တၞၚ်သဳ၊ ဖေဖဝ်ဝါရဳ (၂၁)
ပ္ဍဲပွိုၚ်ဍုၚ်ထဝါဲ၊ ပွိုၚ်ဍုၚ်တၞၚ်သဳ ကေုာံ ပွိုၚ်ဍုၚ်ပဠဝ်၊ ရးဒေသဇၞော်တၞၚ်သဳဂှ် ဟိုတ်နူပေါဲဗ္တိုက်ကလေၚ်မွဲဝါပၠန်တံ ကလေၚ်သ္ကာတ်မြဟ်ကၠုၚ်ဂှ်ရ ညးဍုၚ်ကွာန်ပါဲဒဴဘဲပၞာန် မ္ဒးဂြိပ်ဒဴပါဲဒလေတ်ဒၟံၚ်တံ ထပ်ဂၠိုၚ်တိုန်ကၠုၚ် စဵုကဵု (၂၅၀၀၀) ပြၚ်ဂှ် ဂွံတီကေတ် ဇရေၚ်ဂကောံဒပ်စဵုဒၞါညးဒေသတံရ။
ကံၚ်ဇြဳပၞာန်ဝွံ ကြဴနူလလောၚ်တြး ပရေၚ်အုပ်ဓုပ်ပၞာန် ကုပွိုၚ်ဍုၚ်တၞၚ်သဳ ကေုာံ ပွိုၚ်ဍုၚ်ပဠဝ် ရးဒေသဇၞော်တၞၚ်သဳတံ ပ္ဍဲဂိတုဖေဖဝ်ဝါရဳ (၂) တုဲကၠုၚ်တေံတုဲဂှ် သီုကဵုပွိုၚ်ဍုၚ် (၂) ဏံကီု သီုကဵုပွိုၚ်ဍုၚ်ထဝါဲတံဂှ် ထ္ပက်ကၠုၚ်ကရောၚ်ပၞာန် နကဵုဇြဟတ်လၟိဟ်ဗွဲမဂၠိုၚ်ဂၠေၚ်ရ။
ဟိုတ်နူဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန်ဂှ်ရ ပ္ဍဲပွိုၚ်ဍုၚ်ပဠဝ်၊ တၞၚ်သဳ ကေုာံ ပွိုၚ်ဍုၚ်ထဝါဲတံဂှ် ပေါဲဗ္တိုက်ၜါလ္ပာ်တံ ဟွံအောန်နူကဵု (၂၀) ဝါ က္တဵုဒှ်လဝ်တုဲ ဟိုတ်နူပေါဲဗ္တိုက်ဏံတုဲ ညးဍုၚ်ကွာန်ဒေသ (၂၅၀၀၀) ပြၚ်ဝွံ ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံကဵု ဒၞါဲဒဵုဂြိုပ်ဂၞိၚ် မကြပ်တံရ။
အတိုၚ်စရၚ် ဒဵုကဵုဂိတုဖေဖဝ်ဝါရဳ (၂၀) ဏံဂှ်မ္ဂး ဟိုတ်နူပေါဲဗ္တိုက်ၜါလ္ပာ်တံတုဲ ညးဍုၚ်ကွာန်ပါဲဒဴဘဲပၞာန် နူပွိုၚ်ဍုၚ်ပဠဝ်ဂှ် (၂၀၀၀၀) ပြၚ်၊ ညးဍုၚ်ကွာန်ပါဲဒဴဘဲပၞာန် ပ္ဍဲပွိုၚ်ဍုၚ်တၞၚ်သဳဂှ် ဗ္ဒါဲ (၅၀၀၀) ၊ ညးဍုၚ်ကွာန်ပါဲဒဴဘဲပၞာန် ပ္ဍဲပွိုၚ်ဍုၚ်ထဝါဲဂှ် ဂၞန်ဂၠိုၚ်ကဵုကၠံနွံဂှ် ဂွံတီကေတ်ရ။
ဟိုတ်နူလၟိဟ်ညးဍုၚ်ကွာန်ပါဲဒဴဘဲပၞာန် မ္ဒးဂြိပ်ဒဴပါဲဒလေတ်ဒၟံၚ်တံ ဂၠိုၚ်ကၠုၚ်ဂှ်ရ နွံပၟိက်ဒၟံၚ်ကဵု ဒၞါဲမံၚ်စံၚ်၊ ဒၞါဲစ္ၜုဲစ္ၜော်၊ ယာတ်ကၞဴ ကေုာံ အရီုဗၚ်ဇွောံမစၞစတံရောၚ်ဂှ် ညးဒုၚ်တာလျိုၚ် လလောၚ်ပရိုၚ် တမ်ဒပ် (၁) ခရိုၚ်ဗိက် သ္ဂးရ။
မွဲလ္ပာ်ပၠန်ဂှ် ကရောံပေါဲဗ္တိုက်ၜါလ္ပာ်ဂှ် ဟိုတ်နူလ္ပာ်ကံၚ်ဇြဳပၞာန်တံ ကၟာတ်လဝ် အခေါၚ်ယိုက်ဏာနၚ် ဇွောံမ ကေုာံ ဂဥုဲဇဗဂမၠိုၚ်၊ ဟိုတ်နူကၟာတ်လဝ် ဂၠံၚ်ဍာန်တံဂှ်ရ ညးဍုၚ်ကွာန်ပါဲဒဴဘဲပၞာန်တံ သွက်ဂွံကလိဂွံအရီုဗၚ်ဂှ် သ္ၚောဲဒၟံၚ်ရ။
ပ္ဍဲရးဒေသတၞၚ်သဳဂှ် ဟိုတ်နူပေါဲဗ္တိုက်ၜါလ္ပာ် အပ္ဍဲပွိုၚ်ၜါသၞာံ ဒပ်ပၞာန်မသီလဝ်အဝဵုဂှ်တုဲ ညးဒဒိုက်ပါဲဒဴဘဲပၞာန် မ္ဒးဂြိပ်ဒဴပါဲဒလေတ်ဒၟံၚ်တံ နွံဒၟံၚ် (၇၀၀၀) ပြၚ်ဂှ် ပ္ဍဲဂိတုဖေဖဝ်ဝါရဳ (၆) တေံ လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)