မာချံ၊ မာတ်ချ်(၇)
ပ္ဍဲဍုၚ်မာချံက် ကၟိန်ဍုၚ်သေံမွဲဒၞာဲဂှ် သၟတ် ကောန်ကၟိန်ဍုၚ်ဗၟာတအ် က္ဍိုက်က္ဍိုပ်တုဲ ကၠောန်ဗဒှ်လဝ် ပေါဲပါပရအ်ကဵုလညာတ် ဆေၚ်စပ်ကဵု ပရေၚ်ထိၚ်ဒဝ်ပွဳပွူသဘာဝ ပ္ဍဲဂိတုမာတ်ချ် စၟတ်တ္ၚဲ (၆) အခိၚ်သဝ်တ္ၚဲ (၅)နာဍဳ တ္ၚဲဏံရ။
ပေါဲဏံဂှ် ဂကောံထိၚ်ဒဝ်ပွဳပွူသဘာဝတိဍာ်ဍိုပ်ဍဴ ဒေသဒေရေၚ် Green – Land ကၠောန်ဗဒှ်လဝ်တုဲ ဂကောံဇြဟတ်ပၠန်ဂတး မာချံက်တအ် တိုန်စိုပ်လဝ်ဗွဲမဂၠိုၚ်ရ။
အခန်ကၞာဏံဂှ် သွက်ဂွံတီကၠိုဟ်ကေတ် လၟေၚ်ကမၠောန် ထိၚ်ဒဝ်ပွဳပွူသဘာဝ ပ္ဍဲကဵုလၟေၚ်ကမၠောန် ဃောကၠောန်ဒၟံၚ်ပၠန်ဂတးဂှ် ဒှ်ကမၠောန် ဒးကၠောန်ရေၚ်တၠုၚ်အာ ပြေၚ်ၜိၚ်ဍာ် ဍာ်ပါ ပါလုပ်မွဲဂကူတုဲ ကၠောန်ဗဒှ်လဝ်ရဂှ် ညးက္ဍိုက်က္ဍိုပ် ဂကောံတိဍာ်ဍိုပ်ဍဴ – Green Land ဒဝ်တူမေ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
“ပ္ဍဲအခိၚ်ကၠောန်ပရေၚ်ပၠန်ဂတးပိုဲဂှ် ပ္ဍဲကဵုလၟေၚ်ကမၠောန်ဒးကၠောန်ဗက်အာမွဲစွံတအ် ပရေၚ်ထိၚ်ဒဝ် ပွဳပွူသဘာဝ ဒေသဒဵုရေၚ်လေဝ် ပါလုပ်ဒၟံၚ်ရ။ ဒေသဒဵုရေၚ်ဂှ် စိုပ်ဒၟံၚ်အကာဲအရာ ဒးထိၚ်ဒဝ်ပွဳပွူသဘာဝ နဒဒှ်ကာတၟေၚ်ယျဏောၚ်။ ပ္ဍဲကဵုဒေသဒဵုရေၚ် ညးပါဲဘဲပၞာန် ဂၠိုၚ်တိုန်ဒၟံၚ်ဂှ် ဒၟာနူသဘာဝလီုလာ်တုဲ အဆက်စၞ၊ အဆက်မၞိဟ် လီုလာ်ဒၟံၚ် ဗ္ဒာဲ (၆၀) သၞာံနွံကၠုၚ်ဒၟံၚ်တုဲ လၟုဟ်ဏံ ယဝ်ရဟွံထိၚ်ဒဝ်မ္ဂး တၚ်အဓိက သွက်ဂွံဒှ်အာကန္တာရ နွံမာန်ဏောၚ် မိက်ဂွံပါ်ပရအ်ကဵုဏာလညာတ်ရ” ဂှ် ညးဟီုဂးလဝ်ရ။
