ဗာလေန်၊ မာတ်ချ် (၇)
အဓိပတိဂျာမနဳ အဵုလာဖ်သကဖ်ဂှ် ဍုၚ်ကြုက်ဝွံ သွက်ပေါဲပၞာန်ယူကရုၚ်ဂှ် ယဝ်ရရီုဗၚ်ပလံၚ်ဗစိုပ်လွဟ်လက်နက် ဇရေၚ်ရုယှာမ္ဂး လလေၚ်ဖဵုတံ နွံကၠုၚ်မာန်ရောၚ်ဂှ် ကဵုလဝ်သတိတုဲ နကဵုဗေကျေန် ဝေၚ်ပါဲကၠေံ နူကဵုပြဝသာ်ဏံမာန်ဏောၚ်ဂှ် စၟဳကေတ်ရောၚ် ပ္ဍဲတ္ၚဲအဒိုတ်တေံ ဟီုဂးလဝ် ပ္ဍဲအေန်တာဗျူကဵု CNN ရ။
ဂလာန်သကဖ်သာ်ဏံဂှ်ဝွံ ကြဴနူဆဵုဂဗကဵု သမ္မတအမေရိကာန် ဂျဵုဗိုၚ်ဒေန် ပ္ဍဲဝါယှေန်တာန်တုဲ ဂွံၜါတ္ၚဲဂှ် မံက်တိတ်ကၠုၚ်လဝ်ရ။
ဍုၚ်ကြုက်ဝွံ စပလံၚ်ကဵုဒၟံၚ် ရုယှာ လွဟ်လက်နက်မကမ်တၟအ်ချးတံယျရောၚ် ခြာဟွံလအ်ဏံ ညးတာလျိုၚ်အမေရိကာန်တံ ကဵုလဝ်သတိတုဲ ကၠာလၟေၚ်တရဴညးဏံဂွိုအ်စိုပ်ဂှ် အဓိပတိသကဖ်ဂှ် ဗေကျေန်ဝွံ သွက်ဂွံဝေၚ်ပါဲ နူကဵုပွမပလံၚ်ဗစိုပ် လွဟ်လက်နက်တံဂှ်ကဵု သွက်ဂွံရုပ်သီ ဒပ်ရုယှာ မၞုံပ္ဍဲယူကရုၚ်တံဂှ် သုၚ်စောဲသြဇာညးတုဲ သွက်ဂွံကဵုဇြဟတ်ဂရိုဟ် ကုရုယှာဂှ် ကေၚ်ဖ္တိုက်ဖ္အောဝ်လဝ်ရ။
ယဝ်ရကဵုအရီုဗၚ် ကုရုယှာမ္ဂး သွက်ဂွံတပ်ဒဏ်ကေတ်အရေဝ် ကုကြုက် ကသပ်သာ်ဏံ နွံကၠုၚ်မာန်ဟာ CNN သၟာန်ဂှ် သကဖ်ဝွံ “ ညအ်ဂှ် ဖဵုအဆက်ဂမၠိုၚ် နွံကၠုၚ်ဏောၚ်ဂှ် အဲထေၚ်ရ။ ဆ္ဂး ဒှ်ဗီုဏံဟွံထေက်ပုဟ်ဂှ် လၟုဟ်ပိုယ်တံ စိုပ်ဒၟံၚ်ကဆံၚ် ဟီုပိုတ်တ်သ္ကုတ်တ်မာန်ယျ။ ကိစ္စဏံဂှ် အံၚ်ဇၞးအာ အတိုၚ်တၚ်အာတ်မိက်ပိုယ်တံဏောၚ်ဂှ် အဲညာတ်ကေတ်လ္ပာ်ခိုဟ်ရ။ ဆ္ဂး ညအ်ဂှ် ဒးမၚ်ကျောဝ်ဒၟံၚ်တုဲ ဒးစွံသတိဗွဲမလောန်ဏောၚ်” ဂှ် ညး ဟီုဂးလဝ်ရ။
