လ္ဂုၚ်၊ မာတ်ချ် (၂)
ကၟာတ်လဒဵုကၠေံ လ္တူမဗ္တောန်စုတ်ဒဳမဝ်ကရေဇြဳ ပ္ဍဲဘာပုဂ္ဂလိကတံဂှ်ဝွံ ကွးဘာဂမၠိုၚ် တီမံၚ်သၞောဝ်ဒ္ဂေတ်ဒဳမဝ်ကရေဇြဳဂှ် သွက်ကံၚ်ဇြဳပၞာန်ဂှ် ဒှ်ဒၟံၚ်ပရေၚ်ဘပဠဇၞော်ဇၞော်ရောၚ် ညးချဳဒရာၚ်ပရေၚ်ဒဳမဝ်ကရေဇြဳတံကဵု ဗွိုၚ်ပရေၚ်ပညာတံ ဟီုဂးလဝ်ရ။
ဌာနဝန်ဇၞော်ပရေၚ်ပညာ ကံၚ်ဇြဳပၞာန်ဂှ် ပ္ဍဲကဵုဘာဗ္တောန်လိက်ပုဂ္ဂလိကဂမၠိုၚ် ဟိုတ်နူဗ္တောန်စုတ်ဒၟံၚ် ယေန်သၞာၚ်ဒဳမဝ်ကရေဇြဳရးပလိုတ်တံဂှ်ရ သွက်ဂွံလလောၚ်ပ္တိတ် သၞောဝ်ဥပဒေ၊ စေဝ်ပၞောန် မဆက်စပ်ကဵုဘာပုဂ္ဂလိကတံဂှ် ပ္ဍဲဂိတုဖေဖဝ်ဝါရဳ (၁၇) တေံ စၞောန်လဝ် လိက်ကဵုပရိုၚ် ကုသ္ကိုပ်ပရေၚ်ပညာခရိုၚ်၊ တွဵုရးကရေၚ်သီုဖအိုတ်ရ။
ပ္ဍဲတၚ်စၞောန်ဏံဂှ် ချူဓဇက်လလောၚ်ပ္တိတ် သၞောဝ်ပရေၚ်ပညာပုဂ္ဂလိကတံတုဲမ္ဂး ပွမဗ္တောန်ယေန်သၞာၚ်ဒဳမဝ်ကရေဇြဳရးပလိုတ်တံကဵု ပွမဗ္တောန် အရာဟွံမွဲပၟိက်တၞဟ်ဟ်တံဂှ် တာဒၞါကေတ်ဒုဟ်ရေၚ်တၠုၚ် ဗွဲမစိုပ်တရဴမာန်ရောၚ် ရဴဝွံ သ္ဂးလဝ်ရ။
ညးလုပ်ဂကောံ ပရေၚ်ပညာအောန်လာၚ် Burma Academy ကိုဝ်မေန်ခကျဝ်လေန်ဂှ် တာဒၞါကၠေံ ပွမဗ္တောန်ဒဳမဝ်ကရေဇြဳတံဂှ်ဝွံ ဟိုတ်နူဂကောံပၞာန်တံ ဂွိၚ်ဖေက်ဒဳမဝ်ကရေဇြဳဗျာပ်တြးအာ မဒှ်တုဲ ပ္တိတ်ဒၟံၚ်ဇြဟတ် သွက်ဂွံရပ်စပ် သၞောတ်တၠအဝဵုပၞာန်ရောၚ်ဂှ် ပါ်ပါဲလဝ်ရ။
“အလဵုဍေံတံဂှ် ဒၟါနူမိက်ဂွံရပ်စပ် သၞောတ်တၠအဝဵုရဂှ်တုဲ ယေန်သၞာၚ်ဒဳမဝ်ကရေဇြဳ ဗျာပ်တြးအာဂှ် သွက်ဍေံတံ ပြသၞာရောၚ်ဂှ် ထေၚ်လဝ်ရ။ ဂကောံဍုၚ်ပလိုတ်တံဂှ်တှ်ေ သောၚ်မံၚ်ရ၊ ဒၟါနူဒှ်ဒၟံၚ် ဂကောံဟွံထံက်ဂလာန် ကုဍေံတံတုဲ က္ဍုဟ်မၠေံဒၟံၚ်ရ။ ဟီုဗီုဏံ ဂွံဏောၚ်။ နကဵုဍေံတံ သီုၜါဏံပံၚ်တုဲ ဂြဲဖျေံဂွံဏောၚ်။ ဍာံဍာံတေံ အလဵုဍေံတံဖေက်ဂှ်တှ်ေ ပ္ဍဲဍုၚ်ဗၟာဏံ ခေတ်အဆက်က် သွက်ဂွံတဝ်စၞေဟ် ကုဒပ်ပၞာန်ဂှ် ပရေၚ်ချဳဒရာၚ်ကွးဘာဂမၠိုၚ် ဟိုတ်နူက္တဵုဒှ်လဝ်ဂၠိုၚ်အိုတ်ဂှ်ရ နကဵုဍေံတံ လကိုတ်ဒၟံၚ် ဘာဗ္တောန်လိက်တံဂှ်ဏောၚ်။ ကွးဘာဂမၠိုၚ် တီဒၟံၚ်သၞောဝ်စၞောန်ဒဳမဝ်ကရေဇြဳတံဂှ်ဝွံ သွက်ဍေံတံဂှ် ဒှ်အရာဘပဠဇၞော်ဇၞော်ရောၚ်ဂှ် ထ္မံက်ထ္ၜးဒၟံၚ်ရ” သာ်ဝွံ ညးသ္ဂးရ။
