ဍာ်ဗု၊ ဖေဖဝ်ဝါရဳ (၁၀)
ရးဒေသဇၞော်တၞၚ်သဳ၊ ပွိုၚ်ဍုၚ်ဍာ်ဗု၊ အကြာကွာန်နှာန်ကျေဝ် ကေုာံ ၂၇ မိုၚ်ဂှ် ဟိုတ်နူပန်ဗၠေတ်ဒးအာ ကွဳစက်လကျာ်မွဲဖ္ဍိုက်ဂှ်ရ ဒဒှ်ရဒုၚ်ဂုဏ်ဇအ်သဝ် လ္တူညးမဒးဂိလဝ်တံဂှ် ဂကောံဒပ်စဵုဒၞါညးဍုၚ်ကွာန်ပွိုၚ်ဍုၚ်ဍာ်ဗု (YPPDF) ပ္တိတ်လဝ်လိက်ဒုၚ်ဂုဏ် ပ္ဍဲဂိတုဖေဖဝ်ဝါရဳ (၉) တေံရ။
ပ္ဍဲကဵုပရေၚ်ပရူဂှ်ဂှ် အတိုၚ်ပရိုၚ်မကလိဂွံလဝ် ကောန်ဒပ်ကံၚ်ဇြဳပၞာန် နူတမ်ဒပ်ဖျေံသ္ဇိုၚ် ကလိန်အံၚ်တံဝွံ ကၠုၚ်ဒၟံၚ်ကဵုကွဳစက်ဟိုက်ဂျက် (၂) ဖ္ဍိုက် နကဵုကယျိုၚ်ကောန်အရာပ်ဂှ်တုဲ အခိၚ်မဗ္တိုက်ပါမ်မံၚ်မာၚ် လ္တူဂၠံၚ်ကွဳစက်ရေဝ်−ထဝါဲဂှ် ကွဳစက်ကောန်အရာပ် လုပ်စိုပ်ကၠုၚ်အကြာဂှ် ဟွံဂွံပသတိမွဲသာ် ဗ္တိုဟ်ထ္ကးဒးလဝ်မာၚ်ရောၚ်ဂှ် သ္ဂးရ။
ပ္ဍဲကဵုပရေၚ်ဗ္တိုဟ်ထ္ကးမာၚ်ဏံဂှ် ကျာ်ဇၞော်မွဲဇကု နူဘာယာဖူယာကွာန်တၟိ မဍိုက်ပါဗက်ကၠုၚ် လ္တူကွဳစက်ဂှ် ပဝ်အာတုဲ၊ မၞိဟ်ဗြဴမွဲတၠ ချိုတ်တုဲ သီုကဵုပါလုပ် ညးဒဳကွဳစက်ဂှ် (၆) တၠ ကလိဂွံလဝ်ဝပ်ရ။
ကြဴနူဗ္တိုက်ဗ္တိုဟ်မာၚ်တုဲဂှ် ကွဳစက်ဇီုကပိုက်ဒးအာဂှ်ဝွံ ဒှ်ဒၟံၚ်ကွဳစက်ကောန်အရာပ်တုဲ သွက်ဂွံကၠောန်ကဵု ပရေၚ်ရီုဗၚ်ဟံၚ်ပြာ်တံဂှ် ဂ္စါန်လဝ်ကီုလေဝ် ဒၟါနူအခက်အခုဲနာနာသာ်တုဲ ဆၜိုတ်ဂွံကဵုလဝ်ပရိုၚ် ကုဂကောံရီုဗၚ်ပရေၚ်မၞိဟ် မဆေၚ်စပ်တံဓဝ်ရဂှ် သ္ဂးရ။
သွက်ပရေၚ်ပရူဏံဂှ် နကဵုဂကောံဒပ် YPPDF တံ ဒဒှ်ရဒုၚ်ဂုဏ် ကုညးမဒးဂိလဝ်တံသီုဖအိုတ် နကဵုပွမဒုၚ်လျိုၚ် ကေတ်လျိုၚ် ပေၚ်ၚ်ဂှ်ကီု ဗွဲကြဴ ညံၚ်လၟေၚ်ဒဒှ်လအာတုပ်သာ်ဏံ ဂွိုအ်က္တဵုဒှ်ဂှ် စွံသတိရေၚ်တၠုၚ်အာရောၚ် လလောၚ်ပ္တိတ်လဝ်ရ။
ဂကောံဒပ် YPPDF ဝွံ ဒှ်ဂကောံဒပ်စဵုဒၞါဒေသ ဖျေံသ္ဇိုၚ်ပွိုၚ်ဍုၚ်ဍာ်ဗုမွဲတုဲ သီုကဵုဒှ်ဂကောံဒပ် မပံၚ်တောဲရေၚ်တၠုၚ်ဒၟံၚ်ကဵု ဂကောံပၠန်ဂတးအဖဝ်မိတ်တံ မပ္တံကဵု ဗ္တိုက်ရေၚ်ကွဳစက်ကံၚ်ဇြဳပၞာန်တံ၊ ပသောၚ်ညးမကဵုပရိုၚ်ကံၚ်ဇြဳပၞာန်တံရ။
ပရိုၚ်−သြၚ်လောန်တိုၚ်(မ်)