လွိုၚ်ကဝ် – ဖေဖဝ်ဝါရဳ (၈)
တွဵုရးကရေၚ်ဍာဲ၊ ပွိုၚ်ဍုၚ်လွိုၚ်ကဝ် ပ္ဍဲဗ္ဒာဲကွာန်ဇြယာတ်ဖျူ ကွဳစက်ညးအရာပ်မွဲဖ္ဍိုက် ဒးလဝ်မာၚ်တုဲ ချိုတ်အာ (၄)တၠတုဲ ဂွံလဝ်ဘဲဝပ်သ္ကာတ်မြဟ် (၂)တၠရဂှ် ဂကောံပရဟိတလွိုၚ်ကဝ် ဟီုသ္ဂးလဝ်ရ။
ပ္ဍဲပရေၚ်ပရောဂှ် ဂိတုဖေဖဝ်ဝါရဳ တုဲကၠုၚ် စၟတ်တ္ၚဲ (၆) အခိၚ်ဒေါဝ်တ္ၚဲဂှ် ကွဳစက်ဂကူ IPSUM မွဲဖ္ဍိုက် မၞိဟ်တြုံဍိုက်ပါဗက်ကၠုၚ် (၆) တၠ ဒးလဝ်မာၚ်တုဲ ပ္ဍဲကဵုညးပါကၠုၚ် ပ္ဍဲကွဳစက် (၆) တၠဂှ် ဒှ်ညးအာတရဴ (၄)တၠတုဲ သှ်ေၜါတၠဂှ် ဒှ်ညးဒေသတအ်ရ။
ပ္ဍဲကဵုဒၞာဲပရေၚ်ပံက်ခတိုဟ် က္တဵုဒှ်လဝ်ဂှ် ဒှ်ဒၞာဲသ္ၚောဲတိတ်နူ ဍုၚ်လွိုၚ်ကဝ် ခရာ(၆)မိုၚ်တုဲ ကဵုဗ္ဒပ်ကံၚ်ဇြဳပၞာန် မွဲဗ္ဒပ်ဂှ်မ္ဂး သ္ၚောဲခရာၜိုတ် (၂)မိုၚ်တုဲ ကြဴနူပရေၚ်ပံက်ခတိုဟ် က္တဵုဒှ်တုဲဂှ် နူလပါ်ကံၚ်ဇြဳပၞာန် ကၠုၚ်စိုပ် ရံၚ်ကျောဝ် စၟဳစၟတ်လဝ်ဟၟဲရဂှ် ဂွံတီကေတ်ရ။
ပ္ဍဲဒၞာဲဂှ် ကံၚ်ဇြဳပၞာန် ပါံစွံလဝ်ဗုမ်တိုပ်တိ နွံဒၟံၚ်ရဂှ် ညးဒေသတအ် ဟီုဂးဒၟံၚ်အိုတ်တုဲ ကောန်ဒပ်စဵုဒၞာညးဍုၚ်ကွာန်တအ်လေဝ် ဟိုတ်နူမာၚ် ကံၚ်ဇြဳပၞာန်တုဲ ဇိုၚ်တဲဒးဆောံလေၚ်ဒၟံၚ် မွဲခဏမွဲခဏ က္တဵုဒှ်ဒၟံၚ်ရ။
ဟိုတ်နူဇီုကပိုက်ဒး မာၚ်တိုပ်တိ ခတိုဟ်လဝ်ဂှ်တုဲ ပ္ဍဲကဵုညးပါဗက်ကၠုၚ် ကွဳစက်ဂှ် ကိုဝ်အောၚ်သိုဝ်မိုဝ်၊ ကိုဝ်မေန်လာတ် ကေုာံကိုဝ်သုၚ်မေန်တအ် ဒးချိုတ်အာလဝ်တုဲ တၚ်ဂၞၚ်ညးသှ်ေသၟေဟ်ဒၟံၚ်တအ် ဟွံဂွံတီကေတ်ဏီရ။
အခိၚ်လၟုဟ်ဏံမ္ဂး ညးဇီုကပိုက် ချိုတ်အာလဝ်တအ် ပလံၚ်ဗစိုပ်ဏာလဝ် ရုၚ်ဂဥုဲလွိုၚ်ကဝ် ဂကောံရီုဗၚ်ဟံၚ်ပြာ်ပရေၚ်မၞိဟ်တအ် ပလံၚ်ဗစိုပ်ဏာလဝ်ရဂှ် ဂွံတီကေတ်ရ။
ပရိုၚ်သြၚ်လောန်တိုၚ်(မ်)
ဗီုရုပ် – CJ