ပဠဝ်၊ မာတ်ချ်(၃)
ရးဒေသဇၞော်တၞၚ်သဳ၊ ပ္ဍဲလ္ပာ်ကွာန် မၞုံပ္ဍဲပွိုၚ်ဍုၚ်ပဠဝ်ဂှ် ကံၚ်ဇြဳပၞာန် ထပ်ကၟာတ်လဒဵုကၠုၚ် အခေါၚ်ပ္ဍိုက်ဏာနၚ် ဇွောံမ ကေုာံဂဥုဲဇဗပၠန်ရဂှ် ညးဒေသကီု သီုကဵုညးတာလျိုၚ် ဂကောံအုပ်ဓုပ်ညးဍုၚ်ကွာန် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ကြဴနူလလောၚ်တြးကၠုၚ် ပရေၚ်အုပ်ဓုပ်ပၞာန် ပွိုၚ်ဍုၚ်ပဠဝ်တုဲဂှ် နူကဵုဍုၚ်ပဠဝ် ကံၚ်ဇြဳပၞာန် ဟွံကဵုအခေါၚ်ပ္ဍိုက်ဏာနၚ် ကပေါတ်စၞစသုၚ် ကေုာံဂဥုဇဗ ပ္ဍဲလ္ပာ်ကွာန် သီုပတေၚ်ဂြတ်လဝ် ပရေၚ်စၟဳစၟတ် သီကေတ်ဒၟံၚ်ရ။
ပ္ဍဲဂိတုဖေဖဝ်ဝါရဳ တတိယသတ္တာဟ တုဲကၠုၚ်တေံ ကြဴနူကၟာတ်လဒဵုကၠုၚ် အခေါၚ်ပ္ဍိုက်ဏာနၚ်ကၠေၚ်ဍေန် ပ္ဍဲပွိုၚ်ဍုၚ်ပဠဝ်တုဲဂှ် လၟုဟ်ဏံ ကံၚ်ဇြဳပၞာန် ကလေၚ်ကၟာတ်လဒဵုကၠုၚ် အခေါၚ်ပ္ဍိုက်ဏာနၚ် ဇွောံမစၞစ ကေုာံဂဥုဲဇဗတအ်ပၠန်ရ။
ပရေၚ်ကံၚ်ဇြဳပၞာန် ကၠောန်သ္ပကၠုၚ်ဗီုလၟုဟ်ဏံဂှ် ဒှ်ပရေၚ်ကုတ်ဗပိုတ် ဗပိုတ်ပန်ဂကူ ပ္ဍဲတိဍာ်ဗော်သွးကောန်ဂကူကရေၚ် ကေုာံ PDF တအ် ထိၚ်ဒဝ်အုပ်ဓုပ်လဝ်ဂှ်တုဲ သီုကဵုဒှ် ပရေၚ်ဍဵုဍိုက်ပျဲပျာံ ညးဍုၚ်ကွာန်တအ်ရဂှ် ညးတာလျိုၚ် ဂကောံအုပ်ဓုပ် ပွိုၚ်ဍုၚ်ပဠဝ်မွဲတၠ ဟီုသ္ဂးလဝ်ရ။
ဟိုတ်နူပရေၚ်ကံၚ်ဇြဳပၞာန် ပိုၚ်ခြာစဵုဒၞာလဝ်တုဲ ပ္ဍဲလပါ်ကွာန် မၞုံပ္ဍဲပွိုၚ်ဍုၚ်ပလဝ်ဂှ် ၚုဟ်မးကၠေၚ်ဍေန်၊ ကပေါတ်စၞစသုၚ် ကေုာံဂဥုဲဇဗတအ် က္ဍၚ်တိုန် နူအခိၚ်ကၠာတေံၜါၜါချရဂှ် ဂွံတီကေတ်ရ။
ဂိတုဖေဖဝ်ဝါရဳ တုဲကၠုၚ် စၟတ်တ္ၚဲ (၂)တေံတုဲ လလောၚ်တြးကၠုၚ် ပွိုၚ်ဍုၚ်ပဠဝ် ပရေၚ်အုပ်ဓုပ်ပၞာန်တုဲဂှ် ဟိုတ်နူဒပ်ကံၚ်ဇြဳပၞာန် ထ္ပက်လုပ်ကၠုၚ်ကရောၚ်ပၞာန် ပ္ဍဲလ္ပာ်ကွာန် PDF ကေုာံ KTLA တအ်အုပ်ဓုပ်လဝ် ပါလုပ်သီုကွာန်ကဒေဝ်၊ တေန်ကာန်တုမ်တအ်တုဲ ပေါဲဗတိုက်ဟွံအောန်နူ (၇)ဝါ က္တဵုဒှ်လဝ်တုဲ ပရေၚ်ဇီုကပိုက်ချိုတ်ဂျိုၚ် သီုၜါလပါ်လေဝ် နွံကၠုၚ်ရ။
သ္အာၚ်နူဂှ်ပၠန် ပ္ဍဲကဵုပေါဲဗတိုက်ဏံ ဒပ်ကံၚ်ဇြဳပၞာန် စံၚ်ပလီုလဝ် သ္ၚိဒၟံၚ်ညးဒေသတအ် ဗ္ဒာဲ(၂၀၀)မကီု ဟိုတ်နူဒပ်ကံၚ်ဇြဳပၞာန် ပန်ဖျေံလွဟ်ဇၞော်တုဲ ကောန်အရာပ်ဟွံအောန်နူ (၃)တၠ ဒးချိုတ်လဝ်တုဲ (၁၀)တၠပြၚ် ဂွံလဝ်ဘဲဝပ်ရ။
ပရိုၚ်-သြၚ်လောန်တိုၚ်(မ်)