ပ္ဍဲပွိုၚ်ဍုၚ်တၞၚ်သဳဂှ် ဟိုတ်နူပရေၚ်ပန်ပှော်လွဟ်ဇၞော် ဒပ်ပၞာန်တုဲ ဘာဗ္တောန်လိက် ကေုာံ သ္ၚိဒၟံၚ်ဂမၠိုၚ် ဇီုကပိုက်လီုလာ်လဝ်

တၞၚ်သဳ၊ ဖေဖဝ်ဝါရဳ (၂၂)

ပ္ဍဲကွာန်ဗာန်လဝ်၊ ပွိုၚ်ဍုၚ်တၞၚ်သဳ၊ ရးဒေသဇၞော်တၞၚ်သဳဂှ် ဟိုတ်နူဒပ်ကံၚ်ဇြဳပၞာန် ပန်ပှော်လဝ် လွဟ်ဇၞော်တံဂှ်ရ သီုကဵုဘာဗ္တောန်လိက် ပါလုပ်ဂှ် သ္ၚိဒၟံၚ် (၅) မဟွံအောန် ဇီုကပိုက်လီုလာ်အာလဝ်ဂှ် ဂကောံဒပ်စဵုဒၞါဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ပ္ဍဲဂိတုဖေဖဝ်ဝါရဳ (၁၈) တုဲကၠုၚ်တေံ ကြဴနူဂကောံဒပ်ပံၚ်ကောံ စဵုဒၞါဒေသတံ ကြတ်ဗ္တိုက် ရေၚ်ကွဳစက်ကံၚ်ဇြဳပၞာန် မကၠုၚ်ပလံၚ်ဇွောံမ နူလ္ပာ်ဗိက် အပ္ဍဲပွိုၚ်ဍုၚ်တၞၚ်သဳတုဲဂှ် နူကဵုတမ်ဒပ်ဖျေံသ္ဇိုၚ်ကံၚ်ဇြဳပၞာန်တံ ဘိုၚ်ပန်ကဵုလဝ် နကဵုလွဟ်ဇၞော်တံရ။

မကမ်လွဟ်ဇၞော် နူကဵုဒပ်ကံၚ်ဇြဳပၞာန်တံ မဘိုၚ်ပန်ကဵုလဝ်ဂှ်ဝွံ ဟိုတ်နူဒတုံဗ္တိုဟ်ထ္ကးအာလဝ် အပ္ဍဲကွာန်ဗာန်လဝ်ဂှ်ရ ဘာဗ္တောန်လိက်တန်ဒေါဝ်မွဲဘာကဵု သ္ၚိဒၟံၚ်တံ ၜိုန်ရဇီုကပိုက်လီုလာ်လဝ်ကီုလေဝ် မၞိဟ်ဂွံဝပ်ဇီုကပိုက် ဟွံမွဲပုဟ်ဂှ် ဂွံတီကေတ်ရ။

ဒပ်ကံၚ်ဇြဳပၞာန် မဒးဒုၚ်ဗ္တိုက်ဗ္တိုဟ်မာၚ်ဂှ်ဝွံ ကြဴနူပရေၚ်ပန်ပှော်တုဲဂှ် လုပ်စိုပ်ကၠုၚ် အပ္ဍဲကွာန်တုဲ သီုကဵုကေတ်ဏာလဝ် ကပေါတ်မၞုံကဵုၚုဟ်မး နူကဵုသ္ၚိဒၟံၚ်ညးဒေသတံဂှ် သ္ဂးရ။

ဘာဗ္တောန်လိက် ကွာန်ဗာန်လဝ် သ္ၚိဒၟံၚ် (၄၀၀) ပြၚ်မၞုံဂှ်ဝွံ ဒှ်ဘာဗ္တောန်လိက် ကွးဘာ (၂၀၀) ပြၚ် မတိုန်စိုပ်ကတ်ဗ္တောန်ဒၟံၚ်ပညာမွဲကီုလေဝ် ကြဴနူဒပ်ပၞာန်သီအဝဵုတုဲဂှ် ဟိုတ်နူမၞိဟ်တိုန်ဘာဟွံမွဲတုဲ ဒးကၟာတ်လဝ်ဘာရ။

မွဲကရောံကဵု ပရေၚ်ပန်ပှော်ၜါလ္ပာ် အကြာဒပ်ကံၚ်ဇြဳပၞာန်ကဵု ဒပ်စဵုဒၞါဒေသတံဂှ် ဟိုတ်နူလ္ပာ်ဒပ်ကံၚ်ဇြဳပၞာန်တံ ပန်ပှော်လွဟ်ဇၞော်တံဂှ်ရ ညးဒေသ မ္ဒးဂြိပ်ဒဴပါဲဒလေတ်ဒၟံၚ်တံဝွံ ပ္ဍဲဂိတုဖေဖဝ်ဝါရဳ (၂၀) ဂှ် ကလေၚ်စဴမံၚ်ဒၟံၚ် အပ္ဍဲကွာန်အိုတ်ယျဂှ် ဂွံတီကေတ်ရ။

ပ္ဍဲဂိတုဂျာန္နဝါရဳတုဲကၠုၚ်တေံဂှ်လေဝ် ပ္ဍဲကွာန်ဗဝ်ဓိကာန်၊ ကွာန်ညံၚ်ပေန်ကွေန်၊ ပွိုၚ်ဍုၚ်တၞၚ်သဳဂှ် ပေါဲဗ္တိုက် က္တဵုဒှ်လဝ်တုဲ ဟိုတ်နူဒွံဒး လွဟ်ဇၞော် ဒပ်ကံၚ်ဇြဳပၞာန်တံဂှ်ရ ညးဒေသဂမၠိုၚ် ဇီုကပိုက်ချိုတ်ဂျိုၚ်တံနွံတုဲ သ္ၚိဒၟံၚ် ဟွံအောန်နူကဵု (၁၀) မ ဇီုကပိုက်လီုလာ်အာလဝ်ရ။

ပရိုၚ်−သြၚ်လောန်တိုၚ်(မ်)