နေဗျဳဒဝ်၊ ဖေဖဝ်ဝါရဳ (၁၄)
ၜိုန်ရဂ္စါန်ကၠုၚ်လဝ် သွက်ပရေၚ်ၜိုဟ်လလမ်ထာဝရ ကေုာံ သွက်ပရေၚ်ပဋိပက္ခရပ်လွဟ်အပ္ဍဲဍုၚ် ဂွံဒေါအ်ဒေၚ်တံကီုလေဝ် သ္ၚောဲဒၟံၚ်ကဵု ပရေၚ်ညိၚ်ဝတ်ၜိုဟ်လလမ်ဖိုဟ်ရောၚ်ဂှ် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် ဟီုပ္တိတ်ဒုၚ်လဝ်ဝန်ရ။
ပ္ဍဲကဵုလိက်သဝဏ် ပလံၚ်ဗစိုပ် သွက်တ္ၚဲကၟိန်ဍုၚ် မရနုက်ကဵု ၇၆ ဝါဂှ် သၞာံ ၂၀၂၂ ဂှ် စၟတ်လဝ် နဒဒှ်သၞာံၜိုဟ်လလမ်တုဲ ဆဵုဂဗသဳကၠဳလဝ်ကဵု ဂကောံရပ်လွဟ်ကောန်ဍုၚ်အရၚ်တံတုဲ သွက်ဂွံဒက်ပ္တန်ၜိုဟ်လလမ်ထာဝရမာန်ဂှ် ဂ္စါန်လဝ်ရောၚ် က္ဍိုပ်သ္ကိုပ်ပၞာန် ဟီုဂးလဝ်ရ။
ဆ္ဂး ဒၟါနူကဵုပယောဂ ပလာပ်ပထုဲ မ္ၚးဍုၚ်အပ္ဍဲဍုၚ် နာနာသာ်ကီု၊ သီုကဵုတၚ်နွံပၟိက် ညးမဆေၚ်စပ်တံ သွက်ဂွံချပ်ဗ္စာကၠောန်ၜိုတ် ဒတုဲဖဵုဍုၚ် ဒတုဲဖဵုညးဍုၚ်ကွာန်တံဂှ်တုဲ သ္ၚောဲဒၟံၚ်ကဵု ပရေၚ်ညိၚ်ဝတ်ၜိုဟ်သြိုဟ်တံဖိုဟ်ရောၚ်ဂှ်ရ သ္ဇက်ဒးဇြိုၚ်စိုတ် သွက်ကၟိန်ဍုၚ်ရောၚ်ဂှ် က္ဍိုပ်သ္ကိုပ်ပၞာန် သ္ဂးရ။
ညးမၞုံအခေါၚ်ဟီုဂး ဂကောံက္ဍိုက်ပ်လၟေၚ်ကမၠောန်ၜိုဟ်လလမ် (PPST) ဂကောံဒေါအ်ပန်ပှော် (၇) ဂကောံ မသဳကၠဳဒၟံၚ် ပရေၚ်ၜိုဟ်လလမ် ကုကံၚ်ဇြဳပၞာန် သ္ကိုပ်ဗိုလ်ဇၞော် သဝ်ကျဝ်ညောအ်ဂှ် ပရေၚ်သဳကၠဳပရေၚ်ၜိုဟ်လလမ် ပ္ဍဲသၞာံ ၂၀၂၂ ဂှ် ၜိုန်ရရုပ်ရဴဟွံမံက်ဏီကီုလေဝ် သွက်ဂွံဂၠါဲသွဟ် ပြသၞာပရေၚ်ဍုၚ်ကွာန် နကဵုနဲကဲသဳကၠဳဆဵုဂဗဂှ် ကၠောန်ၜိုတ်ဒၟံၚ်ဗိုန်န်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“သၞာံ ၂၀၂၂ မွဲသၞာံ အိုတ်အာယျ၊ မုမှ ရုပ်ရဴဟွံမံက်ပုဟ်ဂှ်လေဝ် ဍာံပြဒၟံၚ်ရ။ ညအ်ဂှ်လေဝ် ဓဝ်ဍာံဂှ် ပိုယ်တံ ဆလအ်မှ လောန်ၜက်ကၠေံဟွံဂွံပုဟ်။ ဆ္ဂး