ကျောက်ထု -ဖေဖဝ်ဝါရဳ(၂၂)
ရးဒေသမဂွေ၊ သ္ၚုကီု သီုကဵုကၞောန်သ္ၚု ပ္ဍဲပွိုၚ်တိုက်ကျောက်ထုဂှ် ပတမ်နူ ဂိတုမာတ်ချ် စၟတ်တ္ၚဲ(၁)တုဲ ကၟာတ်လဒဵုလဝ် အခေါၚ်ပ္ဍိုက်ပ္တိတ်သွံရာန် မ္ၚးပွိုၚ်တိုက်ရဂှ် ဂကောံအုပ်ညးဍုၚ်ကွာန် ပွိုၚ်တိုက်ကျောက်ထု လလောၚ်တြးလဝ်ရ။
အခိၚ်လၟုဟ်ဏံဂှ် ကံၚ်ဇြဳပၞာန်ကၠောန်ဒၟံၚ် ဗပိုတ် ပန်ဗပိုတ် ပ္ဍဲကဵုပွိုၚ်တိုက်ကျောက်ထုဂှ်ရ နူကဵုဒေသသြောံသ္ၚုတိတ်ဂၠိုၚ်ဂှ် ဂွံပ္ဍိုက်ပၠုပ်နၚ် ပ္ဍဲပွိုၚ်တိုက်ကျောက်ထု ဒၟာနူဒှ်ဒၟံၚ်အခက်ခုဲဂှ်ရ လလောၚ်တြးကၠုၚ်သာ်ဏံရဂှ် ဟီုသ္ဂးလဝ်ရ။
“ဗီုပြၚ်ဖျေံသ္ဂုတ်သွာတ် ကောံဓရီုဂှ် ပ္ဍဲမွဲကာလ အခိၚ်ပၠန်ဂတးဏံ နူကဵုဒေသသြောံသ္ၚုတိတ်ဂၠိုၚ် ဗီုကဵုပခုက္ကူ၊ ချောက်တအ်ဂှ် လောန်ၜက်သၞေဟ်ကၚ်တယျေတ်ဘော ဍုၚ်ပေါက်တုဲ ပ္ဍိုက်ဏာဟွံဂွံရ။ စခတအ် သ္ပလဝ်ဗပိုတ် ပန်ဗပိုက်ကဵုရးယျဝ်ပိုဲရ။ ဂုဏ်နူဂှ်ရ သွက်ဗုၚ်ဂၞဴဒေသယျဝ်ပိုဲ ဂွံရုမ်ဂပ်ကီု သွက်ဂွံထံက်ပၚ် PDF တအ်ကီု ဒၞာလဝ်ရ” ဂှ် သ္ကိုပ်အုပ်ဓုပ်ပွိုၚ်ဍုၚ် ပွိုၚ်တိုက်ကျောက်ထု ကိုဝ်ယျဝ်ဂျဳ(ကျောက်ထု) ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
သ္အာၚ်နူဂှ်ပၠန် ပွမကၠောန်သ္ပကၠုၚ်သာ်ဏံဂှ် ညံၚ်ဇွောံဟွံဂွံပိုတ်သ္ကုတ်အာ၊ ညံၚ်ဟွံဂွံဝေၚ်ၚုဟ်ဗွဝ်ဖျာ ကေုာံ ညံၚ်ဟွံဂွံစိုပ်အာ ကွာန်ပျူသဝ်ထဳပ္ဍဲပွိုၚ်ဍုၚ်ပေါက်တအ်တုဲ ဖျေံကၠုၚ်လဝ်သ္ဂုတ်သွာတ်သာ်ဏံရဂှ် ညးဟီုလဝ်ဏီရ။
