နေပျဳဒဝ်-ဖေဖဝ်ဝါရဳ (၁၀)
ပရေၚ်ကံၚ်ဇြဳပၞာန်သီအဝဵု ကံက်ကေတ်စရၚ်မၞိဟ်ဂှ် ညးဍုၚ်ကွာန်လ္ၚဵုတအ် ပါလုပ်ပံၚ်တောဲ ၜိုန်ရဟၟဲကီုလေဝ် အတိုၚ်အလုံမွဲကၟိန်ဍုၚ်ဂှ် ကံက်ကေတ်လဝ်စရၚ်မၞိဟ် (၈၇)တၟံကၠံ မာန်ကၠုၚ်လဝ်ရဂှ် ဌာနဝန်ဇၞော်ပရေၚ်ကောပ်ကာဲမၞိဟ်လုပ်တိတ် ကေုာံဇြဟတ်ညးဍုၚ်ကွာန် ကံၚ်ဇြဳပၞာန် ဟီုသ္ဂးလဝ်ရ။
ထ္ၜးဟိုတ်ကဵုစရၚ်မၞိဟ်တုဲ ကံၚ်ဇြဳပၞာန် ကံက်ကေတ်ဒၟံၚ်စရၚ်မာဲ ပ္ဍဲကဵုဂိတုဂျာန္နဝါရဳ တုဲကၠုၚ်တေံ စဵုကဵုပွိုၚ် (၂၀)တ္ၚဲရ။
ပ္ဍဲကဵုဒေသပရေၚ်ပၞာန် ကြံၚ်မ္ၚိုဟ်ဒၟံၚ်လၟုဟ်ဏံဂှ် ကံက်ကေတ်စရၚ်ဟွံမာန်ဏီတုဲ ပရေၚ်ဟီုဂးကံက်ကေတ်လဝ်စရၚ် အတိုၚ်အလုံမွဲကၟိန်ဍုၚ် (၈၇) တၟံကၠံမာန်လဝ်ဂှ် ဒှ်ပရေၚ်လီဠာန်သက်က် ဒှ်မာန်ရဂှ် ညးမၚ်ရံၚ်ခါတ်အကာဲ ပေါဲရုဲမာဲမွဲတၠ ဟီုသ္ဂးလဝ်ရ။
“ပ္ဍဲအခိၚ်အကာဲအရာပကတိတေံလေဝ် ဂွံကံက်ကေတ်ဂွံၜိုတ်ဂလိုၚ်ဂှ် ဟွံလောဲပုဟ်၊ ကဵုအကာဲအရာလၟုဟ်ဏံ ကံက်ဂွံဂလိုၚ်ဏံဟီုဂှ် ဍေံတအ်လီဒၟံၚ်ရ မိက်ဂွံဟီုရ” ဂှ် ညးမၚ်ရံၚ်ခါတ်အကာဲ ပေါဲရုဲမာဲမွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ဂကောံဇြဟတ်ပရေၚ်ပၠန်ဂတးတအ်လေဝ် ညံၚ်ဟွံဂွံပါလုပ် ပ္ဍဲပရေၚ်ကံၚ်ဇြဳပၞာန် ကံက်ကေတ်စရၚ်မၞိဟ်ဂှ်တုဲ သွက်ဂွံဒစဵုဒစးအာဂှ် ဟီုဆဝ်ပ္ၚုဟ်လဝ်တုဲ ညးဍုၚ်ကွာန်တအ်လေဝ် ပါလုပ်ပူဗိုၚ်လဝ် ဟၟဲရောၚ်ဂှ် ဂွံတီကေတ်ရ။
ဝန်ဇၞော် လဝကကံၚ်ဇြဳပၞာန် ဥူမျကျိုၚ်ဂှ်မ္ဂး သွက်ဂွံကံက်ကေတ်စရၚ်မၞိဟ် အိန်ထံက်သှ်ေသၟေဟ်ဒၟံၚ်တအ်ဂှ် စဳဇန်ဒၟံၚ် သွက်ဂွံဆက်ကံက်အာရဂှ် ဟီုသ္ဂးလဝ်ရ။
အခိၚ်ကံၚ်ကေတ်ဒၟံၚ်စရၚ်မၞိဟ်ဂှ် သ္ကိုပ်အုပ်ဓုပ်အရာပ်/ကွာန် ကံၚ်ဇြဳပၞာန်ခါန်ကၞက်လဝ်တအ်ကီု သီုကဵုဂကောံအုပ်ဓုပ် ဗ္ဒာဲၜိုတ် (၁၀)တၠပြၚ် ဒးဒုၚ်ပန်ဂစိုတ်လဝ်နွံဒၟံၚ်ရဂှ် ဂွံတီကေတ်ရ။
အတိုၚ်စရၚ်သ္ဂာဗ္တံ သၞာံ ၂၀၁၄ ဂှ်မ္ဂး ပ္ဍဲကၟိန်ဍုၚ်ဗၟာ ကၟိန်အိန်ထံၚ် ဗ္ဒာဲ (၁၁)ပြကောဋိကိုတ် နွံဒၟံၚ်ရဂှ် ဓမံက်ထ္ၜးလဝ်ရ။
ပရိုၚ်-သြၚ်လောန်တိုၚ်(မ်)