သဘဴဖဵုဆက်ဂမၠိုၚ်ဂှ် ၜိုန်ရဟွံထ္မံက်ထ္ၜးလဝ် ဗွဲလစှ်ေကီုလေဝ် ဂျာမနဳဝွံ ဒှ်ပရေၚ်ပိုန်ဒြပ်ဇၞော်အိုတ် ဥရဝ်ပတုဲ အပ္ဍဲသၞာံဟွံလအ်ဏံဂှ်ရ ဍုၚ်ကြုက်ဝွံ ဒှ်ကၠုၚ်လဝ်မိတ်ပရေၚ်သွံရာန်ဇၞော်အိုတ် ကုဂျာမနဳ မွဲဓဝ်ရ။
ပ္ဍဲတ္ၚဲအဒိုတ်တေံ အခိၚ်ကလေၚ်စိုပ်ဂျာမနဳဂှ် သကဖ်ဝွံ ကြဴနူဆဵုဂဗကဵုဂကောံဝန်ဇၞော်ညး၊ ဥက္ကဌဥရဝ်ပတုဲဂှ် ပရေၚ်သၟာန်သၟုက် ကလိဂွံလဝ်သက်သဳခိုၚ်ၚ်ကၠိုက်က် နူအမေရိကာန် စပ်ကဵုကိစ္စကြုက်ချပ်ဒၟံၚ် သွက်ဂွံပလံၚ်ဗစိုပ်လွဟ်လက်နက်တံတုဲယျဟာဂှ်ကဵု ယဝ်ရကဵုရုယှာလွဟ်လက်နက်မ္ဂး ကလေၚ်ကၠောန်သ္ပတပ်ဒဏ်ကၟာတ်လဒဵု ကုဗေကျေန်ဟာဟီုဂှ် ကလေၚ်သှ်ကဵုလဝ်ရ။
“ပအပ်ကဵုလွဟ်လက်နက် ကၠောန်သ္ပဟွံဂွံပုဟ်ဟီုဂှ် ပိုယ်တံသီုဖအိုတ် တုပ်လဝ်စိုတ်တုဲ အလဵုအသဳကြုက်ဂှ် ပအပ်ကဵုအာဟွံသေၚ်ပုဟ်ဂှ် ဟီုဂးလဝ်ရ” သာ်ဝွံ အဓိပတိဂှ် ကလေၚ်သှ်ကဵုလဝ်ရ။
စပ်ကဵုပရေၚ်တပ်ဒဏ်ကၟာတ်လဒဵုဏံတုဲ ၜိုန်ရညးသှ်ကဵုလဝ်ဟွံမွဲကီုလေဝ် ဥက္ကဌကဝ်မယှေန်ဂှ် “သွက်ပရူပရာဏံဂှ် ပ္ဍဲပိုယ်တံ ဒဵုကဵုအခိၚ်လၟုဟ် သက်သဳဟွံမွဲကီုလေဝ် ဇၟာပ်တ္ၚဲ ဒးမၚ်ကျောဝ်ရောၚ်” ဂှ် သ္ဂးရ။
ဒၟါနူကဵုအရီုဗၚ်ပရေၚ်ပၞာန် ကုဍုၚ်ရုယှာတုဲ သမဂ္ဂဥရဝ်ပ တပ်ဒဏ်ကေတ်အရေဝ် ကုဍုၚ်ကြုက် နွံ၊ ဟွံမွဲဟာဂှ်ဝွံ ယဝ်ရဒှ်ကၠုၚ်ဍာံဍာံမှဟေၚ် ဒှ်ခန်သၟာန်သွပ်လ္ပအ် ကလိဂွံသွဟ်မာန်ရောၚ်ဂှ် ဥက္ကဌ ဟီုဂးလဝ်ရ။
Ref: AP