လ္ဂုၚ်၊ မာတ်ချ် (၇)
အလုံမွဲကၟိန်ဍုၚ် အပ္ဍဲဂိတုဂျာန္နဝါရဳ ကဵု ဂိတုဖေဖဝ်ဝါရဳ ပွိုၚ် (၂) ဂိတု သၞာံဏံဂှ် နဲကဲ ဒပ်ကံၚ်ဇြဳပၞာန် ဖံက်ပ္ကဝ်လဝ်အခေါၚ်အရာမၞိဟ် ပ္ဍဲကဵုရးဒေသ ကေုာံ တွဵုရးတံဂှ် နွံလဝ် စဵုကဵု (၂၅) ဂကူတုဲ ကလိလောန်လဝ် စဵုကဵု (၆၄၀) ဝါဂှ် ဂွံတီကေတ် နူကဵုတၚ်နၚ် Spring Archive လၟေၚ်သတ္တာဟဂှ်ရ။
ဂၞန်တံဏံဝွံ ဒုၚ်သ္ဇိုၚ်ကဵု ပရိုၚ်မဳဒဳယာ နူကဵု Spring Archive − ဇာဇၞိက်စၟတ်သမ္တီအခေါၚ်အရာမၞိဟ် (ဍုၚ်ဗၟာ) ဂှ်တုဲ နူကဵုသြၚ်လောန်တိုၚ်(မ်) ကလေၚ်ပကောံပကေဝ်လဝ် တၚ်နၚ်မလလောၚ်ပ္တိတ်လဝ်လၟေၚ်သတ္တာဟတံဂှ်ရ။
ပ္ဍဲကဵုရးဒေသ ကေုာံ တွဵုရး မဒးဂဗလဝ် ပရေၚ်ဖံက်ပ္ကဝ်အခေါၚ်အရာမၞိဟ်တံဂှ် လၟိဟ်လ္တုန်လ္ပာ်ဒပ်ကံၚ်ဇြဳပၞာန် ကလိလောန်လဝ်ဂှ် (၃၄၀) ဝါပြၚ်နွံလဝ်တုဲ ရးသက်ကိုၚ်ဝွံ နကဵုလၟိဟ်လ္တုန် (၁၃၀) ပြၚ်ဂှ် ဒးဒုၚ်ကလိလောန်လဝ်ဂၠိုၚ်အိုတ်ရ။
ညးဒေသသက်ကိုၚ်မွဲတၠဂှ် ဒပ်ကံၚ်ဇြဳပၞာန် စံၚ်သ္ၚိဌာန်ကီု၊ ဆဵုကောန်အရာပ်တံမ္ဂး ရပ်ဒက်ကော် နဒဒှ်ညးဒးဒုၚ်သ္ပဒၞန်တုဲ ဂစိုတ်ထောံတံဒှ်တမ် ဒဒှ်မဖံက်ပ္ကဝ်အခေါၚ်အရာမၞိဟ်တံ နွံဒၟံၚ် တၟာဂလိုၚ်ဏောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“မွဲဒမြိပ်ဗ္ဒါဲပိုယ်တံဂှ်မ္ဂး စံၚ်သ္ၚိဌာန်တံ၊ မၞိဟ်ဆဵုဂှ် ရပ်။ တုဲတှ်ေ ကော်ဏာမၞိဟ်ဒးဒုၚ်သ္ပဒၞန်တံတုဲ ဍေံတံဟွံမွဲပၟိက်မ္ဂး ဂစိုတ်ထောံလဝ်ရ။ စံၚ်ပလီုပလာ်ဏာလဝ် သ္ၚိဌာန်ဗွဲမဂၠိုၚ်ဂၠေၚ်ဂှ် ပိုယ်တံဂွံဆဵုကေတ် နမတ်မ္ဂး