အခိၚ်လၟုဟ်ဏံမ္ဂး ပ္ဍဲသ္ကုတ်ဗၟံက် ပွိုၚ်တိုက်ကျောက်ထုဂှ် တဵုပလောံဒၟံၚ် သွက်ဂွံကၠောန်ဗ္ၚတုဲ အခိၚ်သြောံသ္ၚုကလေၚ်တိတ်ကၠုၚ်မ္ဂး သွက်သၟာဗ္ၚတအ် ဂွံစသုၚ်ကီု သီုသွက်ဂွံထံက်ပၚ်ကဵု PDF တအ်ဂှ် ပါဲစွံလဝ်တုဲ သွက်ဂွံကဵုအာအခေါၚ် သွံရာန်ကဵုဒေသတၞဟ်သ္အာၚ် နွံဒၟံၚ်ရဂှ် ဂွံတီကေတ်ရ။
သွက်ဂွံပ္ဍိုက်ပ္တိတ်ဏာမ္ၚးဂှ် ပ္ဍဲမွဲကာလပိုၚ်ခြာလဝ်ဏံ ယဝ်ရနွံပၟိက်ကၠုၚ် သွက်ဂွံရာန်ကေတ် သွက်တံဒပ်၊ ဒပ်ပၞာန် ကေုာံညးပါဲဘဲပၞာန်တအ်မ္ဂး ဒးကဵုသမ္တီကဵု ပ.က.ဖ၊ ပ.အ.ဖပွိုၚ်တိုက် ကေုာံဂကောံ PDF ကျောက်ထုတအ်တုဲ ညးတာလျိုၚ်ဆေၚ်စပ်တအ် ဖျေံသ္ဂုတ်သွာတ်ကောံဓရီုတုဲ သွက်ဂွံသ္ပကဵုအာဒ္တန် နွံဒၟံၚ်ရဂှ် ဂွံတီကေတ်ရ။
ရးဒေသမဂွေ ဒေသယျဝ်ဂှ် ဇြဟတ်သြောံသ္ၚုတိတ်ခိုဟ်ဒၟံၚ်တုဲ ညးဍုၚ်ကွာန်ပၠန်ဂတးဒၟံၚ် ဗ္ဒာဲဗ္ဒာဲတအ်ကီု သီုကဵုပလံၚ်ဗစိုပ်ဒၟံၚ် ဒေသပေါက်၊ ရးမေန်တာပ်တအ်ရဂှ် ဂွံတီကေတ်ရ။
ပ္ဍဲဒေသတအ်ဂှ် ၚုဟ်မးသြောံသ္ၚုဂှ် ပရေၚ်ပြံၚ်သၠာဲဟၟဲတုဲ အတိုၚ်ၚုဟ်မး မၞုံဒၟံၚ်လၟုဟ်ဏံ ညးဍုၚ်ကွာန်တအ် သွံရာန်သၠာဲဂတးဒၟံၚ်အိုတ်ရဂှ် ဂွံတီကေတ်ရ။
ကံၚ်ဇြဳပၞာန်သီအဝဵုဂှ် လလောၚ်တြးလဝ် ပွိုၚ်ဍုၚ်သဝ် နဒဒှ်ပရေၚ်အုပ်ဓုပ်ပၞာန်တုဲ ပ္ဍဲကဵုပွိုၚ်တိုက်ကျောက်ထုဂှ်လေဝ် က္တဵုဒှ်ဒၟံၚ်ပေါဲဗတိုက်ကဵု ဒပ်ပၞာန်စဵုဒၞာညးဍုၚ်ကွာန်တအ် ဟွံလအ်ဟွံလအ်တုဲ ဟိုတ်နူကံၚ်ဇြဳပၞာန်တုဲ ညးဍုၚ်ကွာန်ဗ္ဒာဲ (၇၀၀၀) တၠ ဒးပါဲဓလေတ်ဒၟံၚ်ဘဲပၞာန်ရဂှ် ဂွံတီကေတ်လဝ်ရ။
ပရိုၚ်-သြၚ်လောန်တိုၚ်(မ်)
ဗီုရုပ်- CJ