လ္ဂုၚ်၊ ဖေဖဝ်ဝါရဳ (၂၂)
ကတိကဝတ်ပရေၚ်ဍုၚ်ကွာန်တံဂှ် ကေတ်တၚ်တုပ်စိုတ်ဗွဲမပြဟ်တုဲ သံသယနွံမံၚ် အကြာညးသ္ကအ်တံဂှ် ဖအိုတ်ကၠေံတုဲ သွက်ဂွံသရိုဟ်ဖျေံဂကောံပၞာန်ဂှ် စိုပ်အခိၚ်ဒးပံၚ်တောဲညးသ္ကအ်ယျရောၚ် သမ္မတယာယဳ အလဵုအသဳညဳသၟဟ်ဂကူ NUG ဒူဝါလယှဳလ ဟီုရ။
ပ္ဍဲကဵုကောံဓရီု ဂကောံအလဵုအသဳညဳသၟဟ်ဂကူ မရနုက်ကဵု (၇) ဝါ မကၠောန်ဗဒှ်လဝ် ပ္ဍဲဂိတုဖေဖဝ်ဝါရဳ (၂၁) အခိၚ်ပယျာံဂယးဂှ် ဟီုလဝ် ဗီုလၟုဟ်ရ။
သမ္မတယာယဳ ဒူဝါလယှဳလဂှ် သွက်ဂွံဆက်ဆောံ ကုဂကောံပၠန်ဂတးရပ်လွဟ်ကောန်ဍုၚ်အရၚ်တံ ညံၚ်ဂွံပြေပြံၚ် ဗွဲမပြဟ်ဂှ်ကီု၊ သွက်ဂွံကေတ်ကဵုတၚ်တုပ်စိုတ် ကတိကဝတ်ပရေၚ်ဍုၚ်ကွာန် မဒုၚ်ကဵုလျိုၚ် သွက်ကၟိန်ဍုၚ်ပံၚ်ကောံဖေဝ်ဒရာ အနာဂတ်တေံ ဗွဲမပြဟ်ဂှ် ဖ္တိုက်ဖ္အောဝ်လဝ်ရ။
သ္အာၚ်နူဂှ်ပၠန် ဂကောံပၞာန်ဝွံ အတိုၚ်နဲဗျူဟာ ဍေံတံ မစကာဒၟံၚ်လၟိုန်တံဂှ် ဟိုတ်နူကၠောန်ပါ်ထ္ကးဒၟံၚ်ဆီ အကြာဂကောံဇြဟတ်ပၠန်ဂတးတံကဵု ညးဍုၚ်ကွာန်တံလၟေၚ်ၚ်ဂှ်ရ ညံၚ်ဟွံဂွံဗက်ဒး လက္ကရဴအလီဠာန်ပၠာံဗ္ဇး ဂကောံပၞာန် မဓဇက်ကော်တံဂှ် ဒးစွံသတိရောၚ် သ္ဂးရ။
အဳယူ ကေတ်အရေဝ်တပ်ဒဏ် ကုကံၚ်ဇြဳပၞာန်ဂှ်ဝွံ သွက်ဂွံဒေါအ်ထောံ ဒဒှ်မပၠောပ်ဒၟံၚ် ကၠေၚ်က္ၜၚ်ကျာ အလုံညးဍုၚ်ကွာန်တံ မမၚ်စၟဳဖ္တိုက်ဖ္အောဝ်ဒၟံၚ်ဂှ်ကဵု သွက်ဂွံကေတ်ကဵုဒုဟ် ကုညးမပၠောပ်ပ္တိုန်နၚ်တံဂှ် ပါလုပ်တုဲ သီုကဵုကေတ်လဝ်ဒုဟ် ကုကမ္ပဏဳ ကေုာံ ညးစအကြာလွဟ်လက်နက်တံဂှ်ရ EU ကေတ်ဒုဟ်အလန်ဏံဂှ် တၚ်တဴဂုဏ် သ္ပစၟတ်သမ္တီ စၞးညးဍုၚ်ကွာန်ဍုၚ်ဗၟာတံရောၚ်ဂှ် သမ္မတယာယဳ ဒူဝါလယှဳလ ဟီုဂးလဝ်ရ။
ကောံဓရီု အလဵုအသဳညဳသၟဟ်ဂကူဂှ် သမ္မတယာယဳ ဒူဝါလယှဳလ၊ သ္ကိုပ်ဝန်ဇၞော် မာန်ဝေန်ခိုၚ်တာန် မပါလုပ် သီုကဵုဝန်ဇၞော်ကၟိန်ဍုၚ်ဂမၠိုၚ်၊ ဒုဝန်ဇၞော်ဂမၠိုၚ်တံ တိုန်စိုပ်လဝ်ဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)