ၜဳကလေၚ်၊ ဖေဖဝ်ဝါရဵ(၂၃)
တွဵုရးဍုၚ်မန်၊ ပွိုၚ်ဍုၚ်ၜဳကလေၚ်၊ ဟိုတ်နူဒပ်ကံၚ်ဇြဳပၞာန် ထ္ပက်လုပ်ကၠုၚ်ကရောၚ်ပၞာန် ပ္ဍဲကွာန်ခေဝ်မောက်တုဲ ပေါဲဗတိုက်ၜါလပါ် က္တဵုဒှ်လဝ်ကဵု ဒပ်ပံၚ်ကောံ KNLA ရဂှ် ဥက္ကဋ္ဌကဝ်မတဳကောပ်ကာဲပရေၚ်မိတ် KNU ခရိုၚ်သဓီု ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ဂိတုဖေဖဝ်ဝါရဳ စၟတ်တ္ၚဲ (၂၁) တ္ၚဲတုဲကၠုၚ် အခိၚ်ၜိုတ် (၄)နာဍဳ သဝ်တ္ၚဲဂှ် ကရောၚ်ပၞာန်ကံၚ်ဇြဳပၞာန် ဇြဟတ်ပါလုပ် (၅၀)တၠပြၚ်ဂှ် နူကွာန်ဇြဳဝန် ပွိုၚ်ဍုၚ်ၜဳကလေၚ် ဟိုတ်နူထ္ပက်လုပ်ကၠုၚ်ပၞာန် ပ္ဍဲကွာန်ခေဝ်မောက်ဂှ်ရ အကြာဒပ်ပံၚ်ကောံကဵု ဒပ်ပၞာန်ဗၠးၜးကောန်ဂကူကရေၚ် KNLA တအ် ပေါဲဗတိုက်က္တဵုဒှ်လဝ်ရ။
ပ္ဍဲပေါဲဗတိုက်ဂှ် သ္ဂံၚ်လပါ်ဒပ် KNLA မွဲတၠ ဂွံလဝ်ဘဲဝပ် ဟွံဒးဒှ်ဓဝိၚ်တုဲ ဟိုတ်နူဒပ်ကံၚ်ဇြဳပၞာန် ပန်ဖျေံလွဟ်ဇၞော်ဂှ်ရ ဥူမျေအ်တာန် ကောန်ကွာန်ခေဝ်မောက် ဇီုကပိုက်ဒးလွဟ်မကမ်တုဲ ချိုတ်အာလဝ်ရ။
ပ္ဍဲပေါဲဗတိုက်ၜါလပါ်ဂှ် အကာဲအရာလပါ်ကံၚ်ဇြဳပၞာန် ဇီုကပိုက်ချိုတ်ဂျိုၚ်လဝ် သောဲသောဲဗြောဲဗြောဲဂှ် ဆက်သၟာန်သၟုက်ဂၠိုၚ်ဂၠာဲဒၟံၚ်ရဂှ် ဥက္ကဋ္ဌကောပ်ကာဲပရေၚ်မိတ် KNU ခရိုၚ်သဓီု ဟီုသ္ဂးလဝ်ရ။
အတိုၚ်ညးဒေသတအ် ဟီုသ္ဂးလဝ်မ္ဂး ကြဴနူပေါဲဗတိုက် က္တဵုဒှ်လဝ်တုဲဂှ် ဒပ်ကံၚ်ဇြဳ ထ္ပက်ကၠုၚ်ကရောၚ်ပၞာန် လုပ်စိုပ်ကၠုၚ် ပ္ဍဲကွာန်ခေဝ်မောက်တုဲ ကေတ်ဏာလဝ်ဖုၚ် (၃၀)မပြၚ် နူကဵုဆေၚ်ဖုၚ်မွဲဆေၚ်ကီု သီုကဵုလုပ်ဒကဵုဂၟာဲဏာလဝ် ပ္ဍဲသ္ၚိညးဒေသတအ်ရဂှ် သ္ဂးလဝ်ရ။
ကရောၚ်ပၞာန်ကံၚ်ဇြဳ လုပ်ဒကဵုဂၟာဲလဝ် သ္ၚိဒၟံၚ်ညးဒေသတအ်တုဲ ပ္ဍဲအခိၚ်ဇိုၚ်သဝ်တ္ၚဲဂှ်ရ ကလေၚ်တိတ်အာ လပါ်ဍုၚ်ၜဳကလေၚ်ရဂှ် ဂွံတီကေတ်ရ။
ပ္ဍဲပွိုၚ်ဍုၚ်ၜဳကလေၚ် ကြဴနူဒပ်ပၞာန်သီအဝဵုတုဲ အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ KNLA တအ် ၜိုန်ရပေါဲဗတိုက် ညိၚ်ဝတ်ကၠုၚ်ဒၟံၚ် အခိၚ်လအ်လကီုလေဝ် ဟိုတ်နူဒပ်ကံၚ်ဇြဴဳပၞာန် ထ္ပက်ကၠုၚ်ကရောၚ်ပၞာန်တုဲ ပေါဲဗတိုက်တအ် ကလေၚ်က္တဵုဒှ်ကၠုၚ်ပၠန်ရ။
ပ္ဍဲဂိတုဖေဖဝ်ဝါရဳ တုဲကၠုၚ်စၟတ်တ္ၚဲ (၁၇) ဂှ်လေဝ် ရေၚ်ကွဳစက်ကံၚ်ဇြဳပၞာန် နူပွိုၚ်ဍုၚ်သဓီု ဒဳကၠုၚ်လပါ်ပွိုၚ်ဍုၚ်ၜဳကလေၚ်ဂှ် ဟိုတ်နူဒးဒုၚ်ပန်ဗတိုက်လဝ်တုဲ ကောန်ဒပ်ကံၚ်ဇြဳပၞာန် ဟွံအောန်နူ(၇)တၠ ဇီုကကပိုက်ဒးချိုတ်အာလဝ်နွံရ။
ပရိုၚ်-သြၚ်လောန်တိုၚ်(မ်)