ပဠဝ်၊ ဖေဖဝ်ဝါရဳ (၁၄)
ရးဒေသဇၞော်တၞၚ်သဳ၊ ပွိုၚ်ဍုၚ်ပဠဝ်၊ ဂကောံကွာန်ကျောက်လုမ်ဂျဳ၊ ပ္ဍဲကွာန်ညောၚ်ယှေန်ကုမ်ဂှ် ဂကောံအိန်ထံၚ် မွဲသ္ၚိကၟိန် (၇) တၠ ပါလုပ် သီုကောန်ၚာ်အာယုက် (၁) သၞာံ ဒးဒုၚ်ဂစိုတ်လဝ်ရဂှ် ညးဒေသဂမၠိုၚ်ကီု သီုကဵုဒပ်စဵုဒၞာညးဍုၚ်ကွာန်တအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ပ္ဍဲဂိတုဖေဖဝ်ဝါရဳ တုဲကၠုၚ် စၟတ်တ္ၚဲ (၁၁) အခိၚ်ဗ္တံ ၜိုတ်(၁၁) နာဍဳဂှ် သ္ၚိသ္ကိုပ်အုပ်ဓုပ်ကွာန် ဥူမျေအ်အောၚ် ကွာန်ညောၚ်ယှေန်ကုမ်ဂှ် ဂကောံမၞိဟ်ရပ်လွဟ် မွဲဂကောံ စိုပ်ကၠုၚ်တုဲ ပန်ဂစိုတ်ဏာ ဂကောံကၟိန်အိန်ထံၚ် ညး (၇) တၠ ပါလုပ် သီုကောန်ၚာ်ဂှ်ရ။
ဟိုတ်နူဒးဒုၚ်ပန်ဂစိုတ်လဝ် နကဵုလွဟ်သေနာတ်တုဲ သမ္ဘာသ္ကိုပ်အုပ်ဓုပ်၊ ကောန်ဝုတ်ညး ကေုာံ ကောန်စဴညးဂမၠိုၚ် ဒးချိုတ်အာလဝ်တုဲ သ္ကိုပ်အုပ်ဓုပ်ဂှ် ဟၟဲဒၟံၚ် ပ္ဍဲသ္ၚိညးရဂှ် ဂွံတီကေတ်ရ။
ဟိုတ်နူဒးဒုၚ်ပန်လဝ် နကဵုလွဟ်သေနာတ်တုဲ ကောန်စဴညး မောၚ်တာတာ (၁)သၞာံ၊ မိမေဇြေန်ဖျူ (၆)သၞာံ၊ မောၚ်သိုဝ်မေန်ပိုၚ် (၁၃)သၞာံ၊ မောၚ်ဇေယျာအောၚ် (၁၆) သၞာံ မောၚ်နေထိတ်တုၚ် (၁၇) သၞာံ ကေုာံကောန်ဝုတ်ညး ဒဝ်တာန်တာန်မဝ်၊ သမ္ဘာညး ဒဝ်ကျေန်နွတအ် ဒးချိုတ်အာလဝ်ရ။
ညးတာလျိုၚ်လလောၚ်ပရိုၚ် ခရိုၚ်ဗိက် တံဒပ်(၁) ဂှ်မ္ဂး ဂဗုတ်ဂကောံသ္ၚိကၟိန် သ္ကိုပ်အုပ်ဓုပ် ဒးဒုၚ်ဂစိုတ်လဝ်ဏံဂှ် ဂကောံစဵုဒၞာညးဍုၚ်ကွာန်တအ် ဂစိုတ်လဝ်ဟွံသေၚ်တုဲ သွက်ပရေၚ်ပရောဏံ ဆက်ဂၠိုက်ဂၠာဲစၟဳစၟတ်ဒၟံၚ် ညးကၠောန်သ္ပလဝ်ရဂှ် ဟီုသ္ဂးလဝ်ရ။
ပ္ဍဲလတူဂကောံကၟိန်အိန်ထံၚ် (၇) တၠ မၞိဟ်ဗြဴကီု သီုကဵုကောန်ၚာ်သၟတ်အာယုက်ဟွံပေၚ် မပါလုပ်တအ် ဒးချိုတ်အာလဝ်တုဲ ဒဒှ်ရစိုတ်ဟွံမိပ်ကီု ပ္ဍဲလတူပရေၚ်ပြိုက်ဂစိုတ်ဏာ ကြာန်န်ဓဇန်ဓဇန် ဗီုဏံဂှ် ဒဒှ်ရပျုတ်ဗ္ဒေက်အာ သ္ကာတ်တ်မြဟ်ဟ်ရဂှ် ခရိုၚ်ဗိက် တံဒပ် (၁) လလောၚ်တြးလဝ်ရ။
ပ္ဍဲကဵုတေဝ်လဳဂရာမ် ညးထံက်ဂလာန်ကဵု ကံၚ်ဇြဳပၞာန်ဂမၠိုၚ်ဂှ်မ္ဂး ဒပ်စဵုဒၞာညးဍုၚ်ကွာန်တအ် ပြိုက်ဂစိုတ်လဝ် ဂြောဝ်ဂတာ ဂကောံသ္ၚိကၟိန် သ္ကိုပ်အုပ်ဓုပ်တအ်ရဂှ် ဟီုဂးစောတ်စောဲလဝ်ရ။
အတိုၚ်တၚ်ဂၞၚ် Southern Monitor မဒှ်ဂကောံသုတေသန မွဲဂကောံဂှ်မ္ဂး ပ္ဍဲကဵုရးဒေသဇၞော်တၞၚ်သဳဂှ် ပ္ဍဲမွဲပွိုၚ်ဒပ်ပၞာန် သီကေတ်အဝဵု ပွိုၚ် (၂) သၞာံဂှ် ကောန်အရာပ် (၃၆၀)တၠပြၚ် ဒးဒုၚ်ဂစိုတ်လဝ်ရဂှ် လလောၚ်တြးလဝ် ပ္ဍဲဂိတုဖေဖဝ်ဝါရဳ မံက်ဂှ်ရ။
ပရိုၚ်-သြၚ်လောန်တိုၚ်(မ်)