ၜၚ်ကံက်၊ ဖေဖဝ်ဝါရဳ (၁၄)
ပ္ဍဲဂိတုဖေဖဝ်ဝါရဳ (၁၄) အပ္ဍဲအခိၚ်မကၠောန်ဗဒှ်ဒၟံၚ် တ္ၚဲသၟာဲယျဂှ် သွက်ဂွံစွံသတိ ကုပွမဘပဠအာတ်သြန် ကေုာံ ပွမလီဠာန်ထလိန်စၞာဲတံဂှ် ဗၠာဲသၟိၚ်သေံတံ ကဵုလဝ်သတိရ။
ညးမဒှ်သၟဝ်တဲဇၞော်သ္ကိုပ် နူကဵုဌာနပါ် ပရေၚ်ဗ္တိုက်ပလီုအမှုရာဇဝတ် နဲကွတ်ပညာ ဂကောံဒပ်ဗၠာဲသၟိၚ်ဨကရာဇ်သေံဂှ် ပ္ဍဲကဵုတ္ၚဲဗီုတံဏံဂှ် မၞိဟ်မကေတ်အခေါၚ်ခိုဟ် သွက်ဂွံကလိလောန် အမှုရာဇဝတ်သာ်ဗာ သီုကဵုပါလုပ်ပွပကီုပရာပ် စပ်ကဵုလိၚ်တံ၊ ဖန်ဗဒှ်ပရေၚ်ဆာန်လီဠာန်တံ နွံဂှ် ကဵုလဝ်သတိရ။
အကာဲအရာ မဒးဒုၚ်ပ္တိတ်ပရဲ စပ်ကဵုလိၚ်ဂှ်ဝွံ ဗီုဓာတ်ဂၠိက်ယာတ်ဟွံပါတံ ဟွံသေၚ်မ္ဂး သွက်ဂွံတက်ဗဳဒဳယောဖိုၚ်တံ၊ သွက်ဂွံပလံၚ်ကဵုတံဂှ် ဒးဒုၚ်ကဵုဇြဟတ်ဂရိုဟ် အာတ်မိက်တံသၟးဟွံက ဖဵုအဆက်လက္ကရဴတံဂှ်မ္ဂး လေပ်က္တဵုဒှ် စဵုကဵုကၠောန်သ္ပဘပဠအာတ်သြန်တံရောၚ်ဂှ် မေဿတာသဳရဳဝတ် ဟီုဂးလဝ်ရ။
“ရာဇဝတ်သာ်ဏံတံဂှ် သ္ကဵုဇီုကပိုက်ကၠေံ ဂုဏ်သိက္ခာ ညးမဒးဒုၚ်ပကီုပရာပ်တံသၟးဟွံက သီုကဵုဒးဒုၚ်ပ္တိတ်ပရဲ သြန်လှုဲတံမာန်ရောၚ်” သာ်ဝွံ ညး ကဵုသတိဟီုဂးလဝ်ရ။
သ္ကအ်ရဲ ကေုာံ မိဿဟာဲတီညာတ် ညးမစဳရေၚ်ကၠေံဇကုဇကုတံဂမၠိုၚ်ဂှ်လေဝ် မွဲဏှမွဲဏှဟီုဂွံ လေပ်ဂွံဆဵုညာတ်တဴ နဒဒှ်ညးမကလိလောန်ဒုဟ်တံဂှ်ရ ဒဒှ်ရမိက်ဂွံကဵုသတိ ကုအတောဲဂမၠိုၚ် ဗွဲတၟေၚ်ဂှ်ကီု၊ သ္အာၚ်နူဂှ်ပၠန် ပွမသ္ပအဓမ္မ စပ်ကဵုလိၚ်တံဂှ်လေဝ် ထေက်ကဵုဒးတော်လဝ် နဒဒှ်အကာဲအရာအန္တရာယ်မၞုံတံရောၚ်ဂှ် မေဿတာသဳရဳဝတ် ဟီုလဝ်ရ။
“စပ်ကဵုဗဳဒဳယော ပရေၚ်ပရောကာမ၊ ဗီုဓာတ် ရိုၚ်ၚ်ဇိုၚ်ၚ်တံဂှ်တုဲ သွက်ဂွံသ္ပဂရုဗွဲတၟေၚ်အိုတ်ဂှ် ပိုယ်တံ မိက်ဂွံဗ္ကန်စရ။ မုပရောဟီုတှ်ေ အရာတံဏံဂှ် ဒှ်ပရူပရာအဓိက ပ္တိတ်ပရဲပျဲပျာံ စပ်ကဵုလိၚ်တံမာန်ရောၚ်” ဂှ် ညး ဆက်ဟီုလဝ်ရ။
ပွမလီဠာန်ပံၚ်တောဲတံလေဝ် နွံဒၟံၚ်တုဲ ပ္ဍဲကဵုပရေၚ်လီဠာန်ပံၚ်တောဲသာ်ဏံဂှ် သၞောတ်မပတုပ်ပ္တောံလဝ်ရုပ်သာ်တံလေဝ် ပါလုပ်ဒၟံၚ်ဂှ် နွံပၟိက်သ္ဒးပသတိရောၚ် ဗၠာဲသၟိၚ်သေံတံ ကဵုလဝ်သတိရ။
စပ်ကဵုဘပဠအာတ်သြန် ဆေၚ်စပ်ကဵုလိၚ်ဂှ်တုဲ ပွမဟီုတေၚ် မဂွံဒုၚ်လဝ်တဲ ဒဵုကဵုဂိတုဂျာန္နဝါရဳတုဲကၠုၚ်တေံဂှ် အပံၚ်ဖအိုတ် (၄၀၀) ပြၚ်နွံဒၟံၚ်ဂှ်လေဝ် ဂကောံဒပ်ဗၠာဲသၟိၚ်ဨကရာဇ်သေံ လလောၚ်ပ္တိတ်လဝ်ရ။
ဟိုတ်နူလၟေၚ်ဒဒှ်သာ်ဏံတုဲ သြန်မဒးဆောံလေၚ်လဝ် ဆောံသရောပ်ထောံအပံၚ်ဖအိုတ်မ္ဂး သြန်ၝာတ် စဵုကဵု (၁၉၀) ပြကောဋိကိုဋ် နွံဒၟံၚ်ရ။
Ref: The Nation