ၜဳကလေၚ်၊ ဖေဖဝ်ဝါရဳ(၁၈)
တွဵုရးဍုၚ်မန်၊ ပွိုၚ်ဍုၚ်ၜဳကလေၚ်၊ ပ္ဍဲလတူဂၠံၚ်ကွဳစက် လဂုၚ်-မတ်မလီု ကွာန်ဒေါက်ယျာတ် ပ္ဍဲဂိတုဖေဖဝ်ဝါရဳ စၟတ်တ္ၚဲ(၁၇) အခိၚ်နူဂယးၜိုတ် (၇) နာဍဳ ရေၚ်ကွဳစက်ကံၚ်ဇြဳပၞာန် ဒးဒုၚ်ကြတ်ဗတိုက်လဝ်ရဂှ် ဂွံတီကေတ် နူကဝ်မတဳကောပ်ကာဲပရေၚ်မိတ် KNU ခရိုၚ်သဓီုရ။
ရေၚ်ကွဳစက်ကံၚ်ဇြဳပၞာန် (၅)ဖ္ဍိုက် ဒဳတိတ်ကၠုၚ်နူပွိုၚ်ဍုၚ်သဓီု ကၠုၚ်လပါ်ပွိုၚ်ဍုၚ်ၜဳကလေၚ်ဂှ် ဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA ကြတ်ဗတိုက်လဝ် နကဵုလွဟ်ဇၞော် လွဟ်ဍောတ်တအ်ရ။
ဟိုတ်နူဒးဒုၚ်ကြတ်ဗတိုက်လဝ်တုဲ ကွဳစက်ကံၚ်ဇြဳပၞာန် (၄)ဖ္ဍိုက် ဇီုကပိုက်ဒးလဝ်တုဲ ကောန်ဒပ်ကံၚ်ဇြဳပၞာန် ဟွံအောန်နူ (၅)တၠ ဇီုကပိုက် ချိုတ်အာမာန်ရဂှ် ဥက္ကဋ္ဌကဝ်မတဳကောပ်ကာဲပရေၚ်မိတ် KNU ခရိုၚ်သဓီု ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ဟိုတ်နူကြတ်ဗတိုက်လဝ်တုဲ ပရေၚ်ပန်ပှော်ၜါလ္ပာ် က္တဵုဒှ်လဝ် ဗ္ဒာဲ (၂၀)မိနေတ်ဂှ်ရ ဂၠံၚ်ဍာန်လဂုၚ်-မတ်မလီု ဒးကၟာတ်အာ ပွိုၚ်မွဲနာဍဳပြၚ်တုဲ ၜိုတ်(၉)နာဍဳ အခိၚ်နူဂယးဂှ် ကလေၚ်အာကၠုၚ် အတိုၚ်ဗီုပကတိတြေံပၠန်ရဂှ် ဂွံတီကေတ်ရ။
အတိုၚ်လဟီုညးဍုၚ်ကွာန်တအ်မ္ဂး ကြဴနူပရေၚ်ပန်ပှ်ော ဒှ်လဝ်တုဲ ကလေၚ်ကပှ်ပတိုန်လဝ် ကောန်ဒပ်ကံၚ်ဇြဳပၞာန် ဂွံလဝ်ဘဲဝပ်တအ်တုဲ ဆက်တိတ်အာ လပါ်ပွိုၚ်ဍုၚ်ကျာ်ထဝ်တေံရဂှ် ဟီုသ္ဂးလဝ်ရ။
ပ္ဍဲဂိတုဂျာန္နဝါရဳ တုဲကၠုၚ် စၟတ်တ္ၚဲ (၂၇)တေံဂှ်လေဝ် ပ္ဍဲလတူဂၠံၚ်ကွဳစက် လဂုၚ်-မတ်မလီု ကွာန်ဒေါက်ယျာတ် ရေၚ်ကွဳစက်ကံၚ်ဇြဳပၞာန် ဒးဒုၚ်တံၚ်ခတိုဟ်လဝ်မာၚ်တုဲ ဒပ်ကံၚ်ဇြဳပၞာန် ဒးဒုၚ်ဂိလဝ်ဂှ် ပန်ပလီုလဝ် သ္ၚိဒၟံၚ်ညးဍုၚ်ကွာန်တအ် (၄)မ နကဵုလွဟ်ဇၞော်ရ။
ပ္ဍဲပွိုၚ်ဍုၚ်ၜဳကလေၚ် တိဍာ်ထိၚ်ဒဝ် ဗော်သွးကောန်ဂကူကရေၚ် KNU ဒပ်မဟာ(၁)ဂှ် ရေၚ်ကွဳစက်ကံၚ်ဇြဳပၞာန် ကေုာံဗ္ဒပ်ဂမၠိုၚ် ဟိုတ်နူဒးဒုၚ်ဗတိုက်ဒၟံၚ် ဟွံလအ်ဟွံလအ်ဂှ်ရ ဒပ်ကံၚ်ဇြဳပၞာန်ပန်ဖျေံဒၟံၚ်လွဟ်ဇၞော် ပ္ဍဲကွာန်တအ် ဇၟာပ်ဒဒှ်တ္ၚဲရ။
ပရိုၚ်-သြၚ်လောန်တိုၚ်(မ်)