ပျုၚ်ယာမ်- ဖေဖဝ်ဝါရဳ(၂၁)
ဟိုတ်နူကိုဝ်ရဳယျာသၟဝ်ကျာ ဂလိုၚ်ပတိုန်ဇြဟတ်လက်နက်နျူကလဳယျာတုဲ ပ္ဍဲဒေသအာယှ-ပသိဖုက်ဂှ် မွဲကရောံကဵု ပရေၚ်ကြံၚ်မ္ၚိုဟ် သ္ကာတ်မြဟ်ဂှ် ညးမဒှ်ဒေံဗြဴကေန်ဂျုၚ်အွောန် ပလေဝ်ပလေတ်ဒၟံၚ် သွက်ဂွံစဵုဒၞာဇကုဇကု ပ္ဍဲတ္ၚဲစမ်ၜတ်ကမ်သၠောဝ်ရဂှ် ကဵုကၠုၚ်သတိ ကုအမေရိကာန်ရ။
ပ္ဍဲသတ္တာဟတုဲကၠုၚ်ဏံ ကိုဝ်ရဳယျာသၟဝ်ကျာ ထပ်ပန်ဗလးဏာ ကမ်သၠောဝ်ထိၚ်သၞေဝ် ပ္ဍဲဗလးအပိုၚ်ခြာဍာ်ဂျပါန် ပိဖ္ဍိုက်ပၠန်ရဂှ် ဒပ်ကၚ်ပြၚ်က္ၜဳဂျပါန် သ္ပကၠုၚ်လဝ်ဒ္တန်တုဲ ကြဴနူကိုဝ်ရဳယျာသၟဝ်ကျာ ပန်ဗလးပ္တိတ် ကမ်သၠောဝ်ပန်တိုက် (ICBM) Hwasong-15 တုဲ က္တဵုဒှ်မံက်တိတ်ကၠုၚ်ရ။
ဟိုတ်နူပရေၚ်စမ်ၜတ်ဏံတုဲ အမေရိကာန်ပဝ်ကလာၚ်လဝ် က္ၜၚ်ကျာပန်ခရာဇမ္ၚောဲ ပြဟ်လတူနူရမျှာၚ် မွဲကရောံကဵု က္ၜၚ်ကျာပၞာန် ကိုဝ်ရဳယျာသၠုၚ်ကျာ ကေုာံဂျပါန်တအ်ရဂှ် ဂွံတီကေတ်ရ။
က္ဍိုပ်သ္ကိုပ်ကိုဝ်ရဳယျာသၟဝ်ကျာ ကေုာံဒါရိုက်တာ ကဝ်မတဳကေၚ်ကာဗဟဵု ဗော်သၟာကမၠောန်ကိုဝ်ရဳယျာ ဌာနဒုတိယ ကေန်ယိုဝ်ဂျောန်တအ်ဂှ် ပျုၚ်ယာန်ဏံ ကလေၚ်ပလန်အာတဲပရေၚ်ဘပဠတိုက်ရိုက် ဟွံသေၚ်မ္ဂး ဗွဲပြယာဲဒလိန်ဒလာဲ သီုဖအိုတ်ရောၚ်ဂှ် ကဵုလဝ်သတိ ကုအမေရိကာန်ရ။
“လၟိဟ်ပိုဲပန်ပှော် ဒေသပသိဖုက်ဂှ်ဂှ် တုဲတဴကဵုတၚ်ချဳဒရာၚ် ဒပ်အမေရိကာန်တအ်ရ” ဂှ် ဂွံတီကေတ် အတိုၚ်တၚ်လလောၚ်တြးကေန်ယိုဝ်ဂျောန် ညးဒးဒုၚ်ပတှ်ေကေတ်လဝ် မၞိဟ်သွက်ဂွံဆက်ဒုၚ်ကေတ်တဲ ဌာနန္တရက္ဍိုပ်သ္ကိုပ်ကိုဝ်ရဳယျာသၟဝ်ကျာမာန်ဂှ်ရ။
ပ္ဍဲဒၞာဲပရေၚ်ကြံၚ်မ္ၚိုဟ်တအ် သၠုၚ်ဂၠိုၚ်တိုန်ကၠုၚ်ဒၟံၚ်ဂှ် သွက်ဂွံကလေၚ်ကဵု အတိုၚ်ၚုဟ်မးကမၠောန်ပြဝဍေံတအ်ဂှ် ဆန္ဒပျုၚ်ယာမ် ဟွံပြံၚ်သၠာဲရဂှ် ညးဟီုသ္ဂးလဝ်ဏီရ။
