ကလဝ် – မာတ်ချ်(၈)
ကောန်ဒပ်တအ်ဂှ် အခိၚ်ဟွံရုဲ ဒးလုပ်ပေါဲဗတိုက်မာန်ဒၟံၚ်တုဲ အခိၚ်ဒးလုပ်ပေါဲဗတိုက်မ္ဂး ကွတ်ပၞာန် ဗ္တောန်ကဵုလဝ်ဂှ် သုၚ်စောဲအာ ညံၚ်ဂွံနွံကဵုဖိုလ်စိုပ်တရဴ ဒးလုပ်အာပေါဲဗတိုက် နကဵုစိုတ်ဓာတ် ဆုမိက်ဂွံဍိုက်ဍိုက် ကၠမိက်ဂွံဇြာ်ဇြာ်ရောၚ်ဂှ် က္ဍိုပ်သ္ကိုပ်ပၞာန်သီအဝဵု ဂအုပ်သ္ကိုပ်ဗိုလ်ဇၞော်မေန်အံၚ်လှာၚ် ဟီုသ္ဂးလဝ်ရ။
ဂိတုမာတ်ချ် စၟတ်တ္ၚဲ(၆) တုဲကၠုၚ်ဂှ် အာစိုပ်ဆဵုဂဗလဝ်ကဵု သၞာဲဒဴ၊ ကၟိန်အိန်ထံၚ်ပၞာန် ပ္ဍဲကဵုရးဒပ်ကလဝ် ဌာန်ဂအုပ်ပၞာန်ရးဗၟံက် ပ္ဍဲကဵုၝောံခန်ရးပၞာန်ဂှ် ဟီုသ္ဂးကၠုၚ်လဝ် သာ်ဏံရ။
“ဇၟာပ်ပ်ကောန်ပၞာန်ဂှ် ဒဒှ်ရ ဒးတိုန်စိုပ်တန်ဗ္တောန်သၠုၚ်ကဆံၚ် ဗွဲမဗဗွဲကဵု စရာဲဍာ်ဒကေဝ်၊ အာယုက်ပၞာန်၊ ပရေၚ်ဆိုက်ဗ္ဒက်ကီု၊ နကဵုကောန်ပၞာန်မွဲမွဲတၠ ညံၚ်ဂွံယိုက်ဂၠေၚ်တာလျိုၚ် ဂွံပြေမာန်ဂှ် ဒဒှ်ရဗ္တောန်ပ္ကတ်ပကေၚ်ကဵုဒၟံၚ်ကီု” ဂှ် က္ဍိုပ်သ္ကိုပ်ပၞာန်သီအဝဵု ဟီုသ္ဂးလဝ်ရ။
ပါဲနူဏံပၠန် ညံၚ်သ္ဂောံနွံကဵုစိုတ်ဓာတ် မိက်ဂွံယိုက်ဂၠေၚ် တာလျိုၚ် မကဵုကၠုၚ် စဵုကဵုပြေဂှ် ဒးနွံလဝ်တုဲ တာလျိုၚ်လၟေၚ်ကမၠောန် မကဵုကၠုၚ်လဝ်ဂှ် သွက်ဂွံဒုၚ်ဂိုၚ်ကေတ် နဒဒှ်တာလျိုၚ်ဒးယိုက်ဂၠေၚ်ရေၚ်တၠုၚ် နကဵုတၚ်ဒုၚ်ဂိုၚ်ကေတ်ခိုဟ်ဟ်ပြဲပြဲ ဒးမံၚ်တန်တဴအာတုဲ ဟွံပါဲတး တာလျိုၚ်မကဵုကၠုၚ်လဝ် ဒးယိုက်ဂၠေၚ် ဒဵုလျိုၚ်ပြေဏောၚ်ဂှ် ညးဟီုသ္ဂးလဝ်ဏီရ။
ယဝ်ရယိုက်ဂၠေၚ်တာလျိုၚ် ဆေၚ်ရာရုပ်ရုပ်ဝတ္ထု မကဵုကၠုၚ် ကတိုၚ်ကတိုၚ်ကၟဟ်ဟ်မ္ဂး ဒှ်အထံက်အရီု သွက်ပရေၚ်တဴတက်ဘဝဇကု ဗွဲမဂၠိုၚ်ရဂှ် က္ဍိုပ်သ္ကိုပ်ပၞာန် ဟီုသ္ဂးလဝ်ရ။
