ဍာ်ဗု – ဖေဖဝ်ဝါရဳ(၈)
ရးဒေသတၞၚ်သဳ၊ ပွိုၚ်ဍုၚ်ဍာ်ဗု ပ္ဍဲအကြာ (၂၇)မိုၚ်ကဵု ကွာန်နှာန်ကျေဝ်ဂှ် ကွဳစက်လကျာ်မွဲဖ္ဍိုက် ဒးဒုၚ်ပန်လဝ်တုဲ ကျာ်ဇၞော် ပါကၠုၚ်ပ္ဍဲကွဳစက်ဂှ် ဒးပဝ်အာ ညးဗြဴမွဲတၠ ဒးချိုတ်အာတုဲ (၆)တၠ ဂွံလဝ်ဘဲဝပ်ရဂှ် ညးတာလျိုၚ်ဂကောံရီုဗၚ်ပရေၚ်မၞိဟ်ဒေသဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ပရေၚ်ပရောဂှ် ပ္ဍဲဂိတုဖေဖဝ်ဝါရဳ တုဲကၠုၚ် စၟတ်တ္ၚဲ (၆) အခိၚ်ဇိုၚ်သဝ်တ္ၚဲဂှ် ကွဳစက်ကျာ်ဇၞော်ဘာယာဖူကွာန်တၟိ ဍိုက်ပါဗက်ကၠုၚ် နူလပါ်ထဝါဲ ကၠုၚ်လပါ်ဍာ်ဗုကွာန်တၟိဂှ် ဂကောံရပ်လွဟ်မွဲဂကောံ ပန်ပှ်ောလဝ်ရ။
“တ္ၚဲတနေံသဝ်တ္ၚဲဂှ် ကွဳစက်လကျာ် ဒးဒုၚ်ပန်လဝ်ရ မိၚ်တုဲ အာကဵုလဝ် ရီုဗၚ်ရ။ မၞိဟ်ပါဗက်ကၠုၚ် ပ္ဍဲကွဳစက်ဂှ် (၈)တၠရ။ ပ္ဍဲကွဳစက်ဂှ် ပၞေတ်ဒးဒုၚ်ပန်လဝ် ဂၠိုၚ်ဒၟံၚ်ရ။ ကျာ်ဇၞော်ဂှ် ပဝ်အာဟဂှ်ရ။ ညးဗြဴမွဲတၠ ဒးချိုတ်လဝ်ရ။ ညးဒဳကွဳစက်ကဵု ကောန်ၚာ် ပါကၠုၚ်ပ္ဍဲကွဳစက်တအ်ဂှ် ဒးလဝ်ဘဲဝပ်ရ။ ညးပါဗက်ကၠုၚ် ပ္ဍဲကွဳစက်တအ်ဂှ် နူကဵုလပါ်မောၚ်မေဝ်ယှောၚ်ထဝါဲရ”ဂှ် ညးတာလျိုၚ်ဂကောံရီုဗၚ်ဟံၚ်ပြာ်ပရေၚ်မၞိဟ်မွဲတၠ ဟီုလဝ်ရ။
ဟိုတ်နူဒးဒုၚ်ပန်ပှော်လဝ်တုဲ ကျာ်ဇၞော်ယာဖူကွာန်တၟိ ဘာဗုဒ္ဓဘာသနရက္ခိတ နာဲဥက္ကဋ္ဌ ဂွံအာယုက် (၆၀) ကေုာံ ဒဝ်အုမ်မျေအ် အာယုက် ၆၅)သၞာံတအ် ဒးချိုတ်လဝ် ပ္ဍဲဒၞာဲဒှ်ပရေၚ်ပရောဂှ်ရောၚ် ဂွံတီကေတ်ရ။
သ္အာၚ်နူဂှ်ပၠန် ညးဒဳကွဳစက် ဥူတာန်ထိုဲ၊ မာံမိုဝ်ဒူရ။ မတေန်ရနာန်လှိုၚ်၊ မနာန်မိုးပါ ပါဗက်ကၠုၚ် ပ္ဍဲကွဳစက်ဂှ် (၆)တၠတအ်လေဝ် ဇီုကပိုက် ဂွံလဝ်ဘဲဝပ်ရဂှ် ဂွံတီကေတ်ရ။
ပရေၚ်ပန်ပှော်ဏံ နူဂကောံလဵုကၠောန်သ္ပလဝ်ရောဟီုဂှ် ဟွံဂွံလလောၚ်တြးကၠုၚ်လဝ်ဏီတုဲ ဂကောံစဵုဒၞာညးဍုၚ်ကွာန် မဆေၚ်စပ်တအ်လေဝ် ကၠောန်သ္ပဒၟံၚ် ပရေၚ်ဂၠိုက်ဂၠာဲစၟဳစၟတ်ရဂှ် ဂွံတီကေတ်ရ။
“ၜိုတ်ပိုဲတီကေတ်ဂှ်တှ်ေ ဃောကွဳစက် ကၠုၚ်ဒၟံၚ်သောၚ်သောၚ်ဂှ် ဒးဒုၚ်ပန်လဝ်ရ။ ဂကောံလဵုပန်လဝ်ရော မုဟိုတ်ဂွံပန်ရောဂှ် ညံၚ်ဂွံတီ ပိုဲဂၠိုက်ဂၠာဲအာဏောၚ်။ လတူညးမုဟွံဆေၚ်ဆက် ဒးဇီုကပိုက်ချိုတ်အာလဝ်ဂှ် ဂကောံကၠောန်ဏာလဝ်တအ် အတိုၚ်ပရေၚ်ဒးဒုၚ်လျိုၚ် ဒးကေတ်လျိုၚ်ဂှ် ညံၚ်ညးဂမၠိုၚ်ဂွံတီ ပ္တိတ်ကဵုတၚ်လလောၚ်တြးညိ” ဂှ် ညးလုပ်ကၟိန်အိန်ထံၚ် ဒးဒုၚ်ဂိလဝ်မွဲတၠ ဟီုကဵု ဌာန်ပရိုၚ်သြန်လောန်တိုၚ်(မ်)ရ။
မၞိဟ်ဒးချိုတ်အာ ဟိုတ်နူပရေၚ်ပန်ပှော်ဏံတအ်ဂှ် ဂကောံရီုဗၚ်ပရေၚ်မၞိဟ်ဒေသတအ် ပလံၚ်ဗစိုပ်ဏာလဝ် ရုၚ်ဂဥုဲကလိၚ်အံၚ်ကဵု ရုၚ်ဂဥုဲထဝါဲရဂှ် ဂွံတီကေတ်ရ။
ပ္ဍဲသၞာံ ၂၀၂၂ ဂိနဝ်ဝေမ်ဗာမံက် တုဲကၠုၚ်တေံဂှ်လေဝ်၊ ပွိုၚ်ဍုၚ်ဍာ်ဗု ဒေသနဗုလေဝ် အကြာကွာန်မူဒူကဵု ကွာန်ထုၚ်ဂျဳ ပ္ဍဲဗ္ဒာဲဒဒန်ဇြဝ်အာန် ကွာန်မူဒူဂှ် ကွဳစက်ကျာ်ဇၞော် ဒးဒုၚ်ပန်ပှော်လဝ်တုဲ ကျာ်ဇၞော်ဂှ် ဂွံလဝ်ဘဲဝပ်ရ။
ပရိုၚ်-သြၚ်လောန်တိုၚ်(မ်)
ဗီုရုပ်- CJ