ကဝ်တူလေဝ်၊ ဖေဖဝ်ဝါရဳ (၁၀)
အပ္ဍဲကာလဒပ်ပၞာန်သီအဝဵု ပွိုၚ်ၜါသၞာံပြၚ်ဂှ် ပ္ဍဲတိဍာ်အုပ်ဓုပ် ကဝ်တူလေဝ် KNU ဂှ် အကြာဒပ်ကံၚ်ဇြဳပၞာန်ကဵု ဂကောံဒပ်သၟဝ်တဲ KNU တံဂှ် ပေါဲဗ္တိုက်အပံၚ် (၈၀၀၀) ပြၚ် က္တဵုဒှ်လဝ်ရောၚ် ဗော်သွးကောန်ဂကူကရေၚ်ဗဟဵု KNU လလောၚ်ပ္တိတ်လဝ် ပ္ဍဲဂိတုဖေဖဝ်ဝါရဳ (၉) တေံရ။
နူသၞာံ ၂၀၂၁ ဂိတုဖေဖဝ်ဝါရဳ ဒပ်ပၞာန်သီလဝ်အဝဵု စဵုကဵုဂိတုဖေဖဝ်ဝါရဳ (၁) သၞာံဏံ အပ္ဍဲပွိုၚ်ၜါသၞာံဂှ် ဒပ်ကံၚ်ဇြဳပၞာန် သွက်ဂွံအုပ်ဓုပ်တိဍာ်မာန် ပ္ဍဲကဵုတိဍာ်အုပ်ဓုပ်ကဝ်တူလေဝ်ဂှ် သၠဲပ္တိုန်ဇြဟတ်ဒပ်တံ၊ ချဳဒရာၚ်ပရေၚ်ပၞာန်တံဂှ် သာကၠောန်ကၠုၚ် ဟွံပိုတ်သ္ကုတ်ဂှ်ရ ပေါဲဗ္တိုက်ဆေၚ်မုက်တံ က္တဵုဒှ်ဒၟံၚ် အရိုဟ်ဒဒှ်တ္ၚဲရ။
အပ္ဍဲပေါဲဗ္တိုက်ၜါလ္ပာ် ဒပ်ကံၚ်ဇြဳပၞာန်တံကဵု ဂကောံဒပ်စဵုဒၞါကောန်ဂကူကရေၚ် KNDO ၊ ဒပ်ပၞာန်ဗၠးၜးကောန်ဂကူကရေၚ် သၟဝ်တဲ KNU တံဂှ် လ္ပာ်ဒပ်ကံၚ်ဇြဳပၞာန်တံ မၞိဟ်မဒးချိုတ်အာ (၆၈၇၆) တၠ ကေုာံ မၞိဟ်ကလိဂွံဝပ် (၅၅၁၉) တၠ နွံလဝ်ဂှ် သ္ဂးရ။
အပ္ဍဲဒပ်ပၞာန်သီလဝ်အဝဵု ပွိုၚ် (၂) သၞာံဂှ် ပ္ဍဲတိဍာ်အုပ်ဓုပ်ကဝ်တူလေဝ်ဂှ် ခရိုၚ်ဒှ်ပေါဲဗ္တိုက်သ္ကာတ်မြဟ်အိုတ်ဂှ်ဝွံ ဒှ်ခရိုၚ်ဘာပန် KNU တိဍာ်ဒပ်မဟာ(၅) တုဲ ပ္ဍဲကဵုခရိုၚ်ဏံဂှ် ပေါဲဗ္တိုက်အပံၚ် (၅၆၃၈) ဝါ က္တဵုဒှ်လဝ်တုဲ လ္ပာ်ကံၚ်ဇြဳပၞာန်ဂှ် (၂၇၆၀) တၠ ချိုတ်တုဲ (၂၃၄၀) တၠ ဇီုကပိုက်ကလိဂွံလဝ်ဝပ်ဂှ် ထ္မံက်ထ္ၜးပါလုပ် ပ္ဍဲကဵုတၚ်လလေၚ်တြးဂှ်ရ။
ပ္ဍဲကဵုခရိုၚ်ကေအာန်ယူတၞဟ်ဟ်ဂမၠိုၚ် မပ္တံကဵု ခရိုၚ်သဓီု၊ ခရိုၚ်တံၚ်ဥူ၊ ခရိုၚ်ညံၚ်လေဝ်ပေန်၊ ခရိုၚ်ဗိက်ထဝါဲ ကေုာံ ခရိုၚ်ဒူပလာယာတံဂှ်လေဝ် ပေါဲဗ္တိုက်တံ က္တဵုဒှ်လဝ်တုဲ အပ္ဍဲခရိုၚ် (၅) ဏံဂှ် လ္ပာ်ကံၚ်ဇြဳပၞာန် မၞိဟ်ချိုတ် (၄၁၁၆) တၠ ကေုာံ မၞိဟ်ဇီုကပိုက်ကလိဂွံဝပ် (၃၁၇၉) တၠ နွံဂှ် ဂွံတီကေတ်ရ။
အပ္ဍဲပေါဲဗ္တိုက် ပွိုၚ်ၜါသၞာံဂှ် လ္ပာ်ကရောၚ်ပၞာန်ဂမၠိုၚ်၊ ဂကောံဒပ်ဒရုၚ်ဂမၠိုၚ်၊ ဂကောံဒပ်စဵုဒၞါညးဍုၚ်ကွာန်ဂမၠိုၚ် မၞုံသၟဝ်ပၠတရဴပရေၚ်ပၞာန် KNLA, KNDO တံဂှ် (၂၁၉) တၠ ပြဟ်လလုဲအာလဝ်တုဲ (၆၀၅) တၠ ဇီုကပိုက်ကလိဂွံလဝ်ဝပ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြး KNU ဂှ်ရ။
သွက်ဂွံဗ္တိုက်သၠေက် ထပိုတ်ရိုဟ်ကၞက် သၞောတ်တၠအဝဵုပၞာန်ဂှ် ပွမကောံကလောံညဳသာ ကေုာံ ပွကလၚ်အမိၚ်တံဂှ်ဝွံ ဒှ်အရာပၟိက်ဇၞော်အိုတ်တုဲ ဒၟါနူသၞောတ်တၠအဝဵုပၞာန် ဟွံပြဟ်ဒတုံဏီဂှ်ရ ဆက်ဒးလုပ်အာပေါဲဗ္တိုက်ပၠန်ဂတးရောၚ်ဂှ် ဗော်သွးကောန်ဂကူကရေၚ် KNU လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)