ထဳလေန် -ဖေဖဝ်ဝါရဳ (၁၀)
ရးဒေသမဂွေ၊ ပ္ဍဲပွိုၚ်ဍုၚ်ထဳလေန်ဂှ် ညးထံၚ်ပရိုၚ်ကံက်ဇြဳပၞာန် အာကၠုၚ်ချဳဒရာၚ်ဒၟံၚ် နကဵုကယျိုၚ်ညးအရာပ်တအ် အခိၚ်ရပ်ကေတ်ဂွံဂှ် ဟိုတ်နူဂြိပ်တိတ်အာတုဲ ပန်ပှော်ရပ်ဂွံလဝ် လမျီုအိုတ်တ်ရဂှ် က္ဍိုပ်သ္ကိုပ်ဂကောံ YRA တခေန်ဇြဝ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ပ္ဍဲဂိတုဖေဖဝ်ဝါရဳ တုဲကၠုၚ် စၟတ်တ္ၚဲ (၇) ဂှ် ပ္ဍဲကဵုဗ္ဒပ်ကၚ်စၟဳစၟတ် Yaw Revolution Army မွဲဗ္ဒပ်ဂှ် ရပ်ဂွံလဝ်တုဲ ဟိုတ်နူဂြိပ်တိတ်အာဂှ်ရ ပန်ပှော်ပသောၚ်သ္အးလဝ်ရဂှ် ဟီုသ္ဂးလဝ်ရ။
ဍေံတအ်ဂှ် ဒှ်ကောန်ဒပ် ခလရ (၅၅) ဖျေံသ္ဇိုၚ်ဂဂဝ် (၂)တၠကဵု ညးဗြဴတွဳဗွိုၚ်ပျူသဝ်ထဳ ပ္ဍဲလတူဍုၚ်ထဳလေန် မွဲတၠရဂှ် ဂွံတီကေတ်ရ။
“ဂုဏ်နူအခိၚ်စၟဳစၟတ်လအ်အာတုဲ ယဝ်ရဍေံတအ်မံၚ်ကဵု ၜိုဟ်ဟ်သြိုဟ်ဟ်နကဵုပရေၚ်ကၠိုဟ်ခၠၚ်တှ်ေ ဟွံပျဲပျာံပုဟ်ဟီုတုဲ ပ္ညဳလဝ်ဂှ် ပြေပြံၚ်ဒၟံၚ်ရ။ ဒၟာနူဂှ်ရ သှ်ကဵုလဝ်ဇုက်တုဲ သီုဗ္စကဵုလဝ်ပုၚ်ဏီ၊ အခိၚ်ဗ္စပုၚ်တုဲဂှ် နဒဒှ်ခါတ်အကာဲတုဲ ပါဲဓလေတ်ကဵုလဝ်ဂှ် ဂြိပ်တိတ်အာ မွဲတဲဓဝ်ရ။ ဟိုတ်ဂှ်ရ ပန်ကဵုလွဟ်တုဲ ဒးရပ်ကေတ်ရ” ဂှ် တခေန်ဇြဝ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
သ္အာၚ်နူဏံပၠန် အခိၚ်ပန်ပှော်ရပ်ကေတ်လဝ် လွာဲဂှ် ဒးချိုတ်အာလဝ် (၂)တၠတုဲ သှ်ေ(၁)တၠဂှ်မ္ဂး ဃောလွဳလွတ်ကဵုဒၟံၚ် ဘဲဝပ်လွဟ် ဒးချိုတ်အာလဝ်ရဂှ် ညးဟီုသ္ဂးလဝ်ဏီရ။
ညးဒးဒုၚ်ပန်ပှော်တုဲ ရပ်ကေတ်လဝ်တအ်ဂှ် ဒှ်မၞိဟ်စိုပ်ကၠုၚ် နကဵုတၚ်ထ္ၜးဟိုတ် ကၠတ်ဓရိပ်ဏာဗြဴရဂှ် ဂွံတီကေတ်လဝ်ရ။
ကြဴနူကဵုပရိုၚ်ညးတအ်ဒးဒုၚ်ရပ်လဝ် ပြးတိတ်အာတုဲ ကောန်ဒပ်ကံၚ်ဇြဳပၞာန်တအ် စၟဳစၟတ်ကၠုၚ် ပ္ဍဲဂၠံၚ်လုပ်ဍုၚ်ထဳလေန်၊ ပရေၚ်စၟဳစၟတ်ညးဍုၚ်ကွာန် ပ္ဍဲဍုၚ်တအ် ကေုာံစၟဳစၟတ်ကၟိန်အိန်ထံၚ် ပျူသဝ်ထဳညးဗြဴဒးဒုၚ်ပသောၚ်သ္အးလဝ်တအ်ရဂှ် ဂွံတီကေတ်ရ။
YRA-ထဳလေန်ဂှ် ညးဒးချိုတ်အာလဝ်တအ်ဂှ် စံၚ်ကဵုလဝ်ဇွ ဂြကဵုလဝ်ဇုတ် အတိုၚ်အခိုက်ကၞာပြဝေဏဳဗုဒ္ဓဘာသာခိုဟ်ဟ်တၟိုဟ်ဟ်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ပွိုၚ်ဍုၚ်ထဳလေန်ဂှ် ကံၚ်ဇြဳပၞာန်လလောၚ်တြးလဝ် ပရေၚ်အုပ်ဓုပ်ပၞာန်တုဲ မၞိဟ်ထံၚ်ပရိုၚ်ကံၚ်ဇြဳပၞာန် ချဳဓရာၚ်အာကၠုၚ်ဒၟံၚ် နကဵုကယျိုၚ်ပၞာန်တအ်ဂှ်လေဝ် ချဳဒရာၚ်ဒၟံၚ်ဂှ်ရ နကဵုညးဍုၚ်ကွာန်တအ် ယဝ်ရဆဵုဂဗအရာထေက်ကဵုဒှ်သၠေဟ်ပၟာမ္ဂး သွက်ဂွံကဵုပရိုၚ် ကုဂကောံပရေၚ်စဵုဒၞာမဆေၚ်စပ်တအ်ဂှ် YRA -ထဳလေန် ကဵုလဝ်သမ္တီရ။
ပရိုၚ်-သြၚ်လောန်တိုၚ်(မ်)
ဗီုရုပ် – YRA