ယေန်သၞာၚ်ဒဳမဝ်ကရေဇြဳဍုၚ်ပလိုတ် ကံၚ်ဇြဳပၞာန် မဟီုဂးဒၟံၚ်ဂှ်ဝွံ ကောန်မၞိဟ်ရေၚ်သ္ကအ် သွက်ဂွံဆာန်ကၟိန်လေပ်၊ သၞောဝ်ဒ္ဂေတ်ဒဳမဝ်ကရေဇြဳဂမၠိုၚ်၊ သၞောဝ်ဒ္ဂေတ်အခေါၚ်အရာမၞိဟ် မသ္ပလဝ်စၟတ်သမ္တီ ပ္ဍဲကဵုဍုၚ်မစကာဒၟံၚ်ဒဳမဝ်ကရေဇြဳတံဂှ် စွံအဓိက ဗ္တောန်ဒၟံၚ် ပ္ဍဲကဵုဇုတ်ဓရံၚ်ပညာတံရောၚ် သ္ဂးရ။
ညးချဳဒရာၚ်ပရေၚ်ဒဳမဝ်ကရေဇြဳ ကိုဝ်မေန်တိုဲတေတ် က္ဍိုပ်သ္ကိုပ်ကွးဘာတြေံဂှ်လေဝ် ပြဝကံၚ်ဇြဳပၞာန်လၟုဟ်ဂှ်ဝွံ သွက်အာယုက်တၠအဝဵုပၞာန် သ္ဂောံဂၠိၚ်ဂှ် ထပိုတ်ကၠေံ မဗဳဇဒဳမဝ်ကရေဇြဳ ကေုာံ တမ်ရိုဟ်ဂမၠိုၚ်တံရောၚ်ဂှ် ပါ်ပါဲလဝ်ရ။
“ပ္ဍဲကဏ္ဍပရေၚ်ပညာဂှ် ဘာအလဵုအသဳ မၞုံဒၟံၚ်သၟဝ်အုပ်ဓုပ်အလဵုအသဳတံသၟးဟွံက သီုကဵုပ္ဍဲဘာပုဂ္ဂလိကတံဂှ် ဗ္တောန် သၞောဝ်ဒ္ဂေတ်ဒဳမဝ်ကရေဇြဳတံဟွံဂွံပုဟ်ဟီုဂှ်ဝွံ ဍာံဍာံတေံ သွက်သၞောတ်တၠအဝဵုပၞာန် ဂွံအုပ်ဓုပ်ခိုဟ်ဟ်မာန်၊ အာယုက်ဂွံဂၠိၚ်ဂှ် ထပိုတ်ကၠေံ မဗဳဇဒဳမဝ်ကရေဇြဳတံကဵု တမ်ရိုဟ်ဒဳမဝ်ကရေဇြဳတံရောၚ် မဒှ်ရ။ ဗွဲကြဴမ္ဂး ဂကောံဍုၚ်သ္အာၚ် မဆက်စပ်ကဵုဍေံတံဂမၠိုၚ်၊ ဂကောံကၠုၚ်ကဵုအရီုဗၚ် ပရေၚ်ဗ္စာရဏာမၞိဟ် နူကဵုဍုၚ်သ္အာၚ်ဂမၠိုၚ်တံ ညံၚ်ရဴ NGO, CSO တံဂှ်လေဝ် စဵုဒၞါသၞောတ်ဗ္ၜတ် ပ္ဍဲဍုၚ်ဏံ ကၠောန်ဗီုဏံဟွံဂွံပုဟ်၊ ညအ်ဂှ် သၞောဝ်ဍုၚ်ဗၟာသာ်ဝွံဂးတုဲ ဆက်ကၠောန်အာဏောၚ်ဂှ် နကဵုအဲ ထေၚ်ကေတ်ရ” သာ်ဝွံ ညးသ္ဂးရ။
ကံၚ်ဇြဳပၞာန်ဝွံ သၞာံတုဲကၠုၚ် ပ္ဍဲဂိတုအံက်တဝ်ဗာတေံဂှ်လေဝ် ကလေၚ်ပလေဝ်ပလေတ် ၝောံပိုဒ်လ္ၚဵု မပါလုပ် ပ္ဍဲသၞောဝ်ပရေၚ်ပညာကောန်ဂကူဂှ်တုဲ “ပ္ဍဲသ္ဇိုၚ်ပရေၚ်ပညာဂှ် ဒးသုၚ်စောဲ အရေဝ်ဘာသာဗၟာ နဒဒှ်အရေဝ်ဘာသာ သုၚ်စောဲပ္ဍဲခန်ဗ္တောန်လိက်ရောၚ်” သာ်ဝွံ ထ္ပက်အဇာလလောၚ်ပ္တိတ်လဝ်ရ။
အခိၚ်လၟုဟ်ဂှ် ဒပ်ကံၚ်ဇြဳပၞာန်ဝွံ အပ္ဍဲကာလသီအဝဵု ပွိုၚ် (၂) သၞာံပြၚ်ဂှ် သၞောဝ်ဂမၠိုၚ် မသ္ပဒတန်လဝ် နူကဵုကၠတ်ထဝ်ကၟိန်ဍုၚ်ဂှ် လ္ဂောံကဵုၝောံပိုဒ် ၄၁၉ သၞောဝ်သ္ဇိုၚ် ၂၀၀၈ ဂှ်ဂးတုဲ ပလေဝ်ပလေတ်စၞောန်ပျးဒၟံၚ်တံဂှ် ကၠောန်ဒၟံၚ် အဆက်က်ရ။
ပရိုၚ်−သြၚ်လောန်တိုၚ်(မ်)