ကဝ်ဒူလေဝ်၊ ဖေဖဝ်ဝါရဳ(၂၃)
အလုံတိဍာ်ဗော်သွးကောန်ဂကူကရေၚ် KNU သီုဖအိုတ် ပ္ဍဲမွဲကာလဒပ်ပၞာန်သီအဝဵု ပွိုၚ် (၂)သၞာံဂှ် ဟိုတ်နူပရေၚ်ဒပ်ကံၚ်ဇြဳပၞာန် ပန်ပှော် နကဵုက္ၜၚ်ကျာ ပ္တဝ်လဝ်ကဵုညးဍုၚ်ကွာန်တုဲ ကောန်အရာပ်ညးဍုၚ်ကွာန် ဗ္ဒာဲ (၄၀)တၠ ဒးချိုတ်အလာဝ်ရဂှ် KNU လလောၚ်တြးလဝ်ရ။
ပ္ဍဲကာလဒပ်ပၞာန်သီအဝဵု ပွိုၚ်(၂)သၞာံဂှ် ပ္တဝ်လဝ်ကဵု ညးဍုၚ်ကွာန်နွံတန်တဴဒၟံၚ် ပ္ဍဲကဵုခရိုၚ် (၇)ခရိုၚ် တိဍာ်ကဝ်ဒူလေဝ် KNU ထိၚ်ဒဝ်ဂှ်တုဲ ဒပ်ကံၚ်ဇြဳပၞာန် ကၠောန်ကၠုၚ်ပရေၚ်ပန်ပှော် နကဵုက္ၜၚ်ကျာ (၃၀၇) ဝါရဂှ် ထ္ၜးလဝ် ပ္ဍဲတၚ်လလောၚ်တြးရ။
ပရေၚ်ဒပ်ကံၚ်ဇြဳပၞာန် ဗတိုက်ကၠုၚ် နကဵုက္ၜၚ်ကျာဂှ် ဒှ်ပရေၚ်ပန်ပှ်ော ပ္တဝ်လဝ်ကဵု ညးဍုၚ်ကွာန်ကောန်အရာပ်တအ်ဟေၚ်တုဲ ပရေၚ်ဗတိုက်ပန်ပှော် နကဵုက္ၜၚ်ကျာ ကၠုၚ်စိုပ်ဗတိုက်ပန်ပှော်လဝ် ပ္ဍဲဒၞာဲဆေၚ်စပ်ကဵု ဒပ်သၟဝ်တဲ KNU တအ် ဟွံပါလုပ်ရောၚ်ဂှ် ဓမံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ပ္ဍဲကဵုပရေၚ်ဗတိုက်ပန်ပှော်နကဵုက္ၜၚ်ကျာဂှ် ကောန်အရာဟၟဲကဵုဒုဟ်ဒဏ် ဒးချိုတ်လဝ် (၃၆)တၠ ဇီုကပိုက်ဒးလဝ်ဘဲဝပ် (၅၇)တၠနွံတုဲ သ္ၚိဒၟံၚ်(၂၅၈)မ၊ ဘာဗ္တောန်လိက် (၁၂) ဘာ၊ ရုၚ်ဂဥုဲ (၆)ရုၚ်၊ စမြိုၚ်ညးဍုၚ်ကွာန်ပိုၚ် (၃၅)မ၊ ဘာလကျာ် (၄)ဘာ၊ ဘာသဳလ (၁)ဘာ၊ ဘာခရေတ်ယာန် (၈)ဘာတအ် ဒးဇီုကပိုက်လီုလာ်အာလဝ်နွံရဂှ် KNU သ္ဂးလဝ်ရ။
တၚ်ဂၞၚ်ပရေၚ်ကံၚ်ဇြဳပၞာန် ပ္တဝ်လဝ်ကဵုညးဍုၚ်ကွာန် ကောန်အရာပ် ပန်ပှော်ဒၟံၚ် နကဵုက္ၜၚ်ကျာ ပ္ဍဲကဵုတိဍာ် KNU သောဲသောဲဗြောဲဗြောဲတအ်ဂှ် ၜိုန်ရဗော်သွးကောန်ဂကူကရေၚ် KNU လလောၚ်တြးဒၟံၚ် ဟွံလအ်ဟွံလအ်ကီုလေဝ် ခြာဟွံလအ်ဏံမ္ဂး ပၠုပ်စုတ် ပ္ဍဲလိက်ဒုၚ်စဳရေၚ် အခေါၚ်အရာမၞိဟ်ရောၚ်ဂှ် KNU လလောၚ်တြးလဝ်ရ။
ပရိုၚ်-သြၚ်လောန်တိုၚ်(မ်)