ၜဳကလေၚ်၊ ဖေဖဝ်ဝါရဳ(၁၄)
ပ္ဍဲတွဵုရးဍုၚ်မန်၊ ပွိုၚ်ဍုၚ်ၜဳကလေၚ်၊ ပ္ဍဲကဵုကွာန်မိကျောၚ်အိုၚ် ဟိုတ်နူကံၚ်ဇြဳပၞာန် ပန်ဖျေံလွဟ်ဇၞော်တုဲ တၠဂုဏ် (၂)ဇကုကီု သီုထပိုဲ (၁) ဇကု ဇီုကပိုက်ဂွံလဝ်ဘဲဝပ်ရဂှ် ဗော်သွးကောန်ဂကူကရေၚ် KNU ခရိုၚ်သဓီု လလောၚ်တြးလဝ် ပ္ဍဲဂိတုဖေဖဝ်ဝါရဳ စၟတ်တ္ၚဲ(၁၃)ဂှ်ရ။
နူဒပ်ပၞာန်တိုက်ကံၚ်ဇြဳပၞာန် ဖျေံသ္ဇိုၚ် ပွိုၚ်ဍုၚ်သဓီု ခမရ-၉ ဂှ် ပ္ဍဲဂိတုဖေဖဝ်ဝါရ တုဲကၠုၚ် စၟတ်တ္ၚဲ (၁၁) အခိၚ်ဗ္တံ ၜိုတ် (၈)နာဍဳဂှ် ဟိုတ်နူပန်ဖျေံလွဟ်ဇၞော် ပ္ဍဲကွာန်မိကျောၚ်အိုၚ် (၄) မတုဲ ဒတုံစှ်ေခတိုဟ်အာလဝ် ပ္ဍဲကဵုဘာလကျာ် ကွာန်မိကျောၚ်အိုၚ်ရ။
ဟိုတ်နူလွဟ်ဇၞော် ဒတုံစှ်ေခတိုဟ်အာလဝ်တုဲ ထပိုဲတေဝံသ၊ အာယုက်(၁၁)သၞာံ၊ နာဲသောမန အာယုက် (၅၆)သၞာံ ကေုာံနာဲပဏ္ဍိတ အာယုက် (၇၁)သၞာတအ် ဇီုကပိုက် ဒးလဝ်ဘဲဝပ်မကမ်ရ။
ကောန်ထပိုဲ ခမဳဂွံလဝ်ဘဲဝပ် လွဟ်ဇၞော်တအ်ဂှ် ပလံၚ်ဗစိုပ်ဏာလဝ် ရုၚ်ဂဥုဲကြပ်ညောန်တအ်ရဂှ် ဥက္ကဋ္ဌ ကဝ်မတဳ ကောပ်ကာဲပရေၚ်မိတ် KNU ခရိုၚ်သဓီု ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
သ္အာၚ်နူဂှ်ပၠန် ပရေၚ်ဒပ်ကံၚ်ဇြဳပၞာန် ပန်ဖျေံဒၟံၚ်လွဟ်ဇၞော် ပ္ဍဲကွာန် သီုပေါဲဗတိုက်ဟၟဲမွဲသာ်ဂှ် ဒှ်ဒုဟ်ရာဇဝတ် က္လိလောန်ဒၟံၚ် လတူကောန်အရာပ်တုဲ နကဵုကံၚ်ဇြဳပၞာန် သွက်ဂွံတန်ဒေါံအာ ကမၠောန်ပြဝဏံပြဟ်ဟ် နွံဒၟံၚ်ပၟိက်ရဂှ် ညးဟီုသ္ဂးလဝ်ရ။
တံဒပ်ကံၚ်ဇြဳပၞာန် ဖျေံလဝ်သ္ဇိုၚ် ပ္ဍဲပွိုၚ်ဍုၚ်သဓီုတအ်ဂှ် ဟိုတ်နူပန်ဖျေံဒၟံၚ်လွဟ်ဇၞော် ပ္ဍဲကွာန်တအ် အရိုဟ်ဒဒှ်တ္ၚဲတုဲ ညးဒေသဂမၠိုၚ် ဒးဒှ်ဒၟံၚ်ဂဝိၚ် ဂွိၚ်ဂွာဲဖေက်လကိုတ်ဒၟံၚ်ကီု ညးဂြိပ်ပါဲဒဴဒၟံၚ်တအ်လေဝ် နွံဒၟံၚ်ရဂှ် KNU ခရိုၚ်သဓီု လလောၚ်တြးလဝ်ရ။
ပ္ဍဲဂိတုဖေဖဝ်ဝါရဳ စၟတ်တ္ၚဲ (၁၀) ဂှ်လေဝ် ဟိုတ်နူဒပ်အမၠံက်ကံၚ်ဇြဳပၞာန် ဖျေံသ္ဇိုၚ်ဍုၚ်လၟိုၚ်၊ တွဵုရးဍုၚ်မန် ပန်ဖျေံဏာလွဟ်ဇၞော်တုဲ ကောန်ထပိုဲ နူကွာန်သုဇြဳမျာၚ်မွဲဇကု ဒးပဝ်အာလဝ်နွံတုဲ၊ တၠဂုဏ်အာယုက် (၆၀) မွဲဇကုလေဝ် ဇီုကပိုက် ဂွံလဝ် ဘဲဝပ်ရ။
ပရိုၚ်-သြၚ်လောန်တိုၚ်(မ်)