က္ၜၚ်ကံက်-ဖေဖဝ်ဝါရဳ (၂၂)
စပ်ကဵုပေါဲရုဲမာဲကၟိန်ဍုၚ်သေံတုဲ ပ္ဍဲအရာကံက်ပကောံတၚ်ဂၞၚ်မွဲ သွက်ဌာနန္တရသ္ကိုပ်ဝန်ဇၞော်ညးဍုၚ်ကွာန် ဍုက်က္ၜၚ်ကံက်မွဲ ရုဲစှ်လဝ်ဂှ်မ္ဂး ဖေဝ်တုမ်တာန်ယှေန်နာဝါထရာ က္ဍိုက်ဒၟံၚ်က္ဍိုပ်တုဲ ပရာယော်သ္ကိုပ်ဝန်ဇၞော်လၟုဟ်ဏံ မၞိဟ်ရုဲစှ်အောန်ကြဳဒၟံၚ်ရဂှ် ဂွံတီကေတ်ရ။
ပ္ဍဲညးကဵုသွဟ် (၁၅၇၁)တၠဂှ် ညးမဒှ်ကောန်ဝုတ်တက်ဇြေန် သ္ကိုပ်ဝန်ဇၞော်တြေံ ဖေဝ်တုမ်တာန် က္လိဂွံလဝ် (၂၈.၅)တၟံကၠံတုဲ မာဿတာပရာယော်ဂှ် ဂွံလဝ် (၂၅.၇) တၟံကၠံရ။
အေန်သတဳကျုတ်ကောန်ဂကူ ဖန်ဇန်ကောပ်ကာဲ ပရေၚ်ဖောအ်ဗြေဝ်ကၟိန်ဍုၚ်သေံ က္ဍိုက်လဝ်က္ဍိုပ်တုဲ ပ္ဍဲအကံက်စရၚ်တၚ်ဂၞၚ် ကံက်ကေတ်လဝ် ပ္ဍဲဂိတုသေတ်တေမ်ဗာ သၞာံတုဲကၠုၚ်တေံဂှ်လေဝ် ဓမံက်ထ္ၜးလဝ်ပရာယော် သ္ကိုပ်သ္ကဒပ်ပၞာန် အာယုက်(၆၈)သၞာံ က္လိဂွံလဝ်ဆန္ဒမာဲ အောန်နူကဵု ဆန္ဒမာဲညးဍုၚ်ကွာန်ကဵုလဝ် ဖေဝ်တုမ်တာန် အာယုက် (၃၆)သၞာံ ကဝက်ရဂှ် ဓမံက်ထ္ၜးလဝ်ရ။
အကံက်တၚ်ဂၞၚ် ကံက်ကေတ်လဝ်အခိၚ်လၟုဟ်ဏံဂှ် အေဂျေန်ဇြဳသုတေသနပုဂ္ဂလိက Super Poll ကၠောန်ဗဒှ်လဝ်တုဲ မၞိဟ်သွဟ်ကဵုလဝ် ပိဂအုမ် မွဲဂအုံတအ်ဂှ် ရုဲစှ်လဝ် မာဿတာပရာယော်ဂၠိုၚ်အိုတ်တုဲ မၞိဟ်သွဟ်လဝ်လတူဍုၚ် (၂၁.၃)တၟံကၠံတအ်ဂှ် ရုဲစှ်လဝ်မေဿတာဖေဝ်တုမ်တာန်ရဂှ် ဂွံတီကေတ်ရ။
ပ္ဍဲမ္ၚးဨရိယာဍုၚ်က္ၜၚ်ကံက်ဂှ် မေဿတာဖေဝ်တုမ်တာန် ပိုၚ်ပြဳလဝ် ပရေၚ်ညးဍုၚ်ကွာန်ရုဲစှ်လဝ် စဵုကဵု(၂၉.၉)တၟံကၠံတုဲ မာဿတာပရာယော်ဂှ် (၂၄.၃)တၟံကၠံဟေၚ် ပိုၚ်ပြဳလဝ်ရ။
ပေါဲရုဲမာဲဍုၚ်သေံ မဒှ်ကၟိန်ဍုၚ်ပိုၚ်ပြဳလဝ် ပရေၚ်ပိုန်ဒြပ်အာယှဒိုဟ်အဂၞဲ မရနုက်ကဵုဒုတိယဂှ် သွက်ပၞေတ်တိပရေၚ်ထုဲဓရုဲပရေၚ်ဍုၚ်ကွာန် က္တဵုဒှ်လဝ်ပွိုၚ် (၁၇) သၞာံဂှ် ထ္ၜးပျးအာ ပရေၚ်ပြိုၚ်ပ္ကာန်သ္ကာတ်မြဟ်ရောၚ်ဂှ် ဟီုသ္ဂးလဝ်ရ။
ဗော်ဖဳယူထိုၚ် မေဿတာဖေဝ်တုမ်တာန်က္ဍိုက်က္ဍိုပ် ပ္ဍဲကၟိန်ဍုၚ်သေံဒိုဟ်ဨသာန်ဂှ် ဒယှ်တှ်ဇြဟတ်ဇၞော်ဒၟံၚ်တုဲ ဇၟာပ်ပ်ပေါဲရုဲမာဲအံၚ်ဇၞးကၠုၚ်လဝ်တုဲဂှ် မွဲကရောံကဵု ပရေၚ်ဒးဒုၚ်စောဲဂဗုတ် သီုကေၚ်ဒးဒုၚ်ပါဲတးဖျေံ နူဒဒှ်အလဵုအသဳရ။
မာဿတာပရာယော် ပြံၚ်ကၠောံအာ ဗော်တၟိတုဲ လုပ်ပြိုၚ်ပေါဲရုဲမာဲဂှ် နူသၞာံ ၂၀၁၄ တေံ ပါဲဖျေံလဝ်ဂကောံအလဵုအသဳ ယှေန်နာဝါထရာ ညးမဒှ်ဣစဳဖေဝ်တုမ်တာန် က္ဍိုက်က္ဍိုပ်ပရေၚ်ပၞာန်သီအဝဵုတုဲ ဒှ်ညးကေတ်လဝ်အဝဵုမွဲတၠရ။
ဖေဝ်တုမ်တာန် ညးမဒှ်ကောန်ဝုတ်တက်ဇြေန် က္လိဂွံလဝ်ပရေၚ်ညးဍုၚ်ကွာန်တအ်ရုဲစှ် သၠုၚ်အိုတ်ဂှ် ပရေၚ်ဒပ်ပၞာန်လုပ်အကြာ ရေၚ်တၠုၚ်ကဵုဂှ် ကလေၚ်တံၚ်ဂြဲဖျေံကၟိန်ဍုၚ်သေံ ညံၚ်ဂွံဆုတ်ကလေၚ်အာတုဲ အခိၚ်ဏံဂှ် သွက်ဂွံဖအိုတ်ကၠေံ ပြသၞာဟွံသၟဟ်ညဳ တၞဟ်ခြာ က္တဵုဒှ်ကၠုၚ်ဒၟံၚ် အခိၚ်လအ်လတအ်ဂှ် ဒှ်ကၠုၚ်သွက်ပရေၚ်ပြံၚ်သၠာဲရဂှ် ဟီုသ္ဂးလဝ်ကဵု ဌာန်ပရိုၚ်ရိုက်တာရ။
Ref,Straist Times