ညံၚ်လေဝ်ပေန်၊ မာတ်ချ်(၈)
ပ္ဍဲတိဍာ်ကဝ်ဒူလေဝ် ဗော်သွးကောန်ဂကူကရေၚ် KNU အုပ်ဓုပ်လဝ် ပ္ဍဲကဵုကွာန် မၞုံပ္ဍဲတိဍာ်ဒပ်မဟာ (၃) ခရိုၚ်ညံၚ်လေဝ်ပေန် ညးပါဲဘဲပၞာန် မၞုံဒၟံၚ်ဂၠိုၚ်အိုတ်ဂှ် ဒၟာနူဒပ်ကံၚ်ဇြဳပၞာန် ပန်ဖျေံဒၟံၚ်လွဟ် ဇၞော်အရိုဟ်ဒဒှ်တ္ၚဲဂှ်ရ ညးဒေသ (၃၀၀၀) ပြၚ် နူကွာန် (၆)ကွာန်ဂမၠိုၚ် ဒးထပ်ဂြိပ်ဒဴဒၟံၚ်ရဂှ် KNU လလောၚ်တြးလဝ် ပ္ဍဲဂိတုမာတ်ချ် စၟတ်တ္ၚဲ(၇)ဂှ်ရ။
ဂိတုဖေဖဝ်ဝါရဳ တုဲကၠုၚ်စၟတ် ပ္ဍဲစၟတ်တ္ၚဲ (၂၇) ကေုာံ (၂၈)ဂှ် ဒပ်ကံၚ်ဇြဳပၞာန် ဖျေံလဝ်ဗ္ဒပ် ပ္ဍဲကွာန်ခေန်ကာန်လာန်၊ ယျေတွန်ကုမ်၊ ကေုာံအေန်ပရိ မၞုံပ္ဍဲသြၚ်ပလိုတ်က္ၜဳသေတ်တောၚ်ဂှ် ပန်ဖျေံလဝ်လွဟ်ဇၞော် ပ္ဍဲလပါ်ကွာန်လုၚ်ပေန်ဝါ ကေုာံတေတ်ဖယျောၚ်တာန် ပွိုၚ်ဍုၚ်ကျောက်ဂျဳ တိဍာ်ဒပ်မဟာ(၃) ခရိုၚ်ညံၚ်လေဝ်ပေန် KNU မၞုံသြၚ်ဗၟံက်က္ၜဳသေတ်တောၚ် သီုတၚ်ရန်တၟံနွံနွံရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ဒၟာနူပန်ပှော်ဒၟံၚ်လွဟ်ဇၞော် သာ်ဏံတုဲ သ္ၚိဒၟံၚ်ညးဍုၚ်ကွာန် ကောန်ဒေသ (၃)မ တူပၟတ်ဒှ်အာပတေၚ် ဒးလီုလာ်လဝ်ရဂှ် ဂွံတီကေတ် အတိုၚ်တၚ်လလောၚ်တြး KNU ရ။
သ္အာၚ်နူဂှ်ပၠန် ပ္ဍဲဂိတုမာတ်ချ် တုဲကၠုၚ် စၟတ်တ္ၚဲ (၁)၊ စၟတ်တ္ၚဲ(၃) စၟတ်တ္ၚဲ (၄)ဂှ်လေဝ် ဒပ်ကံၚ်ဇြဳပၞာန် ပန်ဖျေံလဝ်လွဟ်ဇၞော် ပ္ဍဲကွာန်တေတ်ဖယျောၚ်တာန် ကေုာံဟေန်တာဝါ ပွိုၚ်ဍုၚ်ကျောက်ဂျဳ KNU ဂှ် သ္ၚိဒၟံၚ်ညးဒေသ နူကဵုကွာန်တေတ်ဖယျောၚ်တာန် (၂)မ ဒးထပ်လီုလာ်ကၠုၚ်လဝ်ရ။
ဒၟာနူဒပ်ကံၚ်ဇြဳပၞာန် ပန်ဖျေံဒၟံၚ်လွဟ်ဇၞော် ပ္ဍဲကွာန်ဂမၠိုၚ်ဗီုလၟုဟ်ဏံ သီုကဵုရန်တၟအ်နွံနွံဂှ်ရ ညးဒေသနူကွာန်ဂျဳပေန်သု၊ လုၚ်ပေန်ဝါ၊ တေတ်ဖယျောၚ်တာန်၊ ဝါမှူ၊ ကျဳသု ကေုာံအလေဝ်ကျောန်မပါလုပ် (၆)ကွာန်တအ်ဂှ် ကောန်ညးဍုၚ်ကွာန် (၃၁၇၄)တၠ ဒးဂြိပ်ဒဴဒၟံၚ် သီုအလုံကွာန်ရဂှ် KNU သ္ဂးလဝ်ရ။
ညးဍုၚ်ကွာန် ဒးဂြိပ်ဒဴပါဲဓလေတ်ဒၟံၚ်ဂှ် ဒးဗ္ဒဗ္ဒာဲဒၟံၚ်ကဵု ဒၞာဲဗၠးဘဲ၊ ကွာန် ကေုာံဇရေၚ်မသကလောကောဒေံ နွံဗ္ဒာဲဗ္ဒာဲတအ်ဂှ်တုဲ သွက်ညးဍုၚ်ကွာန် ပါဲဘဲပၞာန်တအ် ညးတာလျိုၚ်ပွိုၚ်ဍုၚ်ကျောက်ဂျဳ KNU စဳဇန်ကဵုဒၟံၚ် ဂဥုဲဇဗ၊ ကၟဳဗ္ဒၚ် ၜိုန်ရနွံဒၟံၚ်ကီုလေဝ် နွံဒၟံၚ်ပၟိက် ဗွဲမဂၠိုၚ်ဏီရဂှ် လလောၚ်တြးလဝ်ရ။
ဟိုတ်နူပရေၚ်ဒပ်ကံၚ်ဇြဳပၞာန် ချဳဒရာၚ်ပၞာန် ကေုာံဖံက်ပ္ကဝ်အခေါၚ်အရာမၞိဟ်တုဲ ညးဍုၚ်ကွာန်ပါဲဒဴဘဲပၞာန် ပ္ဍဲတိဍာ်ဒပ်မဟာ(၃) ခရိုၚ်ညံၚ်လေဝ်ပေန် KNU မၞုံကၠုၚ် စဵုကဵု(၁၄၀၀၀၀) ပြၚ်တုဲ နွံဒၟံၚ်ပၟိက်ကဵု အရီုဗၚ်ထံက်ပၚ်ပရေၚ်မၞိဟ် ဗွဲမဂၠိုၚ်ဏီရဂှ် ဂွံတီကေတ် အတိုၚ်တၚ်လလောၚ်တြး ဇာနှိက်ပရေၚ်ၜိုဟ်လလံကောန်ဂကူကရေၚ် KPSN ရ။
ပရိုၚ်-သြၚ်လောန်တိုၚ်(မ်)