သဓီု၊ ဖေဖဝ်ဝါရဳ (၂၁)
ပ္ဍဲလ္တူဂၠံၚ်ကွဳစက် လ္ဂုၚ်−မတ်မလီု ဗ္ဒါဲကွာန်တၟိ ကၟာဇြိုၚ်၊ ပွိုၚ်ဍုၚ်သဓီု၊ တွဵုရးဍုၚ်မန်ဂှ် ဟိုတ်နူရေၚ်ကွဳစက်ကံၚ်ဇြဳပၞာန် ဒးဒုၚ်ကြတ်ဗ္တိုက်ဂှ်ရ ကောန်ဂကောံဒပ်ကံၚ်ဇြဳပၞာန် (၇) တၠ ချိုတ်အာလဝ်ဂှ် ဥက္ကဌ ကမ္မတဳကောပ်ကာဲမိတ် ခရိုၚ်သဓီု KNU ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဂိတုဖေဖဝ်ဝါရဳ (၁၉) အခိၚ်ဗ္တံ ၜိုတ် (၈) နာဍဳဂှ် ဂကောံဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA တံ ကြဴနူဗ္တိုက်ဗ္တိုဟ်မာၚ် ကုရေၚ်ကွဳစက်ကံၚ်ဇြဳပၞာန် ကွဳစက်ကံၚ်ဇြဳပၞာန် (၅) ဖ္ဍိုက်မပါဗက် မဒဳကၠုၚ် နူကဵုသဓီု အာလ္ပာ်ပွိုၚ်ဍုၚ်ၜဳကလေၚ်ဂှ်တုဲဂှ် ပန်ပှော်ဗ္တိုက်လဝ် နကဵုလွဟ်ဇၞော်၊ လွဟ်ဍောတ်တံရ။
ဟိုတ်နူပရေၚ်ဗ္တိုက်ဂှ်တုဲ ပရေၚ်ပန်ပှော် မွဲလ္ပာ်ကုမွဲလ္ပာ်ဂှ် က္တဵုဒှ်လဝ် လလအ်ပွိုၚ်ဘာ်နာဍဳတုဲ လ္ပာ်ကံၚ်ဇြဳပၞာန်ဂှ် ဇီုကပိုက်ပြဟ်လလုဲဂၠိုၚ်လဝ်ရ။
ပ္ဍဲကဵုပရေၚ်ပန်ပှော်ၜါလ္ပာ်ဂှ် ကွဳစက်ဗၞိက်ကောန်အရာပ်မွဲဖ္ဍိုက် မဒဳကၠုၚ် လ္တူဂၠံၚ်ကွဳစက် လ္ဂုၚ်−မတ်မလီုဂှ် ကြေပ်အကြာတုဲ ဒးဒုၚ်ဗ္တိုက်လဝ်ဂှ်ရ ညးဒဳကွဳစက်မွဲတၠ ချိုတ်အာလဝ်ရ။
ပ္ဍဲပရေၚ်ဗ္တိုက်ဏံဂှ် ဟိုတ်နူကောန်အရာပ်မွဲတၠ ချိုတ်အာလဝ်တုဲ ဒဒှ်ရစိုတ်ဟွံမိပ်လးလးဂှ်ကီု၊ နကဵုညးဍုၚ်ကွာန်တံ လ္ပအာကၠုၚ် ကြပ်ပ်ကဵုဒပ်ကံၚ်ဇြဳပၞာန်တံအိုတ်ဂှ် ဥက္ကဌ ကမ္မတဳကောပ်ကာဲကေၚ်ကာမိတ် ခရိုၚ်သဓီု KNU ဒုၚ်လဝ်ဂုဏ်နမေတ္တာရ။
မၞိဟ်ဒဳယာန် မဒးချိုတ်အာ အပ္ဍဲပရေၚ်ပန်ပှော်ၜါလ္ပာ်ဂှ်ဝွံ ဒှ်ကိုဝ်မေန်နာၚ်ထောန် (ခ) ဝက်ကလေး အာယုက် (၃၄) သၞာံ ဒၟံၚ်ကွာန်သူတက်၊ ပွိုၚ်ဍုၚ်ကဗလူ၊ ရးဒေသဇၞော်သက်ကိုၚ်ဂှ် ဂွံတီကေတ်ရ။
ပ္ဍဲကဵုအကံက်ထလဳဂရာမ် တြးဝါဒကံၚ်ဇြဳပၞာန်တံဂှ် ကိုဝ်နာၚ်မေန်ထောန် မချိုတ်အာဂှ် ဂကောံဒပ်ပံၚ်ကောံ KNU, PDF တံ ပန်ဂစိုတ်လဝ်ရောၚ် ရဴဝွံ ချူတြးဒၟံၚ်အိုတ်ရ။
ပ္ဍဲလ္တူဂၠံၚ်ဇၞော် လ္ဂုၚ်−မတ်မလီုဂှ် ကြဴနူဒပ်ပၞာန်သီအဝဵုတုဲဂှ် ဒပ်ကံၚ်ဇြဳပၞာန်တံ ဒးဒုၚ်ဗ္တိုက်ဒၟံၚ် မွဲဏှမွဲဏှတုဲ ပ္ဍဲပရေၚ်ဗ္တိုက်တံဏံဂှ် ကောန်အရာပ်ဇီုကပိုက်ချိုတ်တံလေဝ် နွံဒၟံၚ်ရ။
ပရိုၚ်−သြၚ်လောန်တိုၚ်(မ်)