နေပျဳဒဝ်၊ ဖေဖဝ်ဝါရဳ(၁၅)
ဗော်ဍုၚ်မန်တၟိ (NMSP) မဒှ်ဗော်ရပ်လွဟ်ကောန်ဍုၚ်အရၚ် မွဲဗော် ကေုာံကဝ်မတဳဓမံက်ရုပ်ရဴ ပရေၚ်ညဳသာသၟဟ်သၟန်ကောန်ဂကူ ကေုာံ ပရေၚ်ၜိုဟ်လလံ ကံၚ်ဇြဳပၞာန်တအ်ဂှ် ပ္ဍဲဂိတုဖေဖဝ်ဝါရဳ စၟတ်တ္ၚဲ (၁၃) ဏံ သွက်ဂွံပလေတ်ပလေတ်သၞောဝ်သ္ဇိုၚ်ဒက်ပ္တန် ၂၀၀၈ ဂှ် ဆဵုဂဗသဳကၠဳလဝ် ပ္ဍဲနေပျဳဒဝ်ရဂှ် ကံၚ်ဇြဳပၞာန် လလောၚ်တြးလဝ် ပရိုၚ်ရ။
ပ္ဍဲပေါဲသဳကၠဳဏံဂှ် ပ္ဍဲပရေၚ်ဒက်ပ္တန်ကၟိန်ဍုၚ် ဒုၚ်သ္ဇိုၚ်ကဵုသၞောတ်ဖေတ်ဒရေဝ်ဂှ် သွက်ကိစ္စ ဂွံပလေဝ်ပလေတ်အာ ၝောံပိုဒ်မဒှ်သ္ဇိုၚ် ပ္ဍဲကဵုသၞောဝ်သ္ဇိုၚ်ဒက်ပ္တန် ၂၀၀၈ တအ်မာန်ဂှ် သဳကၠဳလဝ်ရၚ်သ္ကအ် တၚ်ပတိုန်ထ္ၜး တၚ်နွံပၟိက် နူၜါလ္ပာ်၊ ဂတးဂတန်ရဂှ် ဟီုသ္ဂးလဝ်ရ။
စပ်ကဵုကိစ္စပရေၚ်ပလေဝ်ပလေတ် သၞောဝ်သ္ဇိုၚ်ဒက်ပ္တန် ၂၀၀၈ တုဲ ပ္ဍဲဂိတုဖေဖဝ်ဝါရဳ စၟတ်တ္ၚဲ(၁၄)ဏံလေဝ် နဒဒှ်တ္ၚဲ ဒုတိယ ဆက်တုဲ သဳကၠဳအာရောၚ်ဂှ် ကံၚ်ဇြဳပၞာန် လလောၚ်တြးလဝ်ရ။
ပေါဲသဳကၠဳဏံဂှ် ဥက္ကဋ္ဌ ဂကောံညးစၞး ကဝ်မတဳပရေၚ်ဓမံက်ုရုပ်ရဴပ္ညဳပ္ညပ် ပရေၚ်ညဳသၟဟ်ကောန်ဂကူ ကေုာံပရေၚ်ၜိုဟ်လလံ ဒုတိယသ္ကိုပ်ဗိုလ်ဇၞော် ယျာပျိက္ဍိုက်က္ဍိုပ် ကေုာံ ဂကောံညးစၞး ဒု – ဥက္ကဋ္ဌဗော်ဍုၚ်မန်တၟိ (NMSP) နာဲအံၚ်မေန်က္ဍိုက်က္ဍိုပ်တအ် တိုန်စိုပ်သဳကၠဳလဝ်ရ။
ဗော်ဍုၚ်မန်တၟိ (NMSP) ဂှ် ပ္ဍဲဂိတုနဝ်ဝေမ်ဗာ စၟတ်တ္ၚဲ(၉) ကေုာံစၟတ်တ္ၚဲ(၁၀) တုဲကၠုၚ်တေံလေဝ် သ္ၚိအၚ် ၁၊ သ္ၚိအၚ် ၂ ပါလုပ် ပ္ဍဲသၞောဝ်သ္ဇိုၚ်ဒက်ပ္တန် ၂၀၀၈ ကေုာံ တၚ်တုပ်စိုတ် လိက်ကသုက်တၚ်တုပ်စိုတ်ကၟိန်ဍုၚ် လစှ်ေ (၁)၊ (၂) ကေုာံ(၃) တအ်ဂှ် သဳကၠဳလဝ် ကုဂကောံသဳကၠဳပရေၚ်ၜိုဟ်လလံ ကံၚ်ဇြဳပၞာန်ရ။
