လာန်ဒါန်၊ ဖေဖဝ်ဝါရဳ (၂၇)
ကြဴနူဂွံစဵုကေတ် လၟေၚ်ဒဒှ်ယဲဇွဟ်ဂစေံ H5N1 (၂) မကၠောံထၞာန်ကၠုၚ် ကုမၞိဟ်တံတုဲဂှ် နကဵုဂကောံပရေၚ်ထတ်ယုက်ဂၠးတိ WHO ထ္မံက်ထ္ၜးလဝ် နဒဒှ်အကာဲအရာဒးဂွိၚ်တုဲ ကၠောန်ဒၟံၚ် မွဲစွံကဵုအလဵုအသဳကာမ္ဗောဒဳယျာတံဖိုဟ်ဂှ် ဟီုဂးလဝ်ရ။
ဒဒှ်မကၠောံထၞာန် ပ္ဍဲဂစေံဂမၠိုၚ် ကေုာံ သတ်တိရစ္ဆာန်မဴတှ်တံ သၠုၚ်တိုန်ကၠုၚ်ဂှ်ဝွံ ထ္မံက်ထ္ၜးလဝ် အကာဲအရာဒးဂွိၚ်တုဲ ပ္ဍဲကဵုပရေၚ်ကၠောံထၞာန် မက္တဵုဒှ်လဝ် ခြာဟွံလံဏီတံဂှ် ဘဲအန္တရာယ် စပ်ကဵုအလုံဂၠးတိတံ က္တဵုဒှ်မာန်ဂှ်လေဝ် နူကဵုဂကောံပရေၚ်ထတ်ယုက်ဂၠးတိတံ သ္ၚဳဂၠိပ်လဝ်ဂှ် ဒါရိုက်တာ ပရေၚ်စဵုဒၞါ ကေုာံ ဒစးဒုၚ်ပလေဝ်ပလေတ်ယဲကပ် ဒံက်တာဗရဳအာန် ဟီုဂးလဝ်ရ။
အလဵုအသဳကာမ္ဗောဒဳယျာဝွံ ပ္ဍဲတ္ၚဲဗြဴဗ္တိတုဲကၠုၚ်တေံဂှ် ကြဴနူလလောၚ်တြး သၟတ်ဗြဴအာယုက် (၁၁) သၞာံမွဲတၠ ဒးချိုတ်အာ ဒၟါနူကဵု H5N1 တုဲဂှ် စၟဳစၟတ်လဝ် မၞိဟ်မစုက်လုက်ကဵု သၟတ်ဗြဴဂှ် (၁၂) တၠဂှ် သီုကဵုပ္ဍဲညးမဒှ်အပါသၟတ်ဗြဴဂှ် လက္ချန်ယဲက္တဵုဒှ်ဒၟံၚ်တုဲ စၟယဲနွံဒၟံၚ်ဂှ် စၟဳစၟတ်ဂွံဆဵုကေတ်ရ။
“အကာဲအရာ H5N1 စပ်ကဵုဂၠးတိဂှ် သ္ကဵုဒးဂွိၚ်ကၠေံ ဒဒှ်မစၟယဲကၠောံထၞာန် မဂွံဆဵုကေတ် နူကဵုဂစေံတံ၊ စာၚ်တံမွဲကဆံၚ်ဂှ်တုဲ ပရေၚ်ကၠောံထၞာန် ပ္ဍဲကဵုသတ်တိရစ္ဆာန်မဴတှ် သီုကဵုပါလုပ်မၞိဟ်တံဂှ်လေဝ် သၠုၚ်တိုန်ကၠုၚ်ဒၟံၚ်ယျ။ နကဵု WHO အကာဲအရာစၟယဲဏံ ဒှ်ကၠုၚ်ဘဲသၠုၚ်အိုတ်မာန်ဂှ် ထ္မံက်ပ္တိတ်ဂွံလဝ်တုဲ ကၟိန်ဍုၚ်ဂမၠိုၚ်လေဝ် သွက်ဂွံစွံသတိဇၞော်ဇၞော်ဂှ် နွံပၟိက်ယျ” သာ်ဝွံ ဒံက်တာဗရဳအာန် ကဵုသတိဟီုဂးလဝ်ရ။
သွက်လၟေၚ်ဒဒှ်ကၠောံထၞာန်ၜါ မက္တဵုဒှ်လဝ် ပ္ဍဲဍုၚ်ကာမ္ဗောဒဳယျာဂှ် ကၠောံနူမၞိဟ်ကဵုမၞိဟ်ရဟာ၊ ဒၟါနူအကာဲအရာပွဳပွူသဘာဝ ညံၚ်ရဴလုပ်စုက်ဒး ဂစေံဂမၠိုၚ် ဟွံသေၚ်မ္ဂး တိရစ္ဆာန်တၞဟ်ဟ်တံတုဲ ကၠောံထၞာန်ဟာဟီုဂှ် ဒးကဵုက္ဍိုပ်စၟဳစၟတ်ဒၟံၚ်ဗွဲတၟေၚ်ဂှ် သ္ဂးရ။
ဂကူစၟယဲတၟိ H5N1 မမံက်တိတ်ကၠုၚ် ပ္ဍဲသၞာံ ၂၀၂၀ ဂှ်ဝွံ အကြာဂစေံဂြိုပ်တံကဵု စာၚ်လွဳပ္ဍဲသ္ၚိတံဂှ် သ္ကဵုဒှ်လဝ် ပရေၚ်ချိုတ် မၜက်အာသၞောတ်ဗ္ၜတ်ဂှ်သၟးဟွံက စၟယဲဂှ်ဝွံ ဟိုတ်နူကဵုကၠောံထၞာန် သီုပ္ဍဲသတ်တိရစ္ဆာန်မဴတှ်တံမာန်ဂှ်ရ ပရေၚ်ဒှ်ဓဝိၚ်စပ်ကဵုဂၠးတိတံ ဂၠိုၚ်တိုန်ကၠုၚ်လဝ်ရ။
REUTERS