ဂဂဝ်-ဖေဖဝ်ဝါရဳ(၂၆)
ရးဒေသမဂွေ၊ ပ္ဍဲဂဂဝ်ဂှ် ဟိုတ်နူဒပ်စဵုဒၞာညးဍုၚ်ကွာန် ကြတ်ဗတိုက်လဝ် ကရောၚ်ပၞာန် ကံၚ်ဇြဳပၞာန်တုဲ ချိုတ်အာ (၄)တၠ ဂွံလဝ်ဘဲဝပ် နွံဒၟံၚ်ရဂှ် PDF Gangaw သၠုၚ်ကျာ လလောၚ်လဝ် ပရိုၚ်ရ။
ပ္ဍဲဂိတုဖေဖဝ်ဝါရဳ စၟတ်တ္ၚဲ (၂၄) တုဲကၠုၚ်တေံဂှ် ကရောၚ်ပၞာန်တိုက်ကံၚ်ဇြဳပၞာန် ခ.လ.ရ (၅၀) ဇြဟတ်ပါလုပ် (၈၉)တၠ တိတ်ကၠုၚ်နူစြာၚ်ကၟာမျေတ်တာတမာန်ဂှ် ဗတိုက်လဝ် ပ္ဍဲလပါ်သၠုၚ်ကျာ ကွာန်မေန်ယွာရ။
“ကွာန်မၞုံဒၟံၚ်မွဲဒမြိပ် ဂၠံၚ်ကရောၚ်ပၞာန် နူကဵုပွိုၚ်ဍုၚ်ကျောက်ထု ပွိုၚ်ဍုၚ်ဂဂဝ် ထ္ပက်ဒၟံၚ်ကရောၚ်ပၞာန်လၟုဟ်ဂှ်တှ်ေ ဒးပါဲဓလေတ်ဒၟံၚ်ပၞာန် မွဲချိုန်ခနရ။ ကောန်ဒပ်ကံၚ်ဇြဳပၞာန်တအ် နွံဒၟံၚ် ပ္ဍဲဗ္ဒပ်ဗၠာဲသၟိၚ်ကွာန်မေန်ယွာဂှ်ဏီဖိုဟ်ရ။ ယဝ်ရတိတ်ကၠုၚ်တှ်ေ ပရေၚ်ဇီုကပိုက်ဆေၚ်မုက် ဒှ်ကၠုၚ်မာန်ရ” ဂှ် ညးစုက်လုက်ကဵု ဒပ်ပရေၚ်စဵုဒၞာမွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
အခိၚ်ပေါဲဗတိုက်ကံၚ်ဇြဳပၞာန်ကဵု ဒပ်ပရေၚ်စဵုဒၞာတအ် က္တဵုဒှ်လဝ် လအ်အခိၚ် (၃၀)မိနေတ်တုဲ လပါ်ကံၚ်ဇြဳပၞာန် ဒးချိုတ်အာ (၄)တၠ ဂွံလဝ်ဘဲဝပ် (၅)တၠရဂှ် ဟီုသ္ဂးလဝ်တုဲ လပါ်ဒပ်ပရေၚ်စဵုဒၞာတအ် ပရေၚ်ဇီုကပိုက်ဒးလဝ် ဟၟဲရဂှ် ဂွံတီကေတ်ရ။
ပါဲနူဂှ်ပၠန် ပ္ဍဲကဵုပေါဲဗတိုက်ဂှ် ပၞောဝ်ကဵုညးဍုၚ်ကွာန် လပါ်ကံၚ်ဇြဳပၞာန်ရပ်ကော်ဏာလဝ် နဒဒှ်ဒေၚ်ဒုၚ်ဒၞာမၞိဟ် (၃)တၠ ဂြိပ်တိတ်အာ မွဲတၠဂှ် လပါ်ဒပ်စဵုဒၞာညးဍုၚ်ကွာန်တအ် ရီုဗၚ်ကဵုလဝ်ရဂှ် ဂွံတီကေတ်ရ။
အခိၚ်လၟုဟ်ဏံမ္ဂး ကရောၚ်ပၞာန်ကံၚ်ဇြဳ ဒးဂိလဝ်ဂှ် စိုပ်ဒၟံၚ် ပ္ဍဲကွာန်မေန်ယွာတုဲ လုပ်စိုပ်ဒၟံၚ် ပ္ဍဲသ္ၚိဌာန်ညးဍုၚ်ကွာန် ပါဲဒဴဘဲပၞာန်တအ် နွံဒၟံၚ်ကီု သီုကေတ်ဏာဒၟံၚ် ကပေါတ်မၞုံကဵုၚုဟ်မးတအ်ရဂှ် PDF Gangaw သၠုၚ်ကျာ သ္ဂးလဝ်ရ။
ပရေၚ်ဇီုကပိုက်ဆေၚ်မုက် အကြာဒပ်စဵုဒၞာကဵု ဒပ်ကံၚ်ဇြဳပၞာန်ဂှ် အခိၚ်ဟွံရုဲ ဟိုတ်နူက္တဵုဒှ်ကၠုၚ်မာန်ဒၟံၚ်ဂှ်ရ ညံၚ်ညးဍုၚ်ကွာန်တအ် ဟွံဂွံသုၚ်စောဲအာကၠုၚ် ဂၠံၚ်ဂဂဝ်-မေန်ယွာဂှ် ဒပ်စဵုဒၞာညးဍုၚ်ကွာန် ကဵုလဝ်သမ္တီရ။
ပရိုၚ်-သြၚ်လောန်တိုၚ်(မ်)
ဗီုရုပ် – PDF-ဂဂဝ်