နျူဒေလဳ၊ မာတ်ချ် (၂)
ဍုၚ်အိန္ဒိယဝွံ သၞာံတုဲကၠုၚ်တေံဂှ် ဒးဒုၚ်စၟတ်လဝ် နဒဒှ်ဍုၚ်အေန်တာနိတ်ပိုတ်ဂၠိုၚ်အိုတ် လ္တူဂၠးတိဏံတုဲ မသုန်သၞာံအဆက်က် ဒဒှ်ရနွံလဝ်စရၚ်လ္တူအိုတ်ဂှ် ဂကောံမၚ်ရံၚ် Access Now ဟီုဂးလဝ်ရ။
နူကဵု Access Now မစၟတ်သမ္တီလဝ် အလုံဂၠးတိဏံ ပ္ဍဲကဵုပရေၚ်အေန်တာနိတ်ပိုတ် (၁၈၇) အမှုဂှ် (၈၄) ဂှ်ဝွံ ဒှ်နူကဵုဍုၚ်အိန္ဒယတုဲ ပ္ဍဲကဵုဒေသကာတ်ယှ်မဳယျာ အန္ဒိယအုပ်ဓုပ်ဂှ် (၄၉) အမှု ပါလုပ်ရောၚ် ထ္မံက်ထ္ၜးလဝ် ပ္ဍဲလိက်ဒုၚ်စဳရေၚ် နူကဵုဂကောံသ္ပအထံက်အရီု စပ်ကဵုအခေါၚ်အရာဒေတ်ဂျေတ်ဒဴ ဖျေံသ္ဇိုၚ်နျူယျံက် မလောၚ်ပ္တိတ်လဝ် ပ္ဍဲဂိတုဖေဖဝ်ဝါရဳ (၂၈) တေံရ။
“သၟိၚ်တၠအဝဵုတံဝွံ ဟိုတ်နူပွပကီုပရာပ်ဂမၠိုၚ် ကေုာံ ပရေၚ်ဍုၚ်ကွာန်ဟွံညိၚ်ဝတ်တံ သီုကဵုပါလုပ် အမိၚ်တိတ်ဗ္တံဟွံဂွံ(၁၆) လလအ်ပွိုၚ်ပိတ္ၚဲ ပ္ဍဲဂိတုဂျာန္နဝါရဳ ကဵု ဂိတုဖေဖဝ်ဝါရဳတံဂှ်ဂးတုဲ ပ္ဍဲကဵုကာတ်ယှ်မဳယျာဂှ် အောန်အိုတ် (၄၉) ဝါ ထပိုတ်လဝ် အခေါၚ်သုၚ်စောဲအေန်တာနိတ်တံရောၚ်” ဂှ် ထ္မံက်ထ္ၜးလဝ် ပ္ဍဲလိက်ဒုၚ်စဳရေၚ် ဂကောံမၚ်ရံၚ်လ္ၚတ်တံရ။
ပ္ဍဲဂိတုအဝ်ဂါတ် သၞာံ ၂၀၁၉ ဂှ် အလဵုအသဳ ဗော်ဝါဒဳကောန်ဂကူဟိန္ဒူ နူကဵုသ္ကိုပ်ဝန်ဇၞော် နာရာန်ဒရာမဵုဒဳ မသ္ကိုပ်သ္ကဂှ်ဝွံ ရုပ်သီထောံလဝ် အခေါၚ်အုပ်ဓုပ်အပိုၚ် တွဵုရးကာတ်ယှ်မဳယျာ ကေုာံ ဂျာန်မူ ဒၞါဲမဿလေမ်ဗွဲမဂၠိုၚ် မသ္ပဒတဴဂှ်တုဲ ပိုၚ်ကၞာတ်ထောံလဝ် နဒဒှ်တိဍာ်အုပ်ဓုပ်ဖေဝ်ဒရာ (၂) ရ။
ဂကောံအခေါၚ်အရာမၞိဟ်တံဂှ် ကုပရေၚ်လညာတ်ဟွံတုပ်သၟဟ် ကေုာံ ပရေၚ်ဟီုဗျိပၠုတ်တံဂှ် နဒဒှ်အစဳအဇန် သ္ဂောံဗ္တိုက်သၠေက်တုဲ အလဵုအသဳဂှ် ဟိုတ်နူပရေၚ်ဂီုကၠီုတုဲ ကၠောန်သ္ပလဝ် တၚ်သၞောတ်ဗ္ၜတ် စပ်ကဵုပရေၚ်ဆက်စၠောံတံ လၟေၚ်ၚ်ရ။
