ပဠဝ်၊ ဖေဖဝ်ဝါရဳ (၉)
ပ္ဍဲရးဒေသဇၞော်တၞၚ်သဳ၊ ပွိုၚ်ဍုၚ်ပဠဝ်၊ ဍုၚ်ပလ၊ ကွာန်တိုဝ်ဂှ် အပ္ဍဲပေါဲဗ္တိုက်မက္တဵုဒှ်လဝ် ပ္ဍဲဂိတုဖေဖဝ်ဝါရဳ (၇) တေံ ကောန်ဂကောံဒပ်ကံၚ်ဇြဳပၞာန် (၅) တၠ ချိုတ်အာလဝ်ဂှ် ညးဒုၚ်တာလျိုၚ် လလောၚ်ပရိုၚ် တမ်ဒပ်(၁) ခရိုၚ်ဗိက် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲကဵုတ္ၚဲဂှ် ၜိုတ်အခိၚ်လဒေါဝ်တ္ၚဲ (၂) နာဍဳ အခိၚ်ဂကောံဒပ်ပံၚ်ကောံစဵုဒၞါညးဍုၚ်ကွာန်တံ ဗက်ရေၚ်တၠုၚ် ပရေၚ်ဂီုကၠီုတိဍာ်ဂှ် ကြဴနူဆေၚ်ဒးမုက်ကဵု ဒပ်ကံၚ်ဇြဳပၞာန်တံတုဲဂှ် က္တဵုဒှ်လဝ် ပေါဲဗ္တိုက်ၜါလ္ပာ်ရ။
အပ္ဍဲပေါဲဗ္တိုက်ၜါလ္ပာ် မက္တဵုဒှ်လဝ် လလအ်ပွိုၚ် (၁) နာဍဳပြၚ်ဂှ် ဒပ်ကံၚ်ဇြဳပၞာန် မကလေၚ်ဆုတ်ကၠုၚ်တံဝွံ ဒးမာၚ်တုဲ သီုကဵုပါလုပ် ကဆံၚ်ဗိုလ်ဇၞော် ကောန်ဒပ်ကံၚ်ဇြဳပၞာန် (၅) တၠ ချိုတ်အာလဝ်ဂှ် သ္ဂးရ။
ကြဴနူပေါဲဗ္တိုက်ဂှ်တုဲ နူကဵုဒပ်အမၠံက် ကံၚ်ဇြဳဖျေံသ္ဇိုၚ် ပွိုၚ်ဍုၚ်ပဠဝ်ဂှ် ပန်ပှော်ဗ္တိုက်ဒၟံၚ် ကွာန်တိုဝ် နကဵုလွဟ်ဇၞော် ဟွံပိုတ်သ္ကုတ်ဂှ် ဂွံတီကေတ်ရ။
ပ္ဍဲကဵုကွာန်တိုဝ် ဍုၚ်ပလဂှ် ဟိုတ်နူပေါဲဗ္တိုက်တံ က္တဵုဒှ်ဒၟံၚ် မွဲဏှမွဲဏှဂှ်ရ ဒးဂြိပ်ဒဴပါဲဒလေတ်ဒၟံၚ် အလုံကွာန်မွဲတုဲ ပ္ဍဲကဵုဂိတုတုဲကၠုၚ်တေံဂှ်လေဝ် ဒပ်ကံၚ်ဇြဳပၞာန် စံၚ်ပလီုဏာလဝ် သ္ၚိဒၟံၚ်ညးဒေသ ဟွံအောန်နူကဵု (၅) မရ။
ပ္ဍဲကဵုရးဒေသဇၞော်တၞၚ်သဳ၊ ပွိုၚ်ဍုၚ်ပဠဝ်ဂှ် ပေါဲဗ္တိုက်အကြာဒပ်ကံၚ်ဇြဳပၞာန်ကဵု ဂကောံဒပ်ပံၚ်ကောံစဵုဒၞါညးဍုၚ်ကွာန်တံ က္တဵုဒှ်ဒၟံၚ်မွဲဏှမွဲဏှတုဲ ပရေၚ်ပၞာန်ၜါလ္ပာ်တံလေဝ် ဆက်ကြံၚ်မ္ၚိုဟ်ဒၟံၚ်ရ။
ပရိုၚ်−သြၚ်လောန်တိုၚ်(မ်)