ဗြဝတဳ၊ ဖေဖဝ်ဝါရဳ(၂၅)
ဌာန်ဂအုပ်တံဒပ် KNLA (၁၀၃) မၞုံပ္ဍဲတိဍာ်ဒပ်မဟာ (၆) ဒးဒုၚ်ဍိုက်ဗတိုက်သီကေတ်လဝ်ကဵု ဒပ်ကံၚ်ဇြဳပၞာန်ဂှ် ဒပ်ပံၚ်ကောံ KNDO ဗတိုက်လဝ် နကဵုဒရုမ်ဆက်က်တုဲ ကလေၚ်သီကေတ် ဌာန်ဂအုပ်တံဒပ်မာန်လဝ်ရဂှ် ဂကောံဒရုမ် Federal Wings မဒှ်ဂကောံပံၚ်တောဲ မွဲဂကောံ လလောၚ်တြးလဝ် ပ္ဍဲဂိတုဖေဖဝ်ဝါရဳ စၟတ်တ္ၚဲ(၂၃)ရ။
ဌာန်ဂအုပ်တံဒပ် ဒပ်ပၞာန်ဗၠးၜးကောန်ဂကူကရေၚ် KNLA (၁၀၃) မၞုံပ္ဍဲသၠုၚ်ကျာ ဍုၚ်ဗြဝတဳ တိဍာ်ဗော်သွးကောန်ဂကူကရေၚ် KNU ဒပ်မဟာ (၆)ဂှ် ပ္ဍဲဂိတုဖေဖဝ်ဝါရဳ တုဲကၠုၚ် စၟတ်တ္ၚဲ (၂၁) အခိၚ်တ္ၚဲစေၚ်ဂှ် ကရောၚ်ပၞာန်ကံၚ်ဇြဳ ဇြဟတ်ၜိုတ် (၅၀)တၠ လုပ်စိုပ်ကၠုၚ် နူကဵုကုန်ဗျူဟာဝဝ်လေဝ် မွဲကဆံၚ်တုဲ ဍိုက်လုပ်စံၚ်ပလီုလဝ်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးရ။
ကြဴနူဒပ်ကံၚ်ဇြဳပၞာန် လုပ်စိုပ်ကေတ်လဝ်ဒၞာဲ ပ္ဍဲဌာန်ဂအုပ်တံဒပ် KNLA (၁၀၃)တုဲဂှ် ၜိုန်ရပန်ဖျေံဒၟံၚ်လွဟ်ဇၞော် လပါ်ဌာန်ဂအုပ်ပၞာန်ဗဟဵု ဒပ်ပၞာန်ကဝ်ဒူလေဝ် KTLA အဆက်က်ကီုလေဝ် ပရေၚ်ဇီုကပိုက်ဒး ဟၟဲရဂှ် ညးမၞုံအခေါၚ်ဟီုဂး ဌာန်ဂအုပ်ပၞာန်ဗဟဵု KTLA ဟီုသ္ဂးလဝ်ရ။
ဗ္ဒပ်ဒးဒုၚ်သီလဝ်ဂှ် ဒပ်ပၞာန်စဵုဒၞာကောန်ဂကူကရေၚ် KNDO တံဒပ် ပရေၚ်ဂီုကၠီု (၈) ကေုာံ တံဒပ်ကိုဝ်မာန်ဒိုဝ်၊ ဒပ်ပံၚ်ကောံ Federal Wings တအ် ဗတိုက်လဝ် နကဵုဒရုမ် အဆက်ဟွံပိုတ်သ္ကုတ်တုဲ ဂိတုဖေဖဝ်ဝါရဳ စၟတ်တ္ၚဲ (၂၂) အခိၚ်ၜိုတ် (၁၂)နာဍဳ ကလေၚ်သီကေတ် ဌာန်ဂအုပ်တံဒပ် မာန်ကၠုၚ်ရဂှ် လလောၚ်တြးလဝ်ရ။
ပ္ဍဲကဵုပရေၚ်ပရော ကံၚ်ဇြဳပၞာန်လုပ်စိုပ်ဗတိုက်သီကေတ်လဝ် ဌာန်ဂအုပ်တံဒပ် KNLA (၁၀၃) ဂှ် နူလပါ် KNLA ပရေၚ်ဇီုကပိုက် ဂွံလဝ်ဘဲဝပ် ဟၟဲမွဲသာ်တုဲ စံၚ်ပလီုဏာလဝ် ကွဳစက် ကွဳလိုန်ဓာတ် မၞုံပ္ဍဲတံဒပ်တအ်ရဂှ် သ္ဂံၚ်ဒပ်ပံၚ်ကောံတအ် ဟီုသ္ဂးလဝ်ရ။
အခိၚ်လၟုဟ်ဏံမ္ဂး ပ္ဍဲကဵုဒေသဝဝ်လေဝ် တိဍာ်ဒပ်မဟာ (၆)ဂှ် အကာဲအရာပၞာန် အကြာဒပ်ပံၚ်ကောံကဵု ဒပ်ကံၚ်ဇြဳပၞာန်တအ် ကြံၚ်မ္ၚိုဟ်ဒၟံၚ်ဖိုဟ်ဏီတုဲ ဟိုတ်နူပရေၚ်ဒပ်ကံၚ်ဇြဳပၞာန် ပန်ဖျေံလွဟ်ဇၞော်ကြာန်ကြာန်ကီု သီုကဵုပန်ဒၟံၚ် နကဵုက္ၜၚ်ကျာတုဲ ညးဒေသ နူကဵုကွာန်ဂမၠိုၚ် မပ္တံကဵု ကွာန်မဝ်ခဳ၊ ဥကရေတ်ခဳ၊ ထဳကပလေဝ်၊ ပနွဲဖိုဝ်ကလိုဝ်၊ ထဳတေဝ်လေဝ်တအ် ဒးဂြိပ်ဒဴဒၟံၚ်ရဂှ် ဂွံတီကေတ်ရ။
ပရိုၚ်-သြၚ်လောန်တိုၚ်(မ်)