ဒးလရိုဟ်သ္ဇက်ဟီုဟွံမွဲရ။ ပၞာန်ဂှ် ပါဲဂွံဒၟံၚ်ဏီ။ ပါဲတုဲ အခိၚ်ကလေၚ်စဴကၠုၚ်ရဂှ် သ္ၚိဌာန်သ္ဇက်ဂွံမံၚ်တံ ဟွံမွဲ သာ်ဏံတံရ။ ဒဒှ်မဖံက်ပ္ကဝ်အခေါၚ်အရာမၞိဟ် သာ်ဏံတံဂှ် တၟာဂလိုၚ်ဏောၚ်” သာ်ဝွံ ညးသ္ဂးရ။
ပ္ဍဲကဵုနဲကဲ ကောန်ဂကောံဒပ်ကံၚ်ဇြဳပၞာန်တံ မဖံက်ပ္ကဝ်လဝ် (၂၅) ဂကူဂှ် လၟိဟ်လ္တုန်ဂၠိုၚ်အိုတ် စံၚ်ပလီုပလာ်စမြိုၚ်ညးဍုၚ်ကွာန်ဂှ် (၉၆) ဝါ၊ ပန်ပှော်ကဵုလွဟ်ဇၞော်ဂှ် (၈၂) ဝါနွံလဝ်တုဲ ကောန်အရာပ်ဂမၠိုၚ် ဒးဒုၚ်ရပ်ဂှ် (၇၄) ဝါ နွံလဝ်ရ။
သ္အာၚ်နူဂှ်ပၠန် ဗ္တိုက်ဂြာတ်မခတိုဟ် နကဵုက္ၜၚ်ကျာကီု၊ သ္ပဇွောံစဵုဒၞါပၞာန်တုဲ ရပ်ဒက်ဏာ နဒဒှ်ညးဒးဒုၚ်သ္ပဒၞန်ကီု၊ ရပ်ဒက်ဍဵုဍိုက်ပျဲပျာံတံကီု၊ စံၚ်ဂစိုတ်ညးဍုၚ်ကွာန်တံကီု၊ ရပ်ဒက်ကောန်ၚာ် အာယုက်ဟွံပေၚ်တံ၊ ပစူမာၚ်တိုပ်တိတံဒှ်တမ် နကဵုနဲကဲသာ်ဏံတံဂှ် ဖံက်ပ္ကဝ်လဝ်အခေါၚ်အရာမၞိဟ်တံ ဂၠိုၚ်ၚ်ကဵုဝါရ။
ညးဒေသမွဲတၠ မပါလုပ်လဝ် ပ္ဍဲချဳဒရာၚ်ဗကပ်ဗဗေၚ် မၞုံအပ္ဍဲရးသက်ကိုၚ်ဂှ်လေဝ် ကၠောန်ထ္ၜး ကုညးဍုၚ်ကွာန်တံ ဓဇန်ဓဇန်ခ္ဍၚ် ညးဍုၚ်ကွာန်တံဂှ် လ္တူနူကၠာတေံ စိုတ်ဓာတ်ကတိုၚ်ကၟုဟ်တုဲ သာတုဲက္ဍုဟ်မၠေံ ကံၚ်ဇြဳပၞာန်တံခ္ဍၚ်ရောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ကၠောန်ထ္ၜးဗီုဏံခ္ဍၚ် ညးဍုၚ်ကွာန်တံဂှ် ဖေက်ဂှ်ဖေက်ဒၟံၚ်အိုတ်ရ။ ဆ္ဂး ကၠောန်ထ္ၜးဗီုဏံခ္ဍၚ် စိုတ်ညးတံ (ညးဒေသ) သာတုဲ ဒုၚ်ဟွံမာန်ခ္ဍၚ်ရ။ စိုတ်ညးတံ သာတုဲကတိုၚ်ကၟုဟ်ကၠုၚ် နူကဵုကၠာတေံရ။ ဖံက်ပ္ကဝ်အခေါၚ်အရာမၞိဟ် သာ်ဏံတံ ကၠောန်ထ္ၜးဓဇန်ဓဇန် ဒဵုကဵုဗၞတ်ဏံဂှ်တှ်ေ ဖေက်ဂှ်တှ်ေ ဖေက်မွဲကဏ္ဍရ။ ဆ္ဂး က္ဍုဟ်မၠေံအာဍေံတံ (စကစ) ဂှ် ပေၚ်ၚ်ရ။ ဍေံတံ ကၠောန်သာ်ဏံခ္ဍၚ် ညးဍုၚ်ကွာန်တံဂှ် သာတုဲက္ဍုဟ်မၠေံကၠုၚ်ခ္ဍၚ်ဏောၚ်” သာ်ဝွံ ညးသ္ဂးရ။
သွက်ဂွံရပ်စပ် အမိၚ်အုပ်ဓုပ်ပၞာန် ပ္ဍဲပွိုၚ်ဍုၚ် (၁၄) မၞုံအပ္ဍဲရးသက်ကိုၚ် ဒၞါဲပရေၚ်ဒစဵုဒစးကံၚ်ဇြဳပၞာန် ဇြဟတ်ခိုဟ် သီုပၠန်ဂတးရပ်လွဟ်တံကီု သီုဗကပ်ဗဗေၚ်ဗလးတိတံကီုဂှ် တုဲကၠုၚ် ဂိတုဖေဖဝ်ဝါရဳ (၂) တေံ ကံၚ်ဇြဳပၞာန် လလောၚ်တြးလဝ်ရ။
ကောန်ဂကောံဒပ်ကံၚ်ဇြဳပၞာန်တံ ကော်ဏာ ညးဒေသလ္ၚဵု မၞုံကွာန်တာတိုၚ်၊ ပွိုၚ်ဍုၚ်သက်ကိုၚ်၊ ရးသက်ကိုၚ်တံ နဒဒှ်ညးဒးဒုၚ်သ္ပဒၞန်တုဲ ပ္ဍဲဂိတုမာတ်ချ် (၂) ဂှ် ဂစိုတ်လဝ် ညးဒေသ (၁၇) တၠ သီုကဵုပါလုပ်ညးဗြဴတံဂှ် ဂွံတီကေတ် နူကဵုညးဒေသတံရ။
သ္အာၚ်နူဂှ်ပၠန် ပ္ဍဲဂိတုမာတ် (၃) ဂှ်လေဝ် ဟိုတ်နူပရေၚ်ပန်ပှော်လွဟ်ဇၞော် ကောန်ဂကောံဒပ်ကံၚ်ဇြဳပၞာန် မလုပ်စိုပ်ထ္ပက်ကၠုၚ်ကရောၚ်ပၞာန် ပ္ဍဲကွာန်ခေန်မန်၊ ပွိုၚ်ဍုၚ်ချံၚ်ဥူ၊ ရးသက်ကိုၚ်ဂှ်တုဲ ကောန်ၚာ်သၟတ် အာယုက် (၁၃) သၞာံမွဲတၠပါလုပ်ကီုဂှ် ညးဒေသ (၃) တၠ ဒးချိုတ်အာလဝ်ရ။
အတိုၚ်တၚ်နၚ် UNOCHA တံဂှ်မ္ဂး အလုံမွဲကၟိန်ဍုၚ် အပ္ဍဲဂိတုဂျာန္နဝါရဳ ကဵု ဂိတုဖေဖဝ်ဝါရဳ ပွိုၚ် (၂) ဂိတုဂှ် ညးဍုၚ်ကွာန်ကောန်အရာပ် (၁၅၄၀၀၀) ပြၚ်ဝွံ ဒးထောံလသာဌာန်ဒၟံၚ် ဒးဂြိပ်ဒဴဒၟံၚ်ရောၚ်ဂှ် ပ္ဍဲဂိတုမာတ် (၅) တေံ လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)