သာန်တောၚ်၊ မာတ်ချ်(၃)
တွဵုရးကရေၚ် ပ္ဍဲကွာန်ဗိုလ်တေဝ်ကုမ် ဍုၚ်သာန်တောၚ် (၁၃)မိုၚ်ဂှ် တ္ၚဲဏံ ဂိတုမာတ်ချ် စၟတ်တ္ၚဲ(၂) အခိၚ်နူဂယး သီုပေါဲဗတိုက်ဟၟဲ မွဲသာ် နူကဵုဒပ်ကံၚ်ဇြဳပၞာန် ပန်ပှ်ောလဝ်လဝ်လွဟ်ကြာန်ကြာန်တုဲ ကောန်ၚာ်သၟတ်မွဲတၠ ဂွံလဝ်ဘဲဝပ်တုဲ ရပ်ဏာလဝ် ညးဒေသလ္ၚဵုတအ်ရဂှ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ဒပ်ကံၚ်ဇြဳပၞာန် ဇြဟတ်ပါဒၟံၚ် ဗွဲမဂၠိုၚ် နူကဵုကွာန်ၚိုဲတောၚ်ဂျဳကဵု ကွာန်ကျွဲဖျူတောၚ် ဍုၚ်သာန်တောၚ် (၁၃)မိုၚ် မွဲကဆံၚ် လုပ်စိုပ်ကၠုၚ် ကွာန်ဗိုလ်တေဝ်ကုမ်တုဲဂှ် ဖံက်ပန်လဝ်လွဟ်ရ။
ဟိုတ်နူပရေၚ်ပန်ပှော်တုဲ ကောန်ၚာ်မွဲတၠ ဇီုကပိုက်ဂွံလဝ်ဘဲဝပ်တုဲ ကော်ရပ်ဏာလဝ် ညးဒေသ(၃)တၠကီု သီုစံၚ်ပလီုဏာလဝ် ကွဳလိုန်ဓာတ် (၄)ဖ္ဍိုက် သ္ၚိဂအုပ်ကျာ်ဇၞော်ခရေတ်ယာန်ဏီရဂှ် ဂွံတီကေတ်ရ။
အတိုၚ်ညးဒေသတအ် ဟီုဂးလဝ်မ္ဂး ပ္ဍဲကဵုမၞိဟ် ဒပ်ပၞာန်ရပ်ဏာလဝ်တအ် မွဲတၠဂှ် ၜိုန်ရကလေၚ်ဗၠးတိတ်ကၠုၚ်ကီုလေဝ် သှ်ေၜါတၠဂှ်မ္ဂး ဒးဒုၚ်ဆက်ရပ်လဝ်ရဂှ် ဟီုသ္ဂးလဝ်ရ။
ပ္ဍဲဍုၚ်သာန်တောၚ်(၁၃)မိုၚ် မၞုံပ္ဍဲတိဍာ် ဗော်သွးကောန်ဂကူကရေၚ် KNU ဒပ်မဟာ(၂)ဂှ် စနူဂိတုဂျာန္နဝါရဳအိုတ် တုဲကၠုၚ်ဏံ အကြာဒပ်ကံၚ်ဇြဳပၞာန်ကဵု ဂကောံဇြဟတ်စဵုဒၞာတအ် ပရေၚ်ပၞာန်ကြံၚ်မ္ၚိုဟ်တိုန်ကၠုၚ်ဒၟံၚ်တုဲ ဒပ်ကံၚ်ဇြဳပၞာန် စံၚ်ပလီုဒၟံၚ် သ္ၚိညးတာလျိုၚ် KNU မၞုံပ္ဍဲဍုၚ်သာန်တောၚ် ကေုာံ သ္ၚိဌာန်ကောန်အရာပ် ညးဍုၚ်ကွာန်၊ ကွဳစက်ကွဳလိုန်ဓာတ်ကီု သီုပန်ပှော်ဒၟံၚ် ကြာန်ကြာန်ဂှ်ရ ညးဒေသ ဗ္ဒာဲ(၈၀၀၀) တၠပြၚ် ဒးဂြိပ်ဒဴပါဲဓလေတ်ဒၟံၚ်ရ။
အတိုၚ်ဇာနှိက်ပရေၚ်ၜိုဟ်လလံကရေၚ် KPSN လလောၚ်တြးလဝ်မ္ဂး ပရေၚ်ကံၚ်ဇြဳပၞာန် ချဳဒရာၚ်ပၞာန်ကီု သီုကဵုပရေၚ်ဖံက်ပ္ကဝ် အခေါၚ်အရာမၞိဟ်တုဲ ပ္ဍဲတိဍာ်ဒပ်မဟာ(၂) ခရိုၚ်တံၚ်ၚူ KNU ဂှ် ညးဒေသဒးဂြိပ်ဒၟံၚ် ဗ္ဒာဲ(၄၀၀၀၀) နွံကၠုၚ်ဒၟံၚ်တုဲ နွံဒၟံၚ်ပၟိက်ကဵု အရီုဗၚ်ထံက်ပၚ်ပရေၚ်မၞိဟ်ရဂှ် ဂွံတီကေတ်ရ။
ပရိုၚ်-သြၚ်လောန်တိုၚ်(မ်)