ညးမၞုံပၟိက်ပၞာန်တံဂှ် ပ္ဍဲကာတ်ယှ်မဳယျာဂှ် လုပ်လဝ်ပေါဲဗ္တိုက် ကုပရေၚ်အုပ်ဓုပ်အိန္ဒိယ လလအ်ပွိုၚ်ပိစှော်သၞာံပြၚ်တုဲ ဍုၚ်အာယှသၠုၚ်ကျာဂှ်ဝွံ သွက်ပရေၚ်က္တဵုသပုန်ပၠန်ဂတးဂှ် ပ္တိုန်လဝ်ဒုဟ် ကုပါကေဿတာန်တုဲ အေဿလာမာဗာတ်ဂှ် ကယျာန်ပါဲလဝ် ကုတၚ်စောဲစပ်ဏံရ။
အိန္ဒိယဝွံ ပ္ဍဲကဵုပရေၚ်ထပိုတ်အေန်တာနိတ်ဂှ် ကလေၚ်ဂြိပ်ဒၟံၚ်ဂတ မွဲဝါပၠန်ကီုလေဝ် ပ္ဍဲသၞာံ ၂၀၂၂ ဂှ် ပရေၚ်ထပိုတ်အေန်တာနိတ်အပ္ဍဲဍုၚ်ဂှ် နွံလဝ် သၟဝ် (၁၀၀) ရ။ ဣဏံဝွံ ကြဴနူသၞာံ ၂၀၁၇ တုဲဂှ် ဒဒှ်ရဒှ်အလန်ကိုပ်ကၠာအိုတ်ဂှ် ဂကောံမၚ်ရံၚ်လ္ၚတ်တံ သ္ဂးရ။
ဍုၚ်ယူကရုၚ်ဂှ် ပ္ဍဲသၞာံတုဲကၠုၚ်တေံ ကြဴနူရုယှာလုပ်စိုပ်ၜက်ၜေတ်တုဲဂှ် ဒပ်ပၞာန်ရုယှာတံ ဟိုတ်နူထပိုတ်လဝ် အေန်တာနိတ် ဟွံအောန်နူကဵု (၂၂) ဝါတုဲ ပ္ဍဲစရၚ်ဂှ် ဂွံလဝ်ဒၞါဲဒုတိယရ။
“အခိၚ်ရုယှာ လုပ်စိုပ်ၜက်ၜေတ်ယူကရုၚ်ဂှ် ဒပ်ပၞာန်ရုယှာ ထပိုတ်လဝ် အခေါၚ်သုၚ်စောဲအေန်တာနိတ် အောန်အိုတ် (၂၂) ဝါနွံတုဲ စမြိုၚ်သ္ဇိုၚ် စပ်ကဵုပရေၚ်ဆက်စၠောံဂမၠိုၚ် ကေုာံ ပရေၚ်ဗ္တိုက်သာ်ဗာတံဂှ် ပလီုပလာ်ထောံလဝ် နကဵုတၚ်ရန်တၟံနွံနွံရ” သာ်ဝွံ ထ္မံက်ထ္ၜးလဝ် ပ္ဍဲကဵုလိက်ဒုၚ်စဳရေၚ် ဂကောံမၚ်ရံၚ်လ္ၚတ်ဂှ်ရ။
နဒဒှ်ကလေၚ်ခၠေဝ် ကုပေါဲထ္ၜးဆန္ဒ မဒစဵုဒစး အလဵုအသဳတံဂှ် သၟိၚ်တၠအဝဵုတံ ပ္ဍဲသၞာံ ၂၀၂၂ ဂှ် ဟိုတ်နူဖျေံစၟတ်လဝ် ပရေၚ်ထပိုတ်အေန်တာနိတ် (၁၈) ဝါဂှ်ရ ပ္ဍဲကဵုစရၚ်ဂှ် ယူကရုၚ်တုဲမ္ဂး အဳရာန် နွံဒၟံၚ်ရ။
Ref: Reuters