လံၚ်လုၚ်၊ ဖေဖဝ်ဝါရဳ(၁၈)
ရးဒေသဇၞော်တၞၚ်သဳ၊ ပ္ဍဲဍုၚ်လံၚ်လုၚ် ကြဴနူညးလုပ်ဂကောံပၞာန်ညးဍုၚ်ကွာန်မွဲတၠ ဒးဒုၚ်ဂစိုတ်လဝ်တုဲ ပ္ဍဲဂိတုဖေဖဝ်ဝါရဳ စၟတ်တ္ၚဲ (၁၇) အခိၚ်နူဂယးဂှ် ဒပ်ကံၚ်ဇြဳပၞာန် ကၠုၚ်ရပ်ကေတ်ဏာလဝ် ညးဗြဴ(၄) တၠရဂှ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ဂိတုဖေဖဝ်ဝါရဳ စၟတ်တ္ၚဲ (၁၆) တ္ၚဲတုဲကၠုၚ်တေံ ၜိုတ် (၆)နာဍဳဂှ် ညးလုပ်ဂကောံ ပၞာန်ညးဍုၚ်ကွာန်ကံၚ်ဇြဳပၞာန် ဒၟံၚ်အရာပ်(ဃ) ဍုၚ်လံၚ်လုၚ် ဥူအံၚ်သာန်ဥူဂှ် သၟာလွဟ်သေနာဟွံတီယၟုတအ် ကၠုၚ်ပန်ပှ်ောလဝ် ပ္ဍဲကဵုသ္ၚိဒၟံၚ်ညးရ။
ကြဴနူဥူအံၚ်သာန်ဥူ ဒးဒုၚ်ပန်ဂစိုတ်လဝ်တုဲ တ္ၚဲဏံ အခိၚ်ၜိုတ် (၉)နာဍဳဂှ် ကံၚ်ဇြဳပၞာန် လုပ်စိုပ်ဒကဵုဂၟာဲလဝ် အရာပ်(ဂ) ကေုာံ(ဃ)တုဲ ရပ်ဏာလဝ်ညးဗြဴ (၄)တၠတအ်ရ။
ပ္ဍဲကဵုမၞိဟ်ဗြဴ ဒပ်ကံၚ်ဇြဳပၞာန်ရပ်ဏာလဝ်တအ်ဂှ် ဒှ်မမိညုၚ်၊ ဒဝ်အုမ်ယှိုဲ၊ မတာန်တာန်ထိုဲ ကေုာံ ဒဝ်တာန်ဨတအ်တုဲ ညးတအ်ဂှ် ဒှ်ညးဗြဴသာမည တၠသ္ၚိတအ်တုဲ ကဵုဂကောံလဵုလေဝ် ဆက်စပ်ဒၟံၚ်ဟၟဲပုဟ်ဂှ် ညးဒေသဂမၠိုၚ် ဟီုသ္ဂးလဝ်အိုတ်ရ။
မၞိဟ်ဗြဴညးဒေသ ဒးဒုၚ်ရပ်လဝ် (၄)တၠတအ်ဂှ် ဒးဒုၚ်ရပ်ထိၚ်ဒဝ်လဝ် ပ္ဍဲဗ္ဒပ်ဗၠာဲသၟိၚ်ၝောံဍုၚ်လံၚ်လုၚ်တုဲ ဒဵုကဵုဇိုၚ်သဝ်တ္ၚဲ တ္ၚဲဏံ ဟွံဂွံဗၠးတိတ်ကၠုၚ်ဏီရဂှ် ဂွံတီကေတ်ရ။
ပ္ဍဲပွိုၚ်ဍုၚ်လံၚ်လုၚ် ဟိုတ်နူဒပ်ကံၚ်ဇြဳပၞာန် ထ္ၜးဒၟံၚ်ဟိုတ်နာနာ ရပ်ကေတ်ဒၟံၚ်သၟတ်ဍောတ်တ်တအ်တုဲ ဒးဂြိပ်ပါဲဓလေတ်ဒၟံၚ်လေဝ် နွံကၠုၚ်ဒၟံၚ်ရ။
ပ္ဍဲရးဒေသဇၞော်တၞၚ်သဳဂှ် ကြဴနူဒပ်ပၞာန်သီအဝဵုတုဲ ကံၚ်ဇြဳပၞာန်ရပ်ကေတ်လဝ် ညးဒေသတအ် (၁၀၀၀) တၠပြၚ်နွံတုဲ ပ္ဍဲကဵုဂှ် ညးဍုၚ်ကွာန်ဗွဲမဂၠိုၚ်တအ်ဂှ်မ္ဂး ဗ္ဂပ်စုတ်ၝောံပိုဒ်စုၚ်ဇဳတုဲ ရပ်စုတ်ဒၟံၚ်ထံၚ်ရ။
ပရိုၚ်-သြၚ်လောန်တိုၚ်(မ်)