ညံၚ်လေဝ်ပေန်၊ ဖေဖဝ်ဝါရဳ (၁၅)
ဟိုတ်နူပရေၚ်ကံၚ်ဇြဳပၞာန် ပန်ပှော်ဖျေံလွဟ်ဇၞော် ပ္ဍဲပွိုၚ်ဍုၚ်ယှိုဲကျေန် ခရိုၚ်ညံၚ်လေဝ်ပေန် ဗော်သွးကောန်ဂကူကရေၚ် KNU တုဲ ညးဒေသ ကောန်ညးဍုၚ်ကွာန် နူကဵုကွာန် (၃)ကွာန် (၁၀၀၀) တၠပြၚ်တအ် ဒးဂြိပ်ဒဴဒၟံၚ် သီုအလုံကွာန်ရဂှ် ဂွံတီကေတ် နူဇရေၚ် KNU ကေုာံ ဇာနှိက်ထၠက်အရီုပရေၚ်ၜိုဟ်လလံကရေၚ် KPSN ရ။
ပ္ဍဲဂိတုဖေဖဝ်ဝါရဳ တုဲကၠုၚ် စၟတ်တ္ၚဲ (၁၁) အခိၚ်နူဂယးဂှ် နူဒပ်ပၞာန်တိုက် ကံၚ်ဇြဳပၞာန် ခမရ (၂၀) ဂှ် ပန်ဖျေံဏာလွဟ်ဇၞော် (၃)မဂှ် ပြဟ်ဒတုံ ပါ်ခတိုဟ်အာ ပ္ဍဲကွာန်ညံၚ်ပေန်ဂျဳ ပွိုၚ်ဍုၚ်ယှိုဲကျေန်တုဲ ကောန်ဍုၚ်ကွာန်ညးဒေသ (၃)တၠ ဇီုကပိုက် ဂွံလဝ်ဘဲဝပ်တုဲ သ္ၚိဒၟံၚ်ကီု သီုကဵုဟၚ်စာတ်သြောံ ဒးဇီုကပိုက် လီုလာ်အာလဝ်ရဂှ် KNU ကေုာံ KPSN လလောၚ်တြးလဝ်ရ။
သ္အာၚ်နူဂှ်ပၠန် ပ္ဍဲဂိတုဖေဖဝ်ဝါရဳ စၟတ်တ္ၚဲ (၁၁) အခိၚ်ဇိုၚ်သဝ်တ္ၚဲကဵု ဂိတုဖေဖဝ်ဝါရဳ စၟတ်တ္ၚဲ(၁၂) အခိၚ်နူဂယးဂှ်လေဝ် နူကဵုဒပ်ကံၚ်ဇြဳပၞာန် ခမရ (၂၀) ဖျေံလဝ်ဗ္ဒပ် ပ္ဍဲကွာန်ပုဇြောန်မျောၚ်ဂှ် ဟိုတ်နူပန်ပှော်ဖျေံဏာလွဟ်ဇၞော် ပ္ဍဲတိဍာ် KNU ဒပ်မဟာ (၃) သီုတၚ်ရန်တၟံနွံနွံတုဲ ဒတုံပြဟ်စှ်ေ ပ္ဍဲကွာန်ညံၚ်ပေန်ဂျဳကွာန်တၟိကဵု ကွာန်ညံၚ်ပေန်ဂျဳၝောံကွာန် ပါ်ခတိုဟ်အာလဝ်ဂှ် ဇီုကပိုက်ဒး ဂၠဴညးဒေသတအ် (၄) ဒးချိုတ်အာရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ဒပ်ကံၚ်ဇြဳပၞာန် ပန်ဖျေံဒၟံၚ်လွဟ်ဇၞော် ပ္ဍဲပွိုၚ်ဍုၚ်ယှိုဲကျေန် ခရိုၚ်ညံၚ်လေဝ်ပေန် KNU သီုကဵုတၚ်ရန်တၟံနွံနွံ ဗီုဏံတုဲ ပရေၚ်ဇီုကပိုက်ဒး ညးဍုၚ်ကွာန်ဂမၠိုၚ် နွံကၠုၚ်ဒၟံၚ်ဂှ်ရ ညးဒေသ ကောန်ညးဍုၚ်ကွာန် နူကဵုညံၚ်ပေန်ဂျဳ၊ ညံၚ်ပေန်ဂျဳကွာန်တၟိ ကေုာံ ကွာန်တေတ်တူကုမ် (၁၂၄၃) တၠတအ် ဟွံဂံၚ်မံၚ် ပ္ဍဲကဵုကွာန်တုဲ ဒးဂြိပ်ဒဴပါဲဓလေတ်ဒၟံၚ် ပ္ဍဲဇရေၚ်မသကလောကောဒေံ နွံဗ္ဒာဲဂှ်ကဵု လတူဍုၚ်တအ် သီုအလုံကွာန်ရဂှ် KNU လလောၚ်တြးလဝ်ရ။
ညးမၞုံအခေါၚ်ဟီုဂး ဇာနှိက်ထံက်အရံၚ်ပရေၚ်ၜိုဟ်လလံကရေၚ် KPSN ဂှ်မ္ဂး ပ္ဍဲကဵုတိဍာ်KNU ဂှ် အကာဲအရာဒပ်ကံၚ်ဇြဳပၞာန် ဖံက်ပ္ကဝ်ဒၟံၚ်အခေါၚ်အရာမၞိဟ် အခိၚ်လၟုဟ်ဏံ စိုပ်ဒၟံၚ်အကာဲအရာကၞောတ်အထောဋ်သၠုၚ်အိုတ်ရဂှ် ဟီုသ္ဂးလဝ်ရ။
ပ္ဍဲတိဍာ်ဗော်သွးကောန်ဂကူကရေၚ် KNU ထိၚ်ဒဝ်လဝ်ဂှ် ပ္ဍဲမွဲကာလပၞာန်သီအဝဵု ပွိုၚ်(၂)သၞာံဏံ အကြာဒပ်ကံၚ်ဇြဳပၞာန်ကဵု တံဒပ်သၟဝ်တဲ KNU တအ် ပေါဲဗတိုက်ၜါလ္ပာ် က္တဵုဒှ်လဝ် (၈၀၀၀) ဝါပြၚ်မၞုံကၠုၚ်လဝ်တုဲ ဟိုတ်နူပေါဲဗတိုက်ဂှ် ညးဒေသ ကောန်ညးဍုၚ်ကွာန်ဂမၠိုၚ် လၟိဟ်ကဵုကိုတ် ဒးဂြိပ်ဒဴ ပါဲဓလေတ်ဒၟံၚ်ရဂှ် ဂွံတီကေတ်လဝ်ရ။
ပရိုၚ်-သြၚ်လောန်တိုၚ်(မ်)