“ပရေၚ်ခရိုဟ်လီုဒၟံၚ် ပ္ဍဲကဵုဒပ်ဂှ် ဒှ်ကၠုၚ်ဒၟံၚ်ယျ လၟုဟ်တှ်ေ ဟွံမိက်တိတ်မုက်ပၞာန်တုဲ ညးထ္ပက်လဝ်လာဘ်သ္ကာတအ်လေဝ် ဂၠိုၚ်တိုန်ကၠုၚ်ဒၟံၚ်ရ။ ဟွံကေတ်အဆက်ကဵုပိုဲတုဲ မၞိဟ်ဂြိပ်တိတ်အာ အတိုၚ်ဏံလေဝ် နွံရ။ ဆက်စၠောံကဵုပိုဲတုဲ ပရေၚ်လုပ်ဇူဗ္ဒာဲတအ်၊ ပရေၚ်လုပ်ဇူဗ္ဒာဲဒၟံၚ် ပ္ဍဲကဵုဒပ်စဵုဒၞာ မၞုံပ္ဍဲကဵုမုက်ပၞာန်လေဝ် ဂၠိုၚ်ကၠုၚ်ဒၟံၚ်ယျ” ဂှ် ဗိုလ်ဇၞော် CDM မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
အခိၚ်လၟုဟ်ဏံ ရပ်ကေတ်လွဟ် ၜိုတ်ဒှ်ကဵုဒှ်တုဲ ဟိုတ်နူပၠန်ဂတးဒၟံၚ်ကဵု ကောန်ဒပ်ကံၚ်ဇြဳပၞာန် ပ္ကီုပရာပ်ဒၟံၚ်ညးဍုၚ်ကွာန်တုဲ ပရေၚ်ကောန်ဒပ်ကံၚ်ဇြဳပၞာန် ဒးချိုတ်ဒၟံၚ် အရိုဟ်ဒဒှ်တ္ၚဲ နွံဒၟံၚ်ဂှ်ရ ပရေၚ်ဂြိပ်တိတ် နူဒပ်တအ်လေဝ် နွံကၠုၚ်ဒၟံၚ်ရ။
ပ္ဍဲကဵုဒပ်ကံၚ်ဇြဳပၞာန် ပရေၚ်မၚ်ရံၚ်ဒၟံၚ်ဂွန် ညးမွဲကေုာံညးမွဲ က္တဵုဒှ်ဒၟံၚ်တုဲ ဟိုတ်နူပရေၚ်ဒှ်သၠေဟ်ပၟာညးသ္ကအ် ဒှ်ကၠုၚ်ဒၟံၚ်ဂှ်ရ ခြာဟွံလအ်ဏံ အကာဲအရာဒးခရိုဟ်စှ်ေ ဒှ်မာန်ဒၟံၚ်ရဂှ် ညးသ္ဂးလဝ်ဏီရ။
လ္ပာ်ကံၚ်ဇြဳပၞာန်သီအဝဵုမ္ဂး သွက်ဂွံစဵုဒၞာပရေၚ်ဒကးပရး ပ္ဍဲဒပ်ပၞာန်ဂှ် ရန်ကဵုသွက်ဂွံထိၚ်ဒဝ်ကောန်ဒပ်ကံၚ်ဇြဳပၞာန်တုဲ ကၠောန်သ္ပဒၟံၚ် ပရေၚ်တြးဝါဒ နကဵုနဲကဲစုၚ်ရ။
ဗွဲကြဴနူ ကေတ်ဇြဟတ်ကဵုလွဟ်တုဲ ဒပ်ပၞာန်သီလဝ်အဝဵု ကၟိန်ဍုၚ်ဗၟာဂှ် ဟိုတ်နူပရေၚ်ပ္ကီုပရာပ်တုဲ ညးဍုၚ်ကွာန် ပိလ္ၚီတၠပြၚ် ဒးချိုတ်အာလဝ်ရဂှ် ဓမံက်ထ္ၜးလဝ် ပ္ဍဲဂကောံရီုမၚ်မွဲရံၚ်စံၚ် ကောန်ထံၚ်ပရေၚ်ဍုၚ်ကွာန် AAPP ရ။
ပရိုၚ်-သြၚ်လောန်တိုၚ်(မ်)
ဗီုရုပ်-ရုၚ်ဂအုပ်စဵုဒၞာ