အကြာ ဂကောံမန် ပါလုပ်ဒၟံၚ်ပ္ဍဲပရေၚ်ဍုၚ်ကွာန်မန် (၁၀)ဂကောံဂမၠိုၚ် အာတ်မိက်လဝ် ဗော်ဍုၚ်မန်တၟိ (NMSP) ညံၚ်ဟွံဂွံထပ်အာဆဵုဂဗသဳကၠဳဂှ် အာစိုပ် ဆဵုဂဗသဳကၠဳလဝ် ကုကံၚ်ဇြဳပၞာန် ဗၞတ်ပန်ဝါပေၚ်ၚ်ရ။
ဂကောံမန် ပါလုပ်ဒၟံၚ်ပ္ဍဲပရေၚ်ဍုၚ်ကွာန်မန် (၁၀)ဂကောံတအ်ဂှ်လေဝ် ပေါဲသဳကၠဳ ကံၚ်ဇြဳပၞာန်ကၠောန်ဗဒှ်ဒၟံၚ်ဂှ် ဒှ်ဆအယာံမာတ်ဗီုပြၚ်ပတောံဟေၚ်တုဲ ဒၟာနူဒှ်သွက်ဂွံဂၠာဲပၞော်တိတ်ပရေၚ်ဍုၚ်ကွာန်ဍေံတအ် ဗွဲမလုပ်သၞောဝ်ဟေၚ်ဂှ်ရ နကဵုဗော်ဍုၚ်မန်တၟိ (NMSP) ညံၚ်ဟွံဂွံထပ်သ္ပ ပရေၚ်ဆဵုဂဗသဳကၠဳ အတိုၚ်ပရေၚ်ဍုၚ်ကွာန်ဂှ် ပ္ဍဲဂိတုသေတ်တေမ်ဗာ တုဲကၠုၚ် စၟတ်တ္ၚဲ (၁၆) တေံဂှ် ပလံၚ်ဗစိုပ်လဝ် လိက်ပံက်ထိုၚ်ရ။
စပ်ကဵုကိစ္စ ဒးအာသဳကၠဳ ကုကံၚ်ဇြဳပၞာန် သွက်ပရေၚ်ပလေဝ်ပလေတ် သၞောဝ်သ္ဇိုၚ်ဒက်ပ္တန် ၂၀၀၈ ဂှ်တုဲ ၜိုန်ရသြၚ်လောန်တိုၚ်(မ်) ဆက်စၠောံသၟာန်သွဟ်လဝ် ညးတာလျိုၚ်ဗော်ဍုၚ်မန်တၟိ ဂၠိုၚ်ၚ်ကဵုဝါကီုလေဝ် ဒုၚ်တဲဟီုသှ်ကဵုလဝ် ဟၟဲရ။
ဗော်ဍုၚ်မန်တၟိ (NMSP) ဂှ်ထ္ပက်လဝ်စၟတ်တဲ ပ္ဍဲလိက်ကသုက်တုပ်စိုတ်ပရေၚ်ဒေါံပန်ပှော်အလုံမွဲကၟိန်ဍုၚ် NCA မွဲကရောံကဵု ဗော်သွးဒဳမဝ်ကရေတ်တေတ် ဠာဟူ (LDU) ပ္ဍဲလက်ထက်အလဵုအသဳ NLD ပ္ဍဲသၞာံ ၂၀၁၈ ဂိတုဖေဖဝ်ဝါရဳ စၟတ်တ္ၚဲ (၁၃) ဂှ်ရ။
ပရိုၚ် – သြၚ်လောန်တိုၚ်(မ်)