သဵု(လ်) ၊ ဖေဖဝ်ဝါရဳ (၂၅)
ဒမြိပ်သၠးဂဝ် ဍုၚ်ကိုဝ်ရဳယျာသၠုၚ်ကျာဝွံ ကလေၚ်စှ်ေအာ မွဲဝါပၠန်တုဲ လ္တူဂၠးတိဏံ ဒှ်ကၠုၚ်ဒမြိပ်သၠးဂဝ် သဝ်အိုတ်ဂှ် ထ္မံက်ထ္ၜးလဝ် ပ္ဍဲပရိုၚ်ဂမၠိုၚ်ရ။
အတိုၚ်ဂလာန် Statistics Korea ဂှ်မ္ဂး မွဲဒမြိပ်သၠးဂဝ် မၞိဟ်ဗြဴကိုဝ်ရဳယျာသၠုၚ်ကျာမွဲတၠဂှ် လၟိဟ်သရောပ်ကောန်ၚာ် မစၟဳစလဝ်ဂှ်ဝွံ ပ္ဍဲသၞာံ ၂၀၂၁ ဂှ် နူ (၀ ဒဿမ ၈၁) တၟံကၠံ ယအ်စှ်ေအာ စဵုကဵု ( ၀ ဒဿမ ၇၈) တၟံကၠံဂှ် ဂွံတီကေတ်ရ။
ပ္ဍဲကဵုဍုၚ်မလုပ်ဂကောံ (OECD) ဂကောံပရေၚ်ဖောအ်ဗြေဝ်တောတက် ကေုာံ ပရေၚ်ပံၚ်တောဲရေၚ်တၠုၚ်ပရေၚ်ပိုန်ဒြပ်တံဂှ် အတိုၚ်စရၚ်သၞာံ ၂၀၂၁ ဂှ်မ္ဂး ဍုၚ်ကိုဝ်ရဳယျာသၠုၚ်ကျာဝွံ ဒှ်ဍုၚ်သဝ်အိုတ်တုဲ ဒမြိပ်သၠးဂဝ် လ္တူဍုၚ်ဇၞော်ဍုၚ်သဵုလ်ဂှ် (၀ ဒဿမ ၅၉) ဓဝ်နွံဂှ် သ္ဂးရ။
ဍုၚ်ကိုဝ်ရဳယျာသၠုၚ်ကျာဝွံ နူသၞာံ ၂၀၁၅ ဂှ် ဒမြိပ်သၠးဂဝ် စှ်ေကၠုၚ်လဝ်တုဲ ပ္ဍဲသၞာံ ၂၀၂၀ ဂှ် လ္တူနူပရေၚ်သၠးဂဝ်ဂှ် ပရေၚ်ချိုတ်တံဏောၚ် ဂၠိုၚ်ကၠုၚ်လဝ်ရ။
နကဵုဍုၚ်ဂမၠိုၚ် မၞိဟ်ဗြဴမွဲတၠမ္ဂး နွံပၟိက် ဒမြိပ်သၠးဂဝ် (၂ ဒဿမ ၁) တုဲ လၟိဟ်မၞိဟ်စှ်ေဂှ်မ္ဂး သီုကဵုပါလုပ် ဂျပါန် ကေုာံ ကြုက်တံဂှ် ဍုၚ်အာယှတၞဟ်သ္အာၚ်တံလေဝ် နွံဒၟံၚ်ရ။
အတိုၚ်ဂလာန် ညးမစိုန်သ္ကီုတံဂှ်မ္ဂး ဒမြိပ်သၠးဂဝ်ဂွံအောန်ဂှ်ဝွံ ဒၟါနူကဵုတၚ်နွံပၟိက် တွဳပွူကမၠောန်ဂမၠိုၚ်ကီု၊ ခရိတ်မံၚ်စံၚ်တံ သၠုၚ်တိုန်ကၠုၚ်ကီု၊ လညာတ် လ္တူပရေၚ်တုပ်သၟဟ်တြုံဗြဴတံကဵု ပရေၚ်အိန်ထံၚ်တံ ပြံၚ်လှာဲကၠုၚ်ကီု ကေုာံ လညာတ်ဗၠေတ်တ် အကြာသၟတ်တံ သၠုၚ်တိုန်ကၠုၚ်ကီုတံ မဒှ်ရောၚ်ဂှ် သ္ဂးရ။
ပ္ဍဲကိုဝ်ရဳယျာသၠုၚ်ကျာဂှ် မၞိဟ်ဗွဲမဂၠိုၚ်ဂၠေၚ်ဝွံ အကြာဗွဝ်ဖျာကမၠောန်ကၟိတ် ဟွံချိုတ်ပၠိုတ်တံ၊ သ္ၚိဌာန် ၚုဟ်က္ဍၚ်ၚ်တံဂှ်ကဵု အကြာတြုံဗြဴ ကေုာံ ပရေၚ်ဟွံသၟဟ်တး ပရေၚ်မၞိဟ်တံဂှ် သွက်ဂွံလွဳလွတ်ကောန်ၚာ်ဂှ် တာလျိုၚ်နွံရောၚ် ဟွံဒုၚ်ဂိုၚ်ကေတ်အိုတ်ရတုဲ ညးဗြဴတံဝွံ နိဿဲကေတ် ယေန်သၞာၚ်လွဳလွတ်ကောန်ၚာ် နူအစေန်အဆက်ဇုဇဗဴလတံ ကဵု ပွမဒးဒုၚ်ပါ်ကဆံၚ် ပ္ဍဲကမၠောန်တံဂှ်တုဲ စၞောန်ထ္ၜးဟီုဂးလဝ်အိုတ်ရ။
အာယုက်ညးဗြဴကိုဝ်ရဳယျာသၠုၚ်ကျာ သွက်ဂွံသၠးဂဝ်ဂှ်ဝွံ သၞာံတုဲတေံဂှ် သၠုၚ်တိုန်ကၠုၚ်လဝ် စဵုကဵု (၃၃ ဒဿမ ၅) တၟံကၠံဂှ် ဂွံတီကေတ်ရ။
Ref: Nextshark/ Yahoo News