ရေဝ်၊ မာတ်ချ် (၈)
သၞေဟ်ကၚ်စၟဳတ်ကံၚ်ဇြဳပၞာန် မၞုံပ္ဍဲဒဒန်ဇၞော်ဍုၚ်ရေဝ်၊ ပွိုၚ်ဍုၚ်ရေဝ်၊ တွဵုရးဍုၚ်မန် မလလောၚ်တြးလဝ် ပရေၚ်အုပ်ဓုပ်ပၞာန်ဂှ်ဝွံ ပ္ဍဲဂိတုမာတ်ချ် (၇) လဒေါဝ်တ္ၚဲ ၜိုတ် (၂) နာဍဳဂှ် ဒးဒုၚ်ဗ္တိုက်လဝ်ကဵုဒရုၚ်ရောၚ် ညးဒေသတံ သ္ပဒတန်ဟီုလဝ်ကဵု ဌာန်ပရိုၚ်သြၚ်လောန်တိုၚ်(မ်) ရ။
သၞေဟ်ကၚ်စၟဳစၟတ်ကံၚ်ဇြဳပၞာန် မၞုံပ္ဍဲဒဒန်ဇၞော်ဍုၚ်ရေဝ် မပတေၚ်ဂြတ်လဝ် ပရေၚ်စၟဳစၟတ်ကၟာတ်လဒဵုဂှ် ဂကောံလကိုဟ်ဍုၚ်ရေဝ် မဒှ်ဂကောံဇြဟတ်ပၠန်ဂတးဖျေံသ္ဇိုၚ် ပွိုၚ်ဍုၚ်ရေဝ်မွဲဂကောံ ကၠုၚ်စိုပ်ဗ္တိုက်လဝ်ကဵု ဒရုၚ်ရ။
ပ္ဍဲကဵုပရေၚ်ဗ္တိုက်ဏံဂှ် ကြဴနူဂွံမိၚ်ကေတ် ရမျာၚ်ဗ္တိုဟ်ထ္ကးထတ်တ်တုဲ ဒဒှ်ရပရေၚ်ပန်ပှော် နွံလဝ်ဂှ်ကီု ကေုာံ ယာဉ်ဖ္ဍိုက်မၞိဟ်ယဲလ္ၚဵုတံလေဝ် ဒဳအာလဝ် လ္ပာ်ဒဒန်ဂှ် ဂွံတီကေတ်ရ။
ညးဒေသတံဂှ် ပ္ဍဲကဵုပရေၚ်ဗ္တိုက် နကဵုဒရုၚ်ဂှ် လ္ပာ်ကံၚ်ဇြဳပၞာန် ဟွံအောန်နူကဵု (၂) တၠ ဇီုကပိုက်ချိုတ်မာန်ရောၚ် ဟီုဂးဒၟံၚ်ကီုလေဝ် နကဵုသြၚ်လောန်တိုၚ်(မ်) သ္ပဒတန်တၞဟ်ခြာဟွံမာန်ဏီရ။
က္ဍိုပ်သ္ကိုပ်ဂကောံလကိုဟ်ဍုၚ်ရေဝ်ဂှ် ဒဒှ်ရအာစိုပ်ဗ္တိုက်လဝ် သၞေဟ်ကၚ်စၟဳစၟတ်ကံၚ်ဇြဳပၞာန် မၞုံပ္ဍဲဒဒန်ဇၞော်ဍုၚ်ရေဝ် နကဵုဒရုၚ်ဂှ် ချူပ္တိုန်လဝ် ပ္ဍဲမုက်လိက်ဇာဇၞိက်ပရေၚ်မၞိဟ်ညးရ။
စပ်ကဵုလၟေၚ်ဒဒှ်ပရေၚ်ဗ္တိုက်ဏံတုဲ နူကဵုသြၚ်လောန်တိုၚ်(မ်) ၜိုန်ရဆက်စၠောံသၟာန်သၟုက် က္ဍိုပ်သ္ကိုပ်ဂကောံလကိုဟ်ဍုၚ်ရေဝ်တံကီုလေဝ် ဒဵုကဵုအခိၚ်လၟုဟ် ဟွံကလိဂွံအဆက်ဏီရ။
ဂကောံလကိုဟ်ဍုၚ်ရေဝ်ဝွံ ပ္ဍဲဂိတုဖေဖဝ်ဝါရဳ (၁၉) တုဲကၠုၚ်တေံဂှ်လေဝ် လုပ်စိုပ်ဗ္တိုက်လဝ် သၞေဟ်ကၚ်စၟဳစၟတ်ကံၚ်ဇြဳပၞာန် မၞုံပ္ဍဲဒဒန်ဇၞော်ဍုၚ်ရေဝ်ဂှ်တုဲ ပ္ဍဲကဵုပရေၚ်ဗ္တိုက်ဏံဂှ် လ္ပာ်ကံၚ်ဇြဳပၞာန် ဒးဂိအာလဝ်ရ။
ပရိုၚ်−သြၚ်လောန်တိုၚ်(မ်)
ဗီုရုပ် -ဂကောံလကိုဟ်ဍုၚ်ရေဝ်