လဂုၚ်၊ ဖေဖဝ်ဝါရဳ(၂၅)
ပ္ဍဲသၞာံဘဏ္ဍာ ၂၀၂၂ -၂၀၂၃ ပွိုၚ်ဒ္စာံဂိတုဂှ် ၚုဟ်မးပရေၚ်ကူသာန်သွံရာန် ဗၟာ-ကြုက် ဒဝ်ဠာအမေရိကာန် ဗ္ဒာဲ (၁၁) ဗဳလျာန်ပါ်ခြာဒၟံၚ်ဂှ် ပရေၚ်ပ္တိတ် ဟွံသေၚ်မ္ဂး ပရေၚ်ကူသာန်ဗၞိက် ဟွံလုပ်သၞောဝ် အကြာၜါကၟိန်ဍုၚ် ထ္ၜးဒၟံၚ် ဒဒှ်ရဂၠိုၚ်တိုန်ကၠုၚ်ရဂှ် ISP-Myanmar လလောၚ်တြးလဝ် ပ္ဍဲဂိတုဖေဖဝ်ဝါရဳ စၟတ်တ္ၚဲ (၂၃)ဂှ်ရ။
ကာလပ္တဝ်ရံၚ်အာ တၚ်လလောၚ်တြး ၜါကၟိန်ဂှ် အတိုၚ်တၚ်လလောၚ်တြးကံၚ်ဇြဳပၞာန်မ္ဂး နူဂိတုဨဗြဴ စဵုကဵုဂိတုနိုဝေမ်ဗာဂှ် ၚုဟ်မး ပရေၚ်ကူသာန်သွံရာန်ဗၞိက် ဒဝ်ဠာအမေရိကာန် (၆) ဗဳလျာန်ဟေၚ်နွံဂှ် ၜိုန်ရဒှ်ကီုလေဝ် ပ္ဍဲတၚ်လလောၚ်တြး ဌာနအကံက်အခေါန်ကြုက်မ္ဂး ပရေၚ်ကူသာန်သွံရာန်ဗၞိက်ကဵု ကၟိန်ဍုၚ်ဗၟာ ပ္ဍဲပွိုၚ်ဒ္စာံဂိတု ဒဝ်ဠာအမေရိကာန် မၞုံဒၟံၚ်ဗ္ဒာဲ (၁၇) ဗဳလျာန်ရ။
ကၟိန်ဍုၚ်ဗၟာဂှ် ဗၞိက်လုပ်စိုပ်ကၠုၚ် လ္ပာ်ကၟိန်ဍုၚ်ဗၟာ အလုံသီုဖအိုတ်ဂှ် ပတိုန်လဝ်စၟတ်သမ္တီတုဲ ပ္ဍဲလပါ်ကၟိန်ဍုၚ်ဗၟာဂှ် ကေတ်လဝ်စၟတ်သမ္တီ တၚ်ဂၞၚ်ပရေၚ်ကူသာန်သွံရာန်ဗၞိက် လုပ်ကဵုသၞောဝ်သက်က်ဟေၚ် ဒှ်မာန်ရဂှ် ISP-Myanmar ဂကောံသုတေသနဗၠးၜးမွဲဂကောံ ဟီုသ္ဂးလဝ်ရ။
သ္အာၚ်နူဏံပၠန် ပ္ဍဲတၚ်ပ္တဝ်ရံၚ် ၚုဟ်မးပရေၚ်ကူသာန်ဗၞိက် ၜါကၟိန်ဍုၚ်ဂှ်မ္ဂး လ္တူနူဂၞန်သၚ်္ချာကံၚ်ဇြဳပၞာန်ဂှ် ဂၞန်သၚ်္ချာ ဌာနအကံက်အခေါန်ကြုက် ဂၠိုၚ်လောန်ဒၟံၚ်လတူနူၜါချရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ဒုၚ်သ္ဇိုၚ်ကဵု တၚ်လလောၚ်တြး ဂကောံပိုၚ်အာဏာ သ္ကိုပ်ပရေၚ်အုပ်ဓုပ်အကံက်အခေါန်ကြုက် (GACC) တုဲ အတိုၚ်တၚ်ဂၞၚ် ISP-Myanmar ပကောံပကေဝ်လဝ်မ္ဂး ပ္ဍဲပွိုၚ်ဒ္စာံဂိတု နူကဵုကၟိန်ဍုၚ်ဗၟာ ပရေၚ်ပၠုပ်တိသတ္တုယှာ ပ္ဍဲဍုၚ်ကြုက်ဂှ် က္လိဂွံလဝ် သြန်ဒဝ်ဠာအမေရိကာန် (၄၀၀) ပြကောဋိကိုတ်ပြၚ်ရဂှ် ဂွံတီကေတ်ရ။
သ္အာၚ်နူဂှ်ပၠန် ဇၟာပ်ပ်ဂိတု ပရေၚ်ပၠုပ်ဒၟံၚ် တိသတ္တုယှာဂှ် က္လိဂွံဒၟံၚ် ဒဝ်ဠာအမေရိကာန် နူကဵု (၂၅)ပြကောဋိကိုတ် စဵုကဵု(၁၀၀)ပြကောဋိကိုတ် နွံဒၟံၚ်တုဲ ပ္ဍဲဂိတုဂျောန် သၞာံတုဲကၠုၚ်ဏံ မွဲဂိတုဓဝ်ဟေၚ် ပရေၚ်ပလံၚ်ပၠုပ် အောန်ယအ်စှ်ေကၠုၚ်လဝ်ရဂှ် ISP-Myanmar ဟီုသ္ဂးလဝ်ရ။
တၚ်ဂၞၚ်စပ်ကဵုပရေၚ်ပလံၚ်ပၠုပ်တိသတ္တုယှာ ဒၟာနူကံၚ်ဇြဳပၞာန် လလောၚ်တြးလဝ် ဗွဲမလုပ်သၞောဝ်ဟၟဲဂှ်ရ တိသတ္တုယှာ လုပ်စိုပ်ဒၟံၚ်လ္ပာ်ဍုၚ်ကြုက် နူကဵုပယျဵုမွဲကဆံၚ်ဂှ် လုပ်စိုပ်ဒၟံၚ် နကဵုဂၠံၚ်ဍာန်ဟွံလုပ်ကဵုသၞောဝ် ဒုၚ်ဂိုၚ် ပတှ်ေကေတ်မာန်ရဂှ် ဓမံက်ထ္ၜးလဝ်ရ။
မူသေဝ်၊ ကျိုၚ်တုမ်၊ ချေန်ယှိုဲဟဝ်၊ လွာဂျေဝ် ကေုာံ ကာန်ပိုက်တဳ မဒှ်အပိုၚ်ခြာဒေသပယျဵု ကူသာန်သွံရာန်ဗၞိက်တအ်ဂှ် ပ္ဍဲအရာပ္တဝ်ရံၚ်အာ ပ္ဍဲပွိုၚ်ဒ္စာံဂိတုကာလတုပ် သၞာံ ၂၀၂၁ ကေုာံ သၞာံ၂၀၂၂ ဂှ်မ္ဂး သြန်ဒဝ်ဠာအမေရိကာန် (၂၇၇)ပြကောဋိကိုတ်ပြၚ် အောန်ယအ်စှ်ေဒၟံၚ်ရဂှ် ISP-Myanmar လလောၚ်တြးလဝ်ရ။
ပရိုၚ်-သြၚ်လောန်တိုၚ်(မ်)