ပိုယ်တံဂှ် နကဵုဓဝ်ပတှ်ေဂှ် ဆက်တုဲဒးဂ္စါန်ကၠောန်ၜိုတ်အာပၠန်ဏောၚ်။ နကဵုဓဝ်ပတှ်ေဟီုဂှ် အကာဲအရာဂၠါဲသွဟ် ပြသၞာပရေၚ်ဍုၚ်ကွာန် နကဵုနဲကဲဆဵုဂဗသဳကၠဳပရေၚ်ဍုၚ်ကွာန်မွဲ ပိုယ်တံ နူကဵုအကြာတၚ်ကော်ဆဴနာနာဂှ် သွက်ဂွံဂ္စါန်ရေၚ်တၠုၚ်အာဂှ် ပိုယ်တံကၠောန်ဒၟံၚ်ဗိုန်န်ရဏောၚ်” သာ်ဝွံ ညးဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တိုၚ်ပ္ကဴ သွက်ဂွံဒက်ပ္တန် ကၟိန်ဍုၚ်ပံၚ်ကောံဖေဝ်ဒရာဒဳမဝ်ကရေဇြဳကဵု ပရေၚ်ၜိုဟ်လလမ်ကၟိန်ဍုၚ်ဂှ်ဝွံ ဟိုတ်နူဂကောံဇြဟတ်အိုဿီုတံ တုပ်သၟဟ်ဒၟံၚ်တုဲဒှ်ဂှ်ရ နူကဵုအခက်အခုဲနာနာသာ်ဂှ် ၜိုတ်အစောံစရာဲနွံ သွက်ဂွံဆက်ဂ္စါန်ရေၚ်တၠုၚ်အာရ နွံဂှ် သ္ကိုပ်ဗိုလ်ဇၞော် သဝ်ကျဝ်ညောအ် ထပ်ဟီုဗပေၚ်လဝ်ရ။
ပေါဲသဳကၠဳပရေၚ်ဍုၚ်ကွာန် ကေုာံ လၟေၚ်ကမၠောန်ပရေၚ်ၜိုဟ်လလမ် မစဂွံဒၟံၚ်အသိၚ်ဂှ် ဟိုတ်နူပရေၚ်ပၞာန်သီအဝဵု သၞာံ ၂၀၂၁ ဂိတုဖေဖဝ်ဝါရဳဂှ်တုဲ ဒးဒေါအ်ဒေၚ်အာလဝ်တုဲ နဒဒှ်ဖဵုအဆက်လက္ကရဴသီအဝဵုဂှ် ပ္တဝ်ဒၟံၚ်က္ဍိုပ်ကဵု ဗီုပြၚ်ပၞာန်အပ္ဍဲဍုၚ်တၟိရောၚ် ကမ္မတဳက္ဍိုက်ပ် PPST လလောၚ်ပ္တိတ်လဝ် ပ္ဍဲလိက်သဝဏ် တ္ၚဲကၟိန်ဍုၚ်ဝွံရ။
ပ္ဍဲသၞာံတုဲကၠုၚ်တေံ ဂိတုဨပရဴကြပ်အိုတ်ဂှ် က္ဍိုပ်သ္ကိုပ်ပၞာန် စကော်ဘိက်လဝ် သွက်ဂွံသဳကၠဳပရေၚ်ၜိုဟ်လလမ်တုဲ ဂကောံရပ်လွဟ်ကောန်ဍုၚ်အရၚ် ထ္ပက်လဝ်စၟတ်တဲ (၇) ဂကောံကဵု ဂကောံရပ်လွဟ်ကောန်ဍုၚ်အရၚ် ဟွံဂွံထ္ပက်လဝ်စၟတ်တဲ (၃) ဂကောံတံ တိုန်စိုပ်သဳကၠဳလဝ် (၃) ဝါရ။
ညးလ္ၚတ်သ္ၚဳဂၠိပ်ပရေၚ်ဍုၚ်ကွာန် ဥူတာန်သဵုနာၚ်ဂှ် ပ္ဍဲသၞာံ ၂၀၂၂ ဂှ် က္ဍိုပ်သ္ကိုပ်ပၞာန် ဒဒှ်ရဂ္စါန်လဝ် သွက်သ္ဂောံဂွံပရေၚ်ၜိုဟ်လလမ် ဟွံသေၚ်ဂှ်ကီု၊ ကၠောန်ပေါဲသဳကၠဳ ကုဂကောံရပ်လွဟ်ကောန်ဍုၚ်အရၚ်လ္ၚဵု မဟွံဒှ်ဒၟံၚ်ပေါဲဗ္တိုက်တံဂှ်တုဲ ကလိလောန်လဝ် ပွပကီုပရာပ် လ္တူညးဍုၚ်ကွာန် ကေုာံ ဂကောံဇြဟတ်ပၠန်ဂတးတံရောၚ်ဂှ် ပါ်ပါဲလဝ်ရ။
