တယိတ်ချံၚ်၊ ဖေဖဝ်ဝါရဳ (၈)
ကြဴနူဒပ်ကံၚ်ဇြဳပၞာန် ကၠုၚ်စိုပ်ရပ်ဒက်ဏာ မၞိဟ်တြုံရဲဒေသ (၂) တၠ နူကွာန်ၚေဝ်၊ ပွိုၚ်ဍုၚ်တယိတ်ချံၚ်၊ ရးဒေသဇၞော်တၞၚ်သဳ ပ္ဍဲဂိတုဖေဖဝ်ဝါရဳ (၇) ပယျာံဂယးတုဲဂှ် ဂစိုတ်ဂယိုၚ်ထောံလဝ် ပ္ဍဲကဵုကဝက်ဂၠံၚ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တ္ၚဲဏံ ၜိုတ်အခိၚ်ပယျာံဂယး (၉) နာဍဳပြၚ်ဂှ် ဇြဟတ်ဒပ်ကံၚ်ဇြဳပၞာန် မၞုံဗ္ဒါဲ (၂၀) ကြပ်ဒဒန်မေန်တာတ် ကွာန်ရၚေဝ်တံဝွံ ကြဴနူလုပ်စိုပ်ကၠုၚ် ကွာန်ရၚေဝ်တုဲဂှ် ရပ်ဒက်ကော်ဏာလဝ် မၞိဟ်တြုံဒေသ (၂) တၠ မဆဵုပ္ဍဲဂၠံၚ်ဂှ်တုဲ ပန်ဂစိုတ်လဝ်ရ။
ဇွ မၞိဟ်တြုံဒေသ(၂) တၠ ဒပ်ကံၚ်ဇြဳပၞာန် မရပ်ဒက်ဏာတံဂှ် တ္ၚဲဏံ ပယျာံဂယး ၜိုတ်(၁၀) နာဍဳဂှ် ဂွံကလေၚ်ဆဵုလဝ် ပ္ဍဲကြပ်ဘာလကျာ်မ္ၚးကွာန် နကဵုဘဲဝပ် ဒးလဝ်မကမ်ပ္ဍဲက္ဍိုပ် သီုကဵုမချိုတ်ဒၟံၚ်ဂှ်ရ။
မၞိဟ်တြုံ (၂) တၠ ဒပ်ကံၚ်ဇြဳပၞာန် မရပ်ဂစိုတ်လဝ်တံဂှ်ဝွံ ဒှ်ကိုဝ်ဖျဵုၚါဇြဝ် ကေုာံ ကိုဝ်ပိုၚ်ဖျဵုတံတုဲ မွဲတၠဂှ် ဒှ်ကွးဘာလကျာ်တုဲ သှ်ေမွဲတၠဂှ် ဒှ်ကောန်ကလောန်ခွါတ်ထၜိုတ်ဂှ် ညးဒေသတံ သ္ဂးအိုတ်ရ။
ဇွရုပ် မချိုတ်အာတံဂှ် ကောန်ကွာန်တံ ကလေၚ်ပလံၚ်ဗစိုပ်လဝ်ကဵု ဇရေၚ်သ္ၚိကၟိန်ညးတံဂှ် ဂွံတီကေတ်ရ။
ဒပ်ကံၚ်ဇြဳပၞာန်ဝွံ ပ္ဍဲဂိတုအံက်တဝ်ဗာတုဲကၠုၚ်တေံဂှ်လေဝ် ကြဴနူလုပ်ဍိုက်ဗ္တိုက် ကွာန်တယိတ်ချံၚ်သ္ကုတ်သၟဝ်တုဲဂှ် ရပ်ဒက်ဂစိုတ်ဏာလဝ် ညးဒေသ (၂) တၠတုဲ သီုကဵုစံၚ်ပလီုဏာလဝ် သ္ၚိဒၟံၚ် (၂) မရ။
အတိုၚ်တၚ်နၚ်ဂကောံသုတေသန Southern Monitor တံဂှ်မ္ဂး အပ္ဍဲကာလဒပ်ပၞာန်သီအဝဵုဂှ် ပ္ဍဲရးဒေသဇၞော်တၞၚ်သဳဂှ် ကောန်အရာပ် (၃၆၀) ပြၚ် ချိုတ်အာလဝ်ဂှ် လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)