒုၚ်ဂိုၚ်ကေတ်ပရေၚ်ဍုၚ်ကွာန်ညးတံရဏောၚ်။ မွဲလ္ပာ်ပၠန်ဂှ်လေဝ် ကၟာတ်ထောံ အခေါၚ်သ္ဂောံကလိဂွံပရိုၚ်၊ အခေါၚ်ဟီုဂးထ္မံက်ပ္တိတ်ဗွဲမဗၠးၜး ညးဍုၚ်ကွာန်တံရဏောၚ်။ ညအ်ဂှ် ဝးပ္ကဝ်ထောံ အခေါၚ်အရာကောန်ဍုၚ် ညးဍုၚ်ကွာန်တံ ဗွဲမဇၞော်ကဵုဇြဟတ် ပေၚ်ၚ်ရ။ ညအ်ဂှ် နဲဗျူဟာဒပ်ပၞာန်ရဏောၚ်။ ညအ်ဂှ် ဒှ်ပွဝးပ္ကဝ် အလုံအခေါၚ်အရာမၞိဟ်မွဲရ” သာ်ဝွံ သ္ဂးရ။
အခိၚ်လၟုဟ်ဂှ် ကံၚ်ဇြဳပၞာန် ထပ်ပပဵုပ္တိုန်အာယုက်ကာလကာတၟေၚ် (၆) ဂိတုတုဲ ဆက်ကေတ်လဝ်အဝဵုတုဲ ပ္ဍဲကဵုအကြာတ္ၚဲတံဏံဂှ်ရ နူကဵုဂကောံဗ္တိုက်သ္အးပွပကီုပရာပ် ဗဟဵု (CCCT) ဂှ် ဝေၚ်ဂိမ်၊ စုတ်လလောၚ် ညံၚ်ရဴကဵုဇြဟတ် ကုဂကောံပကီုပရာပ်တံဂှ်ဝွံ ဒးဒုၚ်ကေတ်ဒုဟ် နကဵုသၞောဝ်ဥပဒေမာန်ရောၚ်ဂှ် ပလံၚ်ဗစိုပ်ကဵုဒၟံၚ် SMS ဇရေၚ်ညးဍုၚ်ကွာန်တံရ။
နူကဵုကောံဓရီု ဂကောံပရေၚ်ဗ္တိုက်ပလီုပွပကီုပရာပ်ကံၚ်ဇြဳပၞာန် (CCCT) တံဂှ် စပ်ကဵုပွပကီုပရာပ်တံတုဲ ကၟာတ်လဝ် အကံက်ဝှေတ်ဗော် မကဵုဇြဟတ်ကုပကီုပရာပ်ဂှ် (၁၅၈၀) ၊ အကံက်ဝှေတ်ဗော်ထံက်ပၚ်ပကီုပရာပ်ဂှ် ၂၄၀ ၊ အကံက်ဝှေတ်ဗော် မဆက်စပ်ဒၟံၚ်ကဵု ၝောံပိုဒ် ၅၀၅ ဂှ် ၁၀၇၁ မဒှ်ရောၚ် သာ်ဝွံ ထ္မံက်ထ္ၜးလဝ် ပ္ဍဲလိက်စၞောန် မမံက်တိတ်ကၠုၚ် နကဵုစၟတ်တ္ၚဲ ဂိတုဂျာန္နဝါရဳ (၁၀) တေံရ။
ပရိုၚ်−သြၚ်လောန်တိုၚ်(မ်)