ကအ်ကြိက်၊ ဖေဖဝ်ဝါရဳ (၈)
ပ္ဍဲကဵုဒေသသ္ကုတ်သၠုၚ်ကျာ ပွိုၚ်ဍုၚ်ကအ်ကြိက် တိဍာ်ဒပ်မဟာ(၆) ဗော်သွးကောန်ဂကူကရေၚ်ဂှ် ဟွံက္တဵုဒှ်ပေါဲဗ္တိုက်မွဲသာ် ပ္ဍဲဂိတုဖေဖဝ်ဝါရဳ (၆) အခိၚ်ဗ္တံဂှ် ဒပ်ကံၚ်ဇြဳပၞာန် ထပ်ကၠောန်သ္ပဗ္တိုက်လဝ် ကဵုက္ၜၚ်ကျာဂှ် ဂွံတီကေတ်ရ။
နူဏေံတေံ ဂိတုဖေဖဝ်ဝါရဳ (၆) အခိၚ်ဗ္တံ (၁၂) နာဍဳကဝါ်ဂှ် ဒပ်ကံၚ်ဇြဳပၞာန် ထပ်ဂြာတ်မခတိုဟ် ဗ္တိုက်လဝ် ကဵုက္ၜၚ်ကျာ အပ္ဍဲကွာန်ဂမၠိုၚ် မၞုံလ္ပာ်သ္ကုတ်သၠုၚ်ကျာ ဍုၚ်ကအ်ကြိက် တိဍာ်ဒပ်မဟာ (၆) တံဂှ်တုဲ မခတိုဟ်တံဝွံ ဒတုံဗ္တိုဟ်ထ္ကးအာလဝ် မ္ၚးကွာန်တုဲ ဒဒှ်ရကောန်ကွာန်တံ ဇီုကပိုက်ဒးဟွံမွဲပုဟ်ဂှ် ညးဒေသတံ ဟီုရ။
ဒပ်ကံၚ်ဇြဳပၞာန် ကၠောန်သ္ပဂြာတ်ဒၟံၚ်မခတိုဟ် နကဵုက္ၜၚ်ကျာ လ္တူကွာန်ဂမၠိုၚ် မၞုံသ္ကုတ်သၠုၚ်ကျာ ဍုၚ်ကအ်ကြိက်တံဂှ် မွဲဏှမွဲဏှတုဲ ပန်ပှော်ကဵုလွဟ်ဇၞော် ကြာန်န်တံဂှ်လေဝ် မွဲဏှမွဲဏှ ကၠောန်ၜိုတ်ဒၟံၚ်ရ။
သ္အာၚ်နူတိဍာ်ဒပ်မဟာ (၆) ပွိုၚ်ဍုၚ်ကအ်ကြိက်ဂှ် ဒၞါဲကတိုၚ်ရတ်တိ မၞုံလ္ပာ်ဒေသဍုၚ်ကျာ်ပိတံဂှ်လေဝ် ဒပ်ကံၚ်ဇြဳပၞာန် စိုပ်ကၠုၚ် ကဵုက္ၜၚ်ကျာ မွဲဏှမွဲဏှတုဲ ဗ္တိုက်ဂြာတ်ဗုမ်တံဂှ် လေပ်ကၠောန်သ္ပတဴရ။
အခိၚ်လၟုဟ်ဂှ် ဒပ်ကံၚ်ဇြဳပၞာန် လလောၚ်ပ္တိတ်လဝ် အမိၚ်ပရေၚ်အုပ်ဓုပ်ပၞာန် အပ္ဍဲတိဍာ်ဒပ်မဟာ(၆) KNU ပွိုၚ်ဍုၚ်ကအ်ကြိက်၊ လှာဒကှ် ကေုာံ ပွိုၚ်ဍုၚ်ရေဝ်တံဂှ်တုဲ ပ္ဍဲကဵုတိဍာ်တံဏံဂှ် ပရေၚ်ပၞာန်ကြံၚ်မ္ၚိုဟ်ၜါလ္ပာ်တံ မွဲဏှမွဲဏှ က္တဵုဒှ်ဒၟံၚ်ရ။
ဟိုတ်နူအကာဲအရာပေါဲဗ္တိုက် မသာသ္ကာတ်မြဟ်ကၠုၚ် အပ္ဍဲတိဍာ်ဒပ်မဟာ(၆) KNU ဂှ်တုဲ လၟိဟ်ညးဍုၚ်ကွာန်ဒေသ မ္ဒးဂြိပ်ဒဴပါဲဒလေတ်ဒၟံၚ်တံဝွံ ဂၠိုၚ်နူကဵုကၠာတေံတုဲ ၜိုတ်ကဝက်ဂှ် ကလေၚ်မံၚ်တန်တဴဒၟံၚ် ဌာန်ဒၟံၚ်တံအိုတ်တုဲ ကဝက်လ္ၚဵုတံဂှ် ဆက်တုဲဒးပါဲဒလေတ်ဒၟံၚ် လ္ပာ်ဒေသဗၠးဘဲတံကဵု ပ္ဍဲဒဵုဂြိုပ်တံဖိုဟ်ဂှ် ဂွံတီကေတ် နူကဵုဂကောံညးမရီုဗၚ်ရေၚ်တၠုၚ်ကဵုဒၟံၚ် ပရေၚ်ပါဲဒဴဘဲပၞာန်တံရ။
ပရိုၚ်−သြၚ်လောန်တိုၚ်(မ်)