တိုၚ်ပေ – မာတ်ချ်(၇)
ပရေၚ်ကလေၚ်ပံၚ်ကောံ ကေုာံ ထိုၚ်ဝါန်ဗွဲမၜိုဟ်လလံဂှ် သ္ကိုပ်ဝန်ဇၞော်ကြုက် Li Keqiang ကဵုကၠုၚ်လဝ်ကတိ နကဵုပွမကၠောန်ရေၚ်တၠုၚ် ပရေၚ်ဒစဵုဒစး ကုပရေၚ်ဗၠးၜးထိုၚ်ဝါန်တုဲ ဒဒှ်ရ ထေက်ကဵုဒးသ္ပရှ်ေသှ်ေအာ ကတိကဝတ် ဆေၚ်ရာကဵု ဒဳမဝ်ကရေဇြဳ ကေုာံပရေၚ်ဗၠးၜးရောၚ်ဂှ် တိုၚ်ပေဂှ် ကလေၚ်ပလန်လဝ်ရ။
ထိုၚ်ဝါန် မအုပ်ဓုပ်ဒၟံၚ် အတိုၚ်နဲကဲဒဳမဝ်ကရေဇြဳစှ်ေစှ်ေဂှ် ကၟိန်ဍုၚ်ကြုက်ဟီုဂးလဝ် နဒဒှ်တိဍာ် အပိုၚ်အခြာညးတအ် ပိုၚ်ပြဳလဝ်ဂှ် ပ္ဍဲလောန်ကၠုၚ်လဝ် ပွိုၚ်(၃)သၞာံတေံ သၠုၚ်ပတိုန်ကၠုၚ် ပရေၚ်ချဳဒရာၚ်ပၞာန် ပ္ဍဲဒၞာဲကြပ်အိုတ် ကဵုတ္ကအ်ဂှ်တုဲ ကလေၚ်ပလန်လဝ်တဲ ကုအမေရိကာန် ညးမထံက်ရီုကဵုဒၟံၚ်လကြဴ ကေုာံထံက်ပၚ်ကဵုဒၟံၚ် လွဟ်လက်နက်ဂှ်ရ။
အခိၚ်ဥက္ကဋ္ဌကၠတ်ထဝ်အမေရိကာန်သၟဝ် နာန်ဇြဳပလိုသဳ ကၠုၚ်စိုပ်ဂေတ်ကြေဝ် ထိုၚ်ဝါန်ဂှ်လေဝ် ဒပ်ပၞာန်ကြုက် ကၠောန်သ္ပလဝ် ပရေၚ်ပ္ကတ်ပကေၚ်ပၞာန် ပ္ဍဲဗ္ဒာဲတ္ကအ်ထိုၚ်ဝါန်ဏီရ၊
ပ္ဍဲဂလာန်လၟိၚ် ပံက်ကောံဓရီု ပါလဳမာန်ကြုက်ပေၚ်သၞာံဂှ် သ္ကိုပ်ဝန်ဇၞော်လဳ ထိုၚ်ဝါန်ဏံ ဒှ်လစှ်ေ မွဲဒကုတ်မွဲဒကဴကြုက်ရဂှ် ၜိုန်ရဟီုဂးလဝ်ကီုလေဝ် ဘေဂျေန် ဟွံကၠောန်သ္ပ ပရေၚ်ဘပဠအတိုၚ်ပရေၚ်ပၞာန်ဂှ် ဒတူလာၚ်ဒၟံၚ် နကဵုမူဝါဒကၟိန်ဍုၚ်ကြုက် မွဲကၟိန်ဍုၚ်ဟေၚ်ရဂှ် ဟီုသ္ဂးလဝ်ရ။
သွက်ဂွံသွဟ်ကဵု တၚ်သၟာန်ထိုၚ်ဝါန်ဂှ် နအလဵုအသဳ ထေက်ကဵုဒးဓမံက်ရုပ်ရဴ မူဝါဒဗော်ထေက်တုဲ သွက်သ္ဂောံဒစဵုဒစးအာ ကုပရေၚ်ဗၠးၜးထိုၚ်ဝါန် ကေုာံသွက်ပရေၚ်ကလေၚ်ပံၚ်ကောံဂှ် ဒးကၠောန်ရေၚ်တၠုၚ် လဂါံဇိုၚ်ပိုတ်သ္ကုတ်ထေက်ရဂှ် ဟီုသ္ဂးလဝ် ကုညးစၞး ပ္ဍဲကောံဓရီုဂှ် ၜိုတ်(၃၀၀၀)တၠရ။
“သၠုၚ်ပတိုန် ပရေၚ်ဖောံဗြေဝ်တဴတက် ပရေၚ်ဆက်ဆောံတတ်ကၠောံကလိုဟ်က္ၜဳ ဗွဲမၜိုဟ်လလံတုဲ ထေက်ကဵုဒးသၠုၚ်ပတိုန် အသိၚ်လၟေၚ်ကမၠောန် ပရေၚ်ပံၚ်ကောံကၟိန်ဍုၚ် ဗွဲမၜိုဟ်သြိုဟ်ထေက်ရောၚ်” ဂှ် ညးဟီုသ္ဂးလဝ်ရ။
