ရေဝ်၊ ဖေဖဝ်ဝါရဳ (၉)
ပွိုၚ်ဍုၚ်ရေဝ်၊ တွဵုရးဍုၚ်မန် မလလောၚ်တြးလဝ် ပရေၚ်အုပ်ဓုပ်ပၞာန်ဂှ် ပပ္တံနူဂိတုဖေဖဝ်ဝါရဳ (၈) တုဲ ကံၚ်ဇြဳပၞာန် ပ္တိတ်လဝ်အမိၚ် တိတ်ဗ္တံဟွံဂွံ နူ (၆) ဗ္တံ စဵုကဵု (၆) နာဍဳဂယးဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကံၚ်ဇြဳပၞာန်ဝွံ တုဲကၠုၚ်ပ္ဍဲဂိတုဖေဖဝ်ဝါရဳ (၂) ဂှ် ကြဴနူလလောၚ်တြး နဒဒှ်ပရေၚ်အုပ်ဓုပ်ပၞာန် (Martial Law) ပွိုၚ်ဍုၚ် (၃၇) ပွိုၚ်ဍုၚ် သီုကဵုပါလုပ် ပွိုၚ်ဍုၚ်ရေဝ်တုဲဂှ် ထပ်ပပဵုပ္တိုန်လဝ်အခိၚ် အမိၚ်တိတ်ဗ္တံဟွံဂွံဂှ်ရ။
အတိုၚ်ၝောံပိုဒ် ၁၄၄ ကံၚ်ဇြဳပၞာန် မလလောၚ်ပ္တိတ်လဝ်ဂှ်မ္ဂး အပ္ဍဲပွိုၚ်ဍုၚ်ရေဝ်ဂှ် နူ (၆) နာဍဳဂယး စဵုကဵု အပ္ဍဲ (၆) နာဍဳဗ္တံဂှ် ရပ် လေံ၊ ရပ်မြလွဟ်လက်နက်ဟွံဂွံ၊ ပဵုနူမၞိဟ်မသုန်တၠတုဲ ကောံဟွံဂွံ၊ ပွမဂေတ်ဂေၚ်၊ ကောံကလောံဟီုတွံတံ ကၠောန်သ္ပဟွံဂွံ ကေုာံ ယဝ်ရဟွံဒ္ဂေတ်ဗက်မ္ဂး ကေတ်အာဒုဟ် ဗွဲမစိုပ်တရဴရောၚ် သ္ဂးလဝ်ရ။
ညးဒေသရေဝ်တံဂှ် ဟိုတ်နူကံၚ်ဇြဳပၞာန် ထပ်သၠုၚ်ပ္တိုန်ထောံ အခိၚ်တိတ်ဗ္တံဟွံဂွံတံဂှ်ရ စပ္တံနူကဵု ပရေၚ်ပိုန်ဒြပ်၊ ပရေၚ်ထတ်ယုက် ကေုာံ ပရေၚ်အာကၠုၚ်တံဒှ်တမ် အခက်အခုဲနွံကၠုၚ်ဂှ် ဟီုရ။
သ္အာၚ်နူဂှ်ပၠန် ဟိုတ်နူအမိၚ်တိတ်ဗ္တံဟွံဂွံ ကံၚ်ဇြဳပၞာန်တံဂှ်ရ ပရေၚ်စသုၚ်မံၚ်စံၚ်ဗိုက်လ္တက် ညးဒေသတံ သာခက်ခုဲကၠုၚ်မာန်တုဲ ယဝ်ရကိစ္စပရေၚ်ထတ်ယုက် အခိၚ်ဗ္တံတံ က္တဵုဒှ်ကၠုၚ်မ္ဂး ဒှ်ကၠုၚ် စဵုကဵုဒးဆောံလေၚ်လမျီုမာန်ရောၚ်ဂှ် သ္ဂးရ။
ပ္ဍဲကဵုကာလတုဲကၠုၚ်တေံဂှ် စၟတ်လဝ် အခိၚ်တိတ်ဗ္တံဟွံဂွံ ကုပွိုၚ်ဍုၚ်ရေဝ်ဂှ် နူ (၈) နာဍဳဗ္တံ စဵုကဵု (၄) နာဍဳဂယးရ။
ပွိုၚ်ဍုၚ်ရေဝ်၊ တွဵုရးဍုၚ်မန်ဝွံ ကြဴနူဒပ်ပၞာန်သီအဝဵုတုဲဂှ် ဗ္ဒိုပ်ဒပ်ကံၚ်ဇြဳပၞာန်ကဵု ဌာနမဆေၚ်စပ်တံ ဒးဒုၚ်ဗ္တိုက် မွဲဏှမွဲဏှတုဲ နကဵုအကာဲအရာအုပ်ဓလီုလဝ်တိဍာ်တံဂှ်မ္ဂး ကွာန်လ္ၚဵုတံဂှ် ဂကောံဒပ်စဵုဒၞါညးဍုၚ်ကွာန်တံ ထိၚ်ဒက်လဝ်ရ။
ပရိုၚ်−သြၚ်လောန်တိုၚ်(မ်)