“သၞာံ ၂၀၂၂ ဂှ်လေဝ် မေန်အံၚ်လှာၚ် ဟွံကၠောန်လဝ် ပရေၚ်ၜိုဟ်လလမ်ပုဟ်။ နကဵုက္ဍိုပ် ပရေၚ်ၜိုဟ်လလမ်ဂှ် ကၠောန်လဝ်ပေါဲသဳကၠဳ ကုဂကောံဇြဟတ် မဟွံဒှ်ပေါဲဗ္တိုက်လ္ၚဵုတံဂှ်တုဲ မွဲလ္ပာ်တေံဂှ် ပလီုပလာ်ဒၟံၚ် ဂကောံပူဗိုၚ်ဗ္တိုက်ဒၟံၚ်ဍေံတံ NUG, PDF ကေုာံ ဒေသဂကောံရပ်လွဟ်ကောန်ဍုၚ်အရၚ်တံ တုဲတှ်ေ ရးသက်ကိုၚ်၊ ရးမဂွဵု ဒၞါဲညးဍုၚ်ကွာန် ကောန်အရာပ်သာမညတံ မံၚ်တန်တဴတံဂှ်ရ” သာ်ဝွံ ညးသ္ဂးရ။
သ္အာၚ်နူဂှ်ပၠန် ဟိုတ်နူကံၚ်ဇြဳပၞာန် ကၠောန်သ္ပလဝ် ပွပကီုပရာပ်ဂမၠိုၚ် ဗွဲမသ္ကာတ်မြဟ်ဂှ်ရ ပေါဲဗ္တိုက်သၞာံဏံ ကုဂကောံဇြဟတ်ဒစဵုဒစးတံဂှ်ဝွံ အခိၚ်လအ်ကၠုၚ်ဗက် စိုပ်ဒၟံၚ်အကာဲအရာပြဟ်ဒတုံစှ်ေအာ ပ္ဍဲအကြာပၟတ်ပၞာန်အပ္ဍဲဍုၚ်ယျဂှ် ဥူတာန်သဵုနာၚ် သ္ၚဳဂၠိပ်လဝ်ရ။
အခိၚ်လၟုဟ်ဂှ်လေဝ် သီုကဵုဂကောံဒပ်စဵုဒၞါညးဍုၚ်ကွာန် (PDF) တံပါလုပ် ဗော်သွးကောန်ဂကူကရေၚ် (KNU) ၊ ဂကောံဗၠးၜးကချေၚ် (KIO) ၊ ဒပ်ပၞာန်ကွးဘာ (ABSDF) ၊ ဒပ်ပၠန်တရဴချေၚ် (CNF) ကေုာံ ဗော်တောတက်ကောန်ဂကူကရေၚ်ဍာဲ (KNPP) တံ ကဵု အကြာဒပ်ကံၚ်ဇြဳပၞာန်တံဂှ် ပေါဲဗ္တိုက်တံ သာသ္ကာတ်မြဟ်ဒၟံၚ်ရ။
အပ္ဍဲဒပ်ပၞာန်သီအဝဵုပွိုၚ် (၂) သၞာံ ပ္ဍဲကဵုပွိုၚ်ဍုၚ် (၁၉၀) ပြၚ်ဂှ် ပေါဲဗ္တိုက်အပံၚ် (၈၀၀၀) ပြၚ် က္တဵုဒှ်လဝ်တုဲ ကဝက်ပြၚ်ၚ် ပေါဲဗ္တိုက်သီုဖအိုတ်ဂှ်ဝွံ က္တဵုဒှ်လဝ် အကြာဒပ်ကံၚ်ဇြဳပၞာန် ကဵု ဂကောံဒပ်ရပ်လွဟ်ကောန်ဍုၚ်အရၚ်တံရောၚ်ဂှ် ဂကောံသုတေသန ISP-Myanmar လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)