ဘာပန်၊ မာတ်ချ် (၈)
ပ္ဍဲတိဍာ်ဒပ်မဟာ (၅) ခရိုၚ်ဘာပန် ဗော်သွးကောန်ဂကူကရေၚ် KNU ဂှ် ဟိုတ်နူပရေၚ်ဗ္တိုက်ထောံဗုမ် ဒပ်ကံၚ်ဇြဳပၞာန် မသုၚ်စောဲကၠုၚ် ပရေၚ်ဗ္တိုက်တရဴကျာတံဂၠိုၚ်ဂှ်တုဲ အပ္ဍဲဂိတုဖေဖဝ်ဝါရဳ (၁) ဂိတုဂှ် ညးဍုၚ်ကွာန်ကောန်အရာပ် (၃) တၠ ချိုတ်တုဲ သ္ၚိဒၟံၚ် (၃၀) မပြၚ် ပၟတ်တူလီုလာ်အာလဝ်ဂှ် ပ္ဍဲဂိတုမာတ်ချ် (၇) တေံ ဒပ်မဟာ (၅) လလောၚ်ပ္တိတ်လဝ်ပရိုၚ်ရ။
အပ္ဍဲဂိတုဖေဖဝ်ဝါရဳ ပွိုၚ် (၁) ဂိတုဂှ် က္ၜၚ်ကျာကံၚ်ဇြဳပၞာန်တံ စိုပ်ကၠုၚ် ပ္ဍဲကဵုကွာန် ဒၞါဲညးဍုၚ်ကွာန်ကောန်အရာပ်တံ မံၚ်စံသ္ပဒတဴတံ ကေုာံ ကၠအ်ဗ္ၚ မၞုံအပ္ဍဲတိဍာ် ဒပ်မဟာ (၅) ခရိုၚ်ဘာပန်ဂှ် (၇) ဝါတုဲ ကၠုၚ်စိုပ်ဂြာတ်ထောံလဝ်မခတိုဟ်မဇၞော်ဂှ် (၄၄) မတုဲ ပန်ပှော်ဏာလဝ် လွဟ်ဇၞော် (၅၆) မဂှ် ပါလုပ် ပ္ဍဲတၚ်လလောၚ်တြးဂှ်ရ။
စွံပွန်လ္တူညးဍုၚ်ကွာန်ကောန်အရာပ်တံတုဲ ပန်ပှော်စုတ်လဝ် နကဵုက္ၜၚ်ကျာဂှ် အပ္ဍဲဂိတုဖေဖဝ်ဝါရဳ (၁) ဂိတုဓဝ်ဂှ် ညးဍုၚ်ကွာန်ကောန်အရာပ် (၃) တၠ ချိုတ်တုဲ (၄) တၠ ကလိဂွံလဝ်ဝပ်ဂှ် သ္ဂးရ။
အပ္ဍဲပရေၚ်ဗ္တိုက်တရဴကျာ ဒပ်ကံၚ်ဇြဳပၞာန်ဂှ် သ္ၚိဒၟံၚ်ညးဍုၚ်ကွာန်ကောန်အရာပ်တံ (၃၆) မ ပၟတ်တူလီုလာ်အာလဝ်တုဲ ကွဳစက် (၁) ဖ္ဍိုက်၊ ကွဳလိုန်ဓာတ် (၂) ဖ္ဍိုက်၊ စက်ဗုတ်သ္ၚု (၁) မ၊ စက်ထဲတိ (၄) ဖ္ဍိုက်၊ စက်ပၟတ် (၁) မ ၊ အေန်တာနိတ်ဝိုၚ်ဝှာၚ် မွဲမ ကေုာံ ကပေါတ်မဆက်စပ်တၞဟ်သ္အာၚ်တံလေဝ် လီုလာ်ဆောံလေၚ်အာလဝ်ရ။
သ္အာၚ်နူဂှ်ပၠန် အကြာဒပ်မဟာ (၅) KNLA ကဵု ဒပ်မၚ်ပယျဵု BGF ဒပ်ကံၚ်ဇြဳပၞာန်တံဂှ် ပ္ဍဲဂိတုဖေဖဝ်ဝါရဳ (၁) ဂိတုဓဝ်ဂှ် ပေါဲဗ္တိုက်အပံၚ် (၁၇၈) ဝါ က္တဵုဒှ်လဝ်တုဲ လ္ပာ် BGF ကံၚ်ဇြဳပၞာန်ဂှ် သီုကဵုပါလုပ်ကဆံၚ်ဗိုလ်ဇၞော် (၁) တၠဂှ် (၆၉) တၠ ချိုတ်အာလဝ်တုဲ (၄၉) တၠ ဇီုကပိုက်ကလိဂွံလဝ်ဝပ်တုဲ လ္ပာ်ဒပ်မဟာ (၅) ဂှ်လေဝ် ကောန်သ္ဂံၚ် (၂) တၠ ပြဟ်လလုဲတုဲ (၃) တၠ ကလိဂွံလဝ်ဝပ်ဂှ် ဂွံတီကေတ် လ္ဂောံကဵုတၚ်လလောၚ်တြးဝွံရ။
ပရိုၚ်−သြၚ်လောန်ုတိုၚ်(မ်)
ဗီုရုပ်- KNU -Mutraw News