ဂကောံ Green Land ဂှ် ဒှ်ဂကောံဟွံကေတ်ပရဲ ကလေၚ်တဵုလွဳအာ ညံၚ်ဂြိုပ်ဆုသဘာဝ ဒေသဒဵုရေၚ် ဂွံကလေၚ်ဍိုပ်ဍဴတိုန်တုဲ ကၠောန်ရေၚ်တၠုၚ်ကၠုၚ်ဒၟံၚ် ပရေၚ်ထိၚ်ဒဝ်ပွဳပွူသဘာဝ ပ္ဍဲဍုၚ်ပွိုၚ်ၜိုတ် (၃)သၞာံတုဲကၠုၚ်ဒၟံၚ်ရဂှ် ဂွံတီကေတ်ရ။
သွက်သၞာံ ၂၀၂၃ ဂှ် သွက်ဂွံတဵုလွဳအာဆုတမြံၚ် ပ္ဍဲအပံၚ်လၟိဟ်တိ ၜိုတ် (၆၀) ဨက ဒေသဒဵုရေၚ်ဂှ် ရန်လဝ်နွံတုဲ ယဝ်ရအလဵုညးဒေသတအ် တဵုလွဳမ္ဂး သွက်ဂွံကဵုအာ နဒဒှ်သြန်လုပ် ၚုဟ်မးတဵုလွဳတၞံဆုအာယုက်ဇမၠိၚ် စဳဇန်လဝ်ရဂှ် ဟီုသ္ဂးလဝ်ရ။
ဒှ်ဂကောံဒက်ပ္တန်လဝ်ကဵု ညးချဳဒရာၚ်ကတိုၚ်ကၟဟ် ညံၚ်ပွဳပွူသဘာဝ ဂွံကလေၚ်ဍိုပ်ဍဴကၠုၚ်ကီု သ္ဍိုက်ဆာန်စွံၚုဟ်မးကဵု သတ်ဂြိုပ်အရိုၚ်တုဲ ညးစွံၚုဟ်မးကဵုပွဳပွူသဘာဝ အပ္ဍဲဍုၚ် မ္ၚးဍုၚ် ဗၠးဗၠးၜးၜး မွဲဂကောံရ။
ပရေၚ်ကၠောန်ပ္တိတ်ဆု လောန်လောန်ၜက်က်ကီု၊ ပရေၚ်သုၚ်စောဲသၞောတ်သြောံယဴ ဆုဲပြံၚ်ကီု၊ ပရေၚ်စံၚ်ပ္တိတ်ချးကီု၊ ပရေၚ်ဗာ်သ္ၚဳအှော်ကီု မပ္တံဗီုဏံ ဟိုတ်နူပရေၚ်ဂြိုပ်ဆု ဆောံလေၚ်ဒၟံၚ်တုဲ ဒေသဒဵုရေၚ် ကှ်လီုလာ်စှ်ေကၠုၚ်ဒၟံၚ်ဂှ် ညံၚ်ဂွံကလေၚ်ဍိုပ်ဍဴကၠုၚ်မာန် ဂကောံ “Green Land” တဵုလွဳအာ ဆုတမြံၚ် ကိတ်ညဳကဵုကၠေၚ်တိ ဒေသဒဵုရေၚ်တုဲ ဓမံက်အာရုပ်ရဴ အစဳဇန်လွဳလွတ် မၚ်မွဲရံၚ်စံၚ်ဍာ်ဇမၠိၚ်ရောၚ်ဂှ် ညးဟီုသ္ဂးလဝ်ရ။
ကောန်ဂကောံ Green Land အာယုက်ဍောတ်အိုတ် အခိၚ်လၟုဟ်ဏံဂှ် ဒှ်သၟတ် အာယုက်(၁၄)သၞာံတုဲ စဵုကဵုအာယုက် (၇၀)သၞာံလ္ပာ်လတူ ညးချဳဒရာၚ်ကတိုၚ်ကၟဟ် နူအပ္ဍဲဍုၚ် မ္ၚးဍုၚ်ဂမၠိုၚ် နကဵုတၚ်ရန်တၟံတုပ်သၟဟ် ပါလုပ်ချဳဒရာၚ်ဒၟံၚ်ရဂှ်လေဝ် ဂွံတီကေတ်ရ။
ပရိုၚ်၊ ဗီုရုပ်-သြၚ်လောန်တိုၚ်(မ်)