ပဠဝ်၊ ဖေဖဝ်ဝါရဳ(၂၁)
ပ္ဍဲကွာန်ကဒေဝ် ပွိုၚ်ဍုၚ်ပလဝ်၊ ရးဒေသဇၞော်တၞၚ်သဳ ဒပ်ကံၚ်ဇြဳပၞာန်သီအဝဵု လုပ်စိုပ်စံၚ်ပလီုလဝ်ဂှ် သ္ၚိဒၟံၚ်တူပၟတ် လီုလာ်အာ စဵုကဵု (၁၆၅) မ နွံကၠုၚ်ရဂှ် ညးဒေသတအ်ကီု သီုကဵုခရိုၚ်ဗိက် တံဒပ်လၟိဟ် (၁) ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
တုဲကၠုၚ် ပ္ဍဲဂိတုဖေဖဝ်ဝါရဳ စၟတ်တ္ၚဲ (၁၅) ဂှ် ဒပ်ကံၚ်ဇြဳပၞာန် ထ္ပက်လုပ်ကၠုၚ်ကရောၚ်ပၞာန် ဇြဟတ်ဒပ်ပါလုပ် (၂၀၀) ပြၚ်တုဲ စံၚ်ပလီုလဝ်သ္ၚိဌာန် ပ္ဍဲကွာန်ကဒေဝ် လၟိဟ်သ္ၚိမၞုံ (၄၀၀) ပြၚ်ပြၚ်ဂှ်ရ။
ပ္ဍဲဂိတုဖေဖဝ်ဝါရဳ တုဲကၠုၚ် စၟတ်တ္ၚဲ (၁၆) ကဵုစၟတ်တ္ၚဲ (၁၇) ဖျေံဗ္ဒပ် ဖျေံလဝ်သ္ဇိုၚ် ပ္ဍဲကွာန်ကဒေဝ် ပွိုၚ်(၂)တ္ၚဲတုဲ ဟိုတ်နူဒပ်ကံၚ်ဇြဳပၞာန် စံၚ်ပလီုလဝ် သ္ၚိဌာန်ညးဍုၚ်ကွာန်တအ်ဂှ်ရ သ္ၚိဒၟံၚ် (၁၆၅) မ ပါလုပ်သီုဘာလကျာ်မွဲဘာ ဒးတူပၟတ်လီုလာ်အာလဝ်ရ။
ကွာန်ကဒေဝ် ဒးဒုၚ်စံၚ်ပလီုလဝ်ပၟတ်ဂှ် ကြဴနူဒပ်ပၞာန်သီအဝဵုတုဲ အကြာဒပ်ကံၚ်ဇြဳပၞာန်ကဵု ဒပ်စဵုဒၞာညးဍုၚ်ကွာန်ပံၚ်ကောံတအ် ပေါဲဗတိုက်က္တဵုဒှ်လဝ်တုဲ ဒှ်ကွာန်ဒးဂြိပ်ဒဴ ဓလေတ်ပါဲဒၟံၚ် သီုအလုမ်မွဲကွာန်ရ။
ကွာန်ကဒေဝ် ဒပ်ကံၚ်ဇြဳပၞာန် စံၚ်ပလီုဏာလဝ်ဏံ ပ္ဍဲဂိတုဖေဖဝ်ဝါရဳ တုဲကၠုၚ် စၟတ်တ္ၚဲ (၁၈) တေံ ဒပ်ပံၚ်ကောံ ဒပ်စဵုဒၞာညးဍုၚ်ကွာန်တအ် ကလေၚ်ထိၚ်ဒဝ် မာန်ကၠုၚ်လဝ်တုဲ ကၠောန်သ္ပဒၟံၚ် ပရေၚ်သ္အးဇ္ၚးတိဍာ်ရဂှ် ညးတာလျိုၚ်လလောၚ်ပရိုၚ် ခရိုၚ်ဗိက် တံဒပ်လၟိဟ်(၁) ဟီုသ္ဂးလဝ်ရ။
ပ္ဍဲကဵုပေါဲဗတိုက်ကွာန်ကဒေဝ်ဂှ် ဒပ်ပံၚ်ကောံပရေၚ်စဵုဒၞာညးဍုၚ်ကွာန်တအ် ဒးဗလးတဲ ဗ္ဒပ်မုက်ပၞာန် မွဲဗ္ဒပ်တုဲ ဒးဒုၚ်သီလဝ် ကွဳစက် (၃) ဖ္ဍိုက်ကီု သီုကဵုလွဟ်လက်နက်လ္ၚဵုတအ်ဂှ်ရ။
အတိုၚ် Southern Monitor မဒှ်ဂကောံသုတေသန ဟီုသ္ဂးလဝ်မ္ဂး ပ္ဍဲရးဒေသဇၞော်တၞၚ်သဳဂှ် နူကဵုသၞာံ ၂၀၂၁ ဂိတုသေတ်တေမ်ဗာ ဒပ်ပၞာန်သီအဝဵုတုဲဂှ် စဵုကဵုဂိတုဂျာန္နဝါရဳ သၞာံဏံအိုတ် သ္ၚိဒၟံၚ် (၂၂၉) မ ဒးဒုၚ်စံၚ်ပလီုလဝ်ရဂှ် လလောၚ်တြးလဝ် ပ္ဍဲဂိတုဖေဖဝ်ဝါရဳ စၟတ်တ္ၚဲ (၆) ဂှ်ရ။
ပရိုၚ်-သြၚ်လောန်တိုၚ်(မ်)