ဟီုတးပါဲလဝ်ပရိုၚ်မ္ဂး အတိုၚ်တဳအိုဝ်ရဳ ဗ္ဂပ် ICBM စိုပ်ဒဵုအမေရိကသၟဝ်ကျာမာန် ဟွံအံၚ်ဇၞးကၠုၚ်လဝ်ဂှ်တုဲ ဟီုပျုတ်ဗ္ဒေက်လဝ် ညးဆိုက်ဗ္ဒက် ပ္ဍဲနျူကလဳယျာတုဲ လက်နက်တအ်ဂှ် ဒှ်ပရေၚ်ဘပဠအမေရိကာန်ရဂှ် ဟီုသ္ဂးလဝ်ရ။
“လညာတ်သမ္တီဟၟဲတုဲ ပရေၚ်ကယျာန်ဓဝါတ်ညးပတောံလဝ် မၞိဟ်စဳကၠးတအ်ဗီုဏံဂှ် ပြံၚ်သၠာဲကဵု ပရေၚ်ကြေပ်ဂြတ်အမေရိကာန် ကေုာံကိုဝ်ရဳယျာသၠုၚ်ကျာ မာန်ဟွံသေၚ်ရ” ဂှ် ကေန်ယိုဝ်ဂျောန် ဟီုသ္ဂးလဝ်ရ။
အခိၚ်လၟုဟ်ဏံ ပ္ဍဲကိုဝ်ရဳယျာသၟဝ်ကျာ ပိုၚ်ပြဳလဝ် နဲကဲကွတ်ပညာ ကေုာံအစောန်စရာဲဍာ်ဒကေဝ် ပရေကဵုစိုတ်မာန်ဒၟံၚ်ယျတုဲ သွက်ဂွံဂလိုၚ်ပတိုန် ဗၞတ်ဗ္ၜတ်ဇြဟတ်ဂှ် ကၠေံအာစိုတ်ကီု နကဵုဂကောံမဟာမိတ်အ်လေဝ် စၞးဒးဒှ်ဂဝိၚ် ဂွိၚ်ဂွာဲဒၟံၚ်ကဵုနဲကဲကွတ်ပညာညးတၞဟ်ဂှ် ဒးထိၚ်လဝ် ကၠေၚ်က္ဍဟ်ဇကု ညံၚ်ဂွံခိုဟ်တိုန် သွက်ဂွံစဵုဒၞာဇကုဇကုရောၚ်ဂှ် ဟီုသ္ဂးလဝ်ရ။
ပရေၚ်ကိုဝ်ရဳယျာသၟဝ်ကျာ ပန်ဗလးဏာကမ်သၠောဝ်ဂှ် ဒှ်ပရေၚ်စမ်ၜတ်လွဟ်လက်နက်အဓိက မရနုက်ကဵုအလန်တတိယတုဲ ကမ်သၠောဝ် Hwasong-15 ဂှ် ပဝ်တိုန်အာ စဵုကဵုသၠုၚ် (၅၇၆၈) ကဳလောမဳတုဲ ပ္ဍဲကဵုဗလးဍာ် ခရာ(၉၈၉)ကဳလောမဳတာ ဟွံဒးလဝ် ဒၞာဲဨရိယာ ပရဟ်ဒုၚ်စၟတ်သမ္တီလဝ်ရဂှ် ဂွံတီကေတ်ရ။
ပရေၚ်စမ်ၜတ်နျူကလဳယျာ ကိုဝ်ရဳယျာသၟဝ်ကျာ မရနုက်ကဵုအလန်သတ္တမ က္တဵုဒှ်ကၠုၚ်အခိၚ်ဟွံရုဲဂှ် ယဝ်ကၠောန်ကၠုၚ်မ္ဂး ဒှ်ကၠုၚ်ပရေၚ်ကၠောန်ဗဒှ်သုၚ်စောဲ မကမ်သၠောဝ်နျူကလဳယာ စှ်ေကိုန်ဗျူဟာ ကိုဝ်ရဳယျာသၟဝ်ကျာမွဲ မာန်ရောၚ်ဂှ် ဝန်ဇၞော်ပရေၚ်ဍုၚ်သ္အာၚ် ကိုဝ်ရဳယျာသၠုၚ်ကျာ Park Jin ဟီုသ္ဂးလဝ် ပ္ဍဲကောံဓရီုဂီုကၠီုမျူနေတ်ရ။
Ref,Telegraph