ပဠဝ်၊ မာတ်ချ်(၁)
ဒပ်ကံၚ်ဇြဳ ထ္ပက်ကၠုၚ်ပၞာန် ပ္ဍဲကွာန်လက္ကူ၊ ပွိုၚ်ဍုၚ်ပဠဝ်၊ ရးဒေသဇၞော်တၞၚ်သဳ လလောၚ်တြးလဝ် ပရေၚ်အုပ်ဓုပ်ပၞာန်ဂှ် ရပ်ဏာညးဒေသတအ် (၃၀)တၠပြၚ်ရဂှ် ဂကောံကၟိန်အိန်ထံၚ် မၞိဟ်ဒးဒုၚ်ရပ်ဏာလဝ်ဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ကရောၚ်ပၞာန်ကံၚ်ဇြဳ ဇြဟတ်မၞုံ (၅၀) တၠပြၚ်ဂှ် ပ္ဍဲဂိတုဖေဖဝ်ဝါရဳ စၟတ်တ္ၚဲ(၂၈) အခိၚ်နူဂယးဂှ် လုပ်စိုပ်ကၠုၚ် ပ္ဍဲကွာန်လက္ကူတုဲဂှ် ဗက်ရပ်ဒၟံၚ် ညးဒေမၞုံပ္ဍဲသ္ၚိ ကေုာံအကြာဂၠံၚ်ဍာန်တအ်ရ။
ဟိုတ်နူဒပ်ကံၚ်ဇြဳပၞာန် ဗက်ဂၠာဲရပ်ဒၟံၚ်ဂှ်ရ ညးဒေသဗွဲမဂၠိုၚ်တအ်ဂှ် ဒးဂြိပ်ဒဴပါဲဓလေတ်ဒၟံၚ်နွံတုဲ ညးဒေသလ္ၚဵုဂှ် ဒးဒုၚ်ရပ်လဝ်ရ။
ပ္ဍဲကဵုညးဒေသ ဒပ်ကံၚ်ဇြဳပၞာန်ရပ်လဝ် (၃၀)တၠပြၚ်တအ်ဂှ် မၞိဟ်ဗြဴဗွဲမဂၠိုၚ် ပါလုပ်ဒၟံၚ်တုဲ ရပ်စၟဳစၟတ်သၟာန်သၟုက်တုဲ ညးလ္ၚဵုဂှ် ကလေၚ်ဗလးကဵုလဝ် နွံကီုလေဝ် ဗွဲမဂၠိုၚ် ဆက်ရပ်လဝ်ရဂှ် ဂွံတီကေတ်ရ။
ညးဒေသတအ်ဂှ် ယဝ်ရပေါဲဗတိုက်ၜါလ္ပာ်က္တဵုဒှ်ကၠုၚ်မ္ဂး ကောန်ကွာန်ရပ်လဝ်ဂှ် သုၚ်စောဲအာ နဒဒှ်ဒေၚ်ဒုၚ်ဒၞာဏောၚ်ဂှ် ဒှ်ဒၟံၚ်ဓဝိၚ် ဂွိၚ်ဂွာဲဒၟံၚ် နွံရ။
အခိၚ်လၟုဟ်ဏံ ကရောၚ်ပၞာန်ကံၚ်ဇြဳ လုပ်စိုပ် ဖျေံလဝ်ဗ္ဒပ် ပ္ဍဲဘာလကျာ်လက္ကူရ။
ကွာန်လက္ကူဂှ် ဒှ်ကွာန်သ္ၚိမၞုံ (၈၀၀)ပြၚ် မွဲကွာန်တုဲ ကောန်ညးဒေသ ဗွဲမဂၠိုၚ်တအ် ကၠောန်ဒၟံၚ်ကမၠောန်တမ္ၚာကီု ကောန်ဒေသမၞိဟ်တြုံ သၟတ်တအ်ဗွဲမဂၠိုၚ်ဂှ် တိတ်အာကၠောန်စဒၟံၚ် ဍုၚ်သေံ၊ မလေယှာရဂှ် ဂွံတီကေတ်ရ။
ပ္ဍဲဂတုဖေဖဝ်ဝါရဳ စၟတ်တ္ၚဲ (၂၄)တုဲကၠုၚ်တေံဂှ်လေဝ် ဃော ဒပ်ကံၚ်ဇြဳပၞာန် ထ္ပက်ဒၟံၚ်ကရောၚ်ပၞာန် ပ္ဍဲကွာန်တေန်ကာန်တဝ် ပွိုၚ်ဍုၚ်ပဠဝ်ဂှ် ရပ်ကေတ်ဏာလဝ် ညးဒေသ (၁၀)တၠ နဒဒှ်ဒေၚ်ဒုၚ်ဒၞာမၞိဟ်တုဲဂှ် ကြဴနူဂှ်မွဲတ္ၚဲ ကလေၚ်ဗလးကဵုလဝ်ရ။
ပရိုၚ်-သြၚ်လောန်တိုၚ်(မ်)