ညးဍုၚ်ကွာန်ထိုၚ်ဝါန်တအ်ဂှ်မ္ဂး သွက်ဂွံစဵုဒၞာကၟိန်ဍုၚ်တ္ကအ်ဂှ် သုၚ်စောဲအာဇြဟတ်တုဲ ဒစဵုဒစဵုဒၟံၚ် ကုပရေၚ်အုပ်ဓုပ်ကၟိန်ဍုၚ်ကြုက် နကဵုအသံအဝဵုဂှ်ရၚ်သ္ကအ်အိုတ်ရ။
ဆေၚ်စပ်ကဵုတၚ်သမ္တီ ဆေၚ်ဆက်ကဵု ပရေၚ်စဵုဒၞာတုဲ ၜိုန်ရသ္ကိုပ်ဝန်ဇၞော်လဳ ဟွံဓမံက်ထ္ၜးလဝ် ထိုၚ်ဝါန်ကီုလေဝ် ထေက်ကဵုဒးသၠုၚ်ပတိုန်ပရေၚ်ပရဟ်ဒုၚ်ပလေဝ် ပလေဝ်ပလေတ် ဂကောံရပ်လွဟ်တအ် သွက်ပေါဲဗတိုက်ထေက်ရဂှ် ဟီုဂးလဝ်ရ။
ကံၚ်ဇြဳချူဓဇက်မူဝါဒ ကြုက် – ထိုၚ်ဝါန်ဂှ် ပလန်လဝ်တဲ တၚ်ပတိုန်ဂလာန် ကော်ဂး ပွသ္ကိုပ်ဝန်ဇၞော်လဳ ထပ်သ္ပဒ္တန် မူဝါဒထိုၚ်ဝါန် – ကြုက်ဂှ်တုဲ ကလိုဟ်က္ၜဳထိုၚ်ဝါန် သီုၜါလ္ပာ် ဒဒှ်ရဒှ်သၟဝ်တဲဂတးဂတန်ဟွံသေၚ်ရဂှ် ပလန်လဝ်တဲရ။
ကၟိန်ဍုၚ်ကြုက်ဂှ် ပ္ဍဲလတူအခေါၚ်အဝဵုထိုၚ်ဝါန်၊ ဒဳမဝ်ကရေဇြဳ ကေုာံပရေၚ်ဗၠးၜး တၚ်ဒုၚ်ဂိုၚ်ကေတ်လဝ်အဓိကတအ် ကြုက် ထေက်ကဵုဒးသ္ပရှ်ေသှ်ေရောၚ်ဂှ် သုၚ်စောဲယၟုထိုၚ်ဝါန် လုပ်သၞောဝ်တုဲ ဟီုသ္ဂးလဝ်ရ။
သ္အာၚ်နူဂှ်ပၠန် ကိစ္စတတ်ကၠောံကလိုက်က္ၜဳဂှ် နကဵုဓဝ်ဗ္စာ နတဲစှ်ေစှ်ေ၊ ကဆံၚ်တုပ်သၟဟ်၊ ပရေၚ်သ္ပရှ်ေသှ်ေ ဂတးဂတန် ကေုာံ နဇိုၚ်နတဲ ကြုက် ထေက်ကဵုဒးရပ်စပ် သောၚ်ကလးအာတုဲ ဒးဖန်ဗဒှ်ကဵုအကာဲအရာ သွက်ပရေၚ်ဆက်ဆောံဂတးဂတန်ဇြဟတ်ခိုဟ်ရောၚ်ဂှ် ဓမံက်ထ္ၜးလဝ်ရ။
ဒဒှ်ရဘေဂျေန် ဒုၚ်ဂိုၚ်ကေတ်လဝ် သမ္မတထိုၚ်ဝါန်ဂှ် ဒှ်သၟာပါ်တိတ်တုဲ ဒးဒုၚ်ပါဲတးလဝ် တၚ်ကော်ဘိက် သွက်ဂွံသဳကၠဳ ကေုာံကြုက် ဂၠိုၚ်ၚ်ကဵုဝါရဂှ် ဂွံတီကေတ်ရ။
ပရေၚ်ပိုၚ်ပြဳ အခေါၚ်အဝဵု ကၟိန်ဍုၚ်ကြုက်ဂှ် အလဵုအသဳထိုၚ်ဝါန် တးပါဲလဝ်သ္ကာတ်တ်မြဟ်ဟ်တုဲ ညးဍုၚ်ကွာန် တ္ကအ်တအ် (၂၃) ပြကောဋိကိုတ်ဂမၠိုၚ် အခေါၚ်သ္ဂုတ်သွာတ် အနာဂတ်ညးတအ် နွံဒၟံၚ်ရောၚ်ဂှ် ဟီုသ္ဂးလဝ်ရ။
ကၟိန်ဍုၚ်ထိုၚ်ဝါန်ဂှ် ပ္ဍဲကဵုသၞာံ ၂၀၂၄ ကၠုၚ်စိုပ်အခိၚ်ပြဟ်ဟ်ဏံမ္ဂး ကၠောန်ဗဒှ်အာ ပေါဲရုဲစှ်သမ္မတ ကေုာံပါလဳရောၚ်ဒှ်တုဲ ဟိုတ်နူပရေၚ်ကြံၚ်မ္ၚိုဟ် ကေုာံကြုက်တုဲ အပိုၚ်အခြာ သွက်ပရေၚ်စန္ဒက်မာဲ မၞုံဒၟံၚ်ရဂှ် ဟီုသ္ဂးလဝ်ရ